Matalikilo 37
Josefa abanabokwabo
1 Pele Jakobo wakalikkede munyika ya Kenani oomo mwakakkede wisi. 2 Ono ngaaya makani aamukwasyi wa Jakobo. Josefa, kali mulombe wamyaka iili kkumi aciloba, wakali kweembela mbelele ampongo antoomwe abanabokwabo, bana ba Biliha aba Zilipa, bamwana kasuwa bawisi. Nkabela wakali kwaambilizya banabokwabo kuli wisi nkaambo kazintu zibi nzibakali kucita.
3 Awalo Isilayeli wakali kuyandisya Josefa kwiinda bana bakwe bamwi, mukuti wakazyalwa kali wisi wacembaala kale. Nkaako wisi wakamusumina jansi bbotu kapati. 4 Eelyo bapati bakwe nibakabona kuti wisi uyandisya Josefa kwiinda mbabo, bakasulaika Josefa cakuti tiibakacili kwaambaula kabotu anguwe.
5 Bumwi buzuba Josefa wakalota, lino wakaambila bapati bakwe ncaakalota. Nkaako bakaindilizya kumusulaika. 6 Ncaakabaambila ncakuti, “Amumvwe ciloto ncindalota. 7 Swebo toonse twali mumuunda, twali kwaanga misunta yamakuba aamaila. Nkabela musunta wangu, waima nji, kumane misunta yanu yazinguluka wangu, yaubikka akati mpoonya yaukotamina.” 8 Aawo banabokwabo bakamubuzya bati, “Sena yebo uyeeya kuti uyooba mwami wesu? Yebo uyootulela na?” Nkaako bakaindilizya kumusulaika akaambo kaciloto ncaakabaambila.
9 Alimwi Josefa wakalota ciloto acimwi akwaambila bapati bakwe kuti, “Ndalota acimbi ciloto. Muciloto eeci ndabona zuba amwezi, anyenyezi zili kkumi aimwi zyoonse zyandikotamina.” 10 Josefa wakaambila wisi abanabokwabo ciloto eeci, pele wisi wakamukalalila. Wakati, “Ani nciloto nzi eeci? Sena uyeeya kuti mebo abanyoko abapati bako tuyookukotamina yebo?” 11 Bapati bakwe Josefa bakamunyonokela, pele wisi wakali kuyeeya makani aaya oonse.
Josefa mbwaakauzigwa ku Ijipiti
12 Lino bapati ba Josefa bakainkide ku Syekemu kukweembela butanga bwawisi, 13 nkabela Isilayeli wakaambila Josefa kuti, “Mbuli mbozi, bapati bako beembela butanga ku Syekemu. Libambile kuti ndikutume kulimbabo.” Josefa wakaingula kuti, “Ndainka.” 14 Mpoonya wisi wakati kulinguwe, “Koya ukabone naa bali kabotu, alimwi ukabone abutanga naa buli kabotu, waakumana ukaboole uzoondizibye.” Aboobo wisi wakatuma Josefa kuzwa kukkuti lya Hebuloni. Josefa naakaakusika ku Syekemu, 15 umwi muntu wakamujana ulaingaila musokwe, eelyo wakamubuzya kuti, “Ino ulangaula nzi?” 16 Josefa wakaingula kuti, “Ndilangaula bapati bangu. Akaka amundaambile naa beembelela yi.” 17 Muntu ooyo wakati, “Bakalonga kale. Ndakamvwa kuti bakaya ku Dotani.” Aboobo Josefa wakabatobela akuyoobajana ku Dotani.
18 Lino balo bakamubona kacili aalaale, katanasika afwiifwi ambabo. Nkabela bakatalika kulivwiya kuti bamujaye. 19 Bakaambilana kuti, “Nguulya siziloto wasika. 20 Atumujaye, twamana mutumba wakwe tuusowele mumulindi umwi, eelyo tukaambe kuti walumwa munyama. Tubone naa ziloto zyakwe zilacitika buti.”
21 Pele Lubeni naakabamvwa, wakamuvuna kulimbabo. Wakati, “Tutamujayi pe. 22 Atumuwaalile buyo mumulindi ooyu, pele mutamujayi pe.” Wakaamba oobo nkaambo wakali kuyeeya kuti uzoomugwisya cakusisikizya akumubweedezya kuli wisi. 23 Lino Josefa naakasika aakali bapati bakwe, bakamusamununa jansi liya. 24 Bamukwela, bamuwaala mumulindi uutakwe maanzi.
25 Lino ciindi nibakali kulya, bakabona nkamu ya Baisyimayeli bakali mulweendo kuzwida ku Giliyadi. Nkamela zyabo zyakayumwide misamu atununkilizyo ntubakali kutola ku Ijipiti kuyoouzya. 26 Lino Juda wakati kubeenzinyina, “Ino inga twajana nzi kuti naa twajaya musyoonto wesu akusisa lufu lwakwe? 27 Atumuuzye buyo ku Baisyimayeli aaba. Nkaambo twacita boobo inga tatukoomujaya buya pe, kayi mmusyoonto wesu. Tuli bamwi anguwe.” Eelyo bapati bakwe bakacizumina eeco. 28 Lino basambazi Bamidiyani nibakainda, bapati ba Josefa bakamugwisya mumulindi bamuuzya ku Baisyimayeli amali aansiliva aali makumi obilo. Baisyimayeli balo bakamutola ku Ijipiti. 29 Ciindi Lubeni naakazoosika kumulindi ooko akujana kuti Josefa tamo, wakazapaula zyakusama zyakwe mukuusa. 30 Wakabweeda kubeenzinyina akuyooamba kuti, “Mulombe tamo pe! Ino mebo ndilacita buti?”
31 Lino balo bakajaya mpongo, banyika jansi lya Josefa mubulowa. 32 Bamane bakalitola kuli wisi. Bakamutondezya, bati. “Sena inga eeli lilaba jansi lyamwanaako, twalijana buyo mbubonya oobu?” 33 Jakobo wakaliziba, eelyo wakati “Ndendilyo! Munyama wakamujaya. Josefa wazapaulwa!” 34 Mpoonya Jakobo wakazapaula zyakusama zyakwe, akusama zyamasaka mucibuno kutondezya kuusa. Wakalila mwanaakwe kwamazuba manji. 35 Boonse bana bakwe balombe abasimbi bakasika akusola kumuumbulizya, pele wakakaka wati, “Ndinoomulila mwanaangu mane kusikila nkafwe.” Mbombuboobu Jakobo mbwaakacili kulila mwanaakwe Josefa.
36 Ciindi nciconya eeco ku Ijipiti, Bamidiyani bakauzizye kale Josefa kuli Potifaa, umwi wabalupati-pati ba Falo wakalikulanga balindizi.