Matalikilo 34
Syekemu mbwaakasofwaazya Daina
1 Lino Daina, mwana musimbi wa Jakobo a Leya, wakaya kukuswaya bakaintu bamwi banyika eeyo. 2 Lino Syekemu, mwanaa Hamoo Muhivi, wakali ngomwami wacisi eeco, naakabona musimbi ooyo, wakamujata akumwaandila. 3 Lino wakamuyandisisya, nkabela akaambo kaako, wakasola kapati kukanana cakumoongelezya. 4 Amane wakaambila wisi kuti, “Kondiselela musimbi ooyu kuti ndikwate.”
5 Lino Jakobo wakamvwa kuti mwanaakwe musimbi Daina wakasofwaazigwa, pele akaambo kakuti bana balombe bakali musokwe kabeembela, taakwe cintu ncaakacita pe. Wakalindila mane nibakaboola. 6 Nkabela Hamoo, wisi Syekemu, wakaya kuli Jakobo kuyoobandika makani aayo. 7 Ciindi eeco bana ba Jakobo bakaboola kukweembela. Lino nibakamvwa makani aaya, bakabijilwa akunyema kapati nkaambo Syekemu wakacita cintu cabufuba-fuba citondwa kubantu ba Isilayeli mukujata mwanaa Jakobo. 8 Lino Hamoo wakati kulimbabo, “Mwanaangu Syekemu wamuyandisya kapati mwanaanu, aboobo tukumbila kuti mumuzumizye bakwatane. 9 Alimwi atupange bulongwe bwakukwatana swebo katukwata bana banu, anywebo kamukwata besu. 10 Ndendilyo nomunga mwakkala omuno mucisi antoomwe andiswe, mulakonzya kusala kufumbwa busena mbomuyanda kuyakila. Munoosambala cakuliiba akuvuba lubono.”
11 Awalo Syekemu wakaamba kuli Jakobo wisi Daina akubana bokwabo wakati, “Amundiyeeyele kabotu mumakani aaya, kufumbwa ncomunga mwayanda inga ndamupa. 12 Amundiitile kufumbwa zipego nzyomuyanda, ndakwa, ndilamupa kufumbwa ncomutaambe naa mwazumina kundipa musimbi kuti mmukwate.”
13 Mpoonya aawo bana ba Jakobo bakaingula calweeno, mukuti Syekemu wakasofwaazya mucizi wabo. 14 Bakati, “Tatukonzyi kuzumina kuti mucizi wesu akwatwe kumwaalumi uutapalwidwe, nkaambo eeco inga caba masampu kulindiswe 15 Kuti baalumi bakulindinywe boonse batapalulwa mbuli ndiswe, inga tatuzumini pe. 16 Kuti naa mwapalulwa inga twazumina kuti mukakwate bana besu, alimwi aswebo tukwate bana banu. Tuyookkala akati kanu akuba bantu bomwe anywebo. 17 Pele kuti mukake kupalulwa, tulamutola mucizi wesu akuunka.”
18 Lino majwi aaya akababotela ba Hamoo amwanaakwe Syekemu. 19 Mpoonya musankwa ooyu taakwe anaakasowa ciindi pe wakacita eeco cakaambwa, nkaambo wakali kumuyandisya mwanaa Jakobo. Alimwi musankwa ooyo wakali ngomuntu uulemekwa kapati kwiinda mumukwasyi wakwe.
20 Eelyo ba Hamoo amwanaakwe Syekemu bakainka kumanjililo aamunzi, baakwaambila baaluminyina bamumunzi kuti, 21 “Aaba bantu bajisi buumi bwabulongwe bubotu, aboobo amubazumizye bakkale muno munyika andiswe, akuti kabalyeendela cakwaangunuka. Amubone nyika yesu nimpati cakuti balakonzya kukkala abalo. Katukwata bana babo, abalo kabakwata bana besu. 22 Mboobu mbobanga bakkala andiswe kuti tube bantu bomwe. Swebo tweelede kuzumina kupalula boonse baalumi mulindiswe, mbubonya mbuli mbobapalwide balo. 23 Banyama mbobavubide alubono lwabo lumwi loonse, inga zyaba zyesu. Ino mbuti kuti twazumina kutegwa bakkale andiswe?” 24 Lino bantu bamumunzi ooyo bakazumina makani aakaamba ba Hamoo a Syekemu, eelyo baalumi boonse bakapalulwa.
25 Lino nikwakainda mazuba otatwe, zilonda zyabo kazizimbide akucisa kapati, bana bobilo ba Jakobo, Simiyoni a Levi, banyinandumi Daina, bakabweza mapanga aabo akunjila mumunzi cakulisisikizya, eelyo bakaakujaya baalumi bamunzi boonse. 26 Bakamujaya awalo Hamoo amwanaakwe Syekemu, bamane bakagwisya Daina muŋanda ya Syekemu, mpoonya bainka. 27 Abamwi bana ba Jakobo bakaza kumunzi wabafu kuusaala, nkaambo kakuti mucizi wabo wakasofwaazigwa. 28 Bakatola matanga aambelele, aaŋombe, aambongolo, azintu zyoonse zyamumunzi azyamumyuunda. 29 Bakatola lubono loonse, akutola bakaintu babo boonse abana babo boonse, azintu zyoonse zyamumaanda.
30 Mpawo Jakobo wakaambila Simiyoni a Levi kuti, “Lino mwandinjizya mumapenzi, nkaambo boonse bantu banyika iino, Bakenani, a Bapelizi balandizonda. Mebo nsijisi baalumi banji pe, kuti naa balibunga-bunga aamwi akundilwana, inga mukwasyi wangu woonse antoomwe andime, ulamana kufwa doo.” 31 Pele balo bakaingula kuti, “Tatukonzyi kuleka mucizi wesu kuti acitwe mbuli kuti muvuule pe.”