Matalikilo 33

Jakobo mbwaakaswaangana a Isau

¹ Lino Jakobo naakabona Isau kaboola abantu bali myaanda yone, wakapa bana bakwe kuli Leya, Lacelo akubakaintu bazike bakwe bobilo baya. ² Amane wakasolozya bakaintu bazike abana babo kumbele, kumane kwaza Leya abana bakwe, eelyo ba Lacelo a Josefa mbabakali kweendela musule mwini. ³ Jakobo lwakwe wakeendela kumbele lyabo, wakali kuya bukotama kwaziindi zili ciloba, mane limwi waakusika kumupati wakwe. ⁴ Pele Isau wakamuzuzaanina akumumyonta. Mpoonya boonse bobilo bakalila. ⁵ Nkabela Isau naakalanga-langa akubona bakaintu abana, wakabuzya kuti, “Ino mbaani bantu aaba mboli aabo?” Jakobo wakaingula kuti, “Aaba mbabana Leza mbaakandipa muluse lwake.” ⁶ Mpoonya kwakasika bakaintu bazike abana babo bazoofugama. ⁷ Awalo Leya abana bakwe wakasika, eelyo kumamanino kwakasika Josefa a Lacelo, abalo bakazoofugama.

⁸ Alimwi Isau wakabuzya kuti, “Ino iilya nkamu njendasaanguna kuswaangana ninkamu nzi?” Jakobo wakaingula kuti, “Iilya nkamu njakuti utesye moyo akundibeda aankumbu.” ⁹ Pele Isau wakati, “Peepe mukwesu, mebo ndilizulizizye kale, kotola buyo eezyo nzyojisi.” ¹⁰ Eelyo Jakobo wakati, “Akaka, omukwesu, naa kuti wandibeda aankumbu, tambula cipego eeci ncendakupa. Nkaambo mebo kukubona caba mbuli kuti ndabona Leza, kapati mbuli mboonditambula alubomba. ¹¹ Akaka tambula cipego eeci ncendakuletela, nkaambo Leza wakandibeda aaluzyalo, wakandipa zyoonse nzendakali kubula.” Nkaako wakamukombelezya kusikila limwi wacitambula cipego eeco.

¹² Mpoonya Isau wakaamba kuti, “Atulibambile tweende. Mebo ndilamusolweda.” ¹³ Pele Jakobo wakaingula kuti, “Simalelo wangu, ulizi kale kuti bana bacili batete alimwi ndileelede kuyeeyela mbelele aŋombe abana bazyo. Kuti naa zyabingwa gubi-gubi nikuba buyo buzuba bomwe, inga butanga boonse bwamana kufwa. ¹⁴ Koya kumbele yebo, mebo ndinoosyaalide musule nkeza bulibemba mbuli bukonzya kweenda ŋombe abana, mane njookujana ku Siiya.” ¹⁵ Amvwe boobo Isau wakati, “Ani ncibotu kuti nkusiile bamwi bantu bangu kuti bakugwasye.” Pele Jakobo wakati, “Kwalo waamba kabotu simalelo wangu, pele bantu ndijisi.” ¹⁶ Aboobo Isau wakatalika lweendo lwakwe lwakubweeda ku Siiya. ¹⁷ Jakobo wakatozya ku Sukkoti, ooko wakaakuyaka ŋanda yakwe akuyaka zimpati zya ŋombe zyakwe. Nkankakaako busena oobo ncobwiitwa kuti Sukkoti.

¹⁸ Lino Jakobo wakaakusika kabotu kumunzi wa Syekemu munyika ya Kenani. Naakaboola kuzwa kucisi ca Padanalamu, wakayaka zivuka zyakwe mumuunda uuli munsi aamunzi. ¹⁹ Wakaula cipaanzi camuunda ooyo amali aansiliva aali mwaanda kuzwa kubana balunyungu lwa Hamoo, wisi Syekemu. ²⁰ Wakayaka cipaililo ooko akucuulika kuti Elelohe Isilayeli nkokuti, “Leza wa Isilayeli.”