Matalikilo 32
Jakobo mbwaakalibambila kuswaangana a Isau
1 Lino Jakobo wakaindilizya mulweendo lwakwe, nkabela bangelo bakaswaangana anguwe. 2 Naakababona, Jakobo wakati, “Eeyi nimpi ya Leza.” Nkaako busena oobo wakabuulika kuti Mahanaimu.
3 Amane Jakobo wakatuma bantu kuti basolole kuyooswaangana a Isau mupati wakwe, wakali kukkala munyika ya Siiya, mucisi ca Edomu. 4 Lino wakabalailila kuti bakaambe boobu, “Mebo ndime Jakobo, mutwanga wako walibombya kulinduwe. Ndakali kukkala kuli Labani alimwi ndakamuka kupiluka kusikila sunu. 5 Ndilijisi ŋombe, mbongolo, mpongo, mbelele, alimwi abazike baalumi abakaintu. Lino ndatumina mulomo kulinduwe nkaambo ndasyoma kuti inga ulandeengelela.”
6 Lino batumwa nibakaboola kuli Jakobo bakamwaambila kuti, “Twaliko kumupati wako Isau, lino uli kale munzila kuzookucingauzya. Ujisi baalumi bali myaanda yone mbazabuza aabo.” 7 Mpoonya Jakobo wakayoowa kapati akubijilwa. Wakaandaanya bantu bakwe ambelele, mpongo, ankamela muzikamu zyobilo. 8 Wakayeeya kuti, “Kuti naa Isau wasika akulwana ankamu yabantu bangu ntaanzi, inga imwi nkamu yabili ilakonzya kuti ifutuke.”
9 Mpoonya Jakobo wakakomba wati, “Leza wa Abulahamu syaanene, Leza wataata Izaka, ndiswiilile! Yebo O Mwami Leza, nduwe wakandaambila kuti, ‘Jokela kunyika yako akumukowa wako, nkabela ndiyoocita zintu kuti zikakweendele kabotu.’” 10 Mebo ndemubelesi wako nsyeelede kufwidwa luse ndonditondezya cakusyomeka. Ndakazubuka mulonga wa Jolodani nketakwe akantu nokaceya nkejisi ccita buyo musako ulikke, pele ndaboola nkejisi nkamu zyobilo eezi. 11 Ndakomba, undivune kunguzu zyamupati wangu, Isau. Ndiyoowede nkaambo uzabuza kuti azootulwane akutunyonyoona toonse buyo, antoomwe abakaintu abana. 12 Kociyeeya cisyomezyo cako ncookati, “Ncobeni ndiyoocita kuti zyoonse zikweendele kabotu, alimwi wakati, ‘Ndiyookupa lunyungu lunji cakuti bana bako tabakooyoobalika. Bayoovula mbuli musenga wakunkomwe yalwizi.’”
13 Wakoona mpoonya aawo, abuke cifumo-fumo, wakasala zintu zyakupa mupati wakwe Isau kuzwa mulubono lwakwe. 14 Kwakali myaanda yobilo yampongo nzyazi abasijembwe bali makumi obilo, kwakali myaanda yobilo yambelele nzyazi abagutu bali makumi obilo, 15 makumi otatwe aankamela zinyonsya abana bazyo, aŋombe nzyazi zili makumi one abapoho bali kkumi, ambongolo nzyazi zili makumi obilo abeenze bali kkumi. 16 Matanga oonse aaya ngaakasala wakaapa kubabelesi bakwe kuti umwi aumwi alange butanga bumwi. Alimwi wakabaambila kuti, “Nywebo musolole, lino mwanoobinga matanga kamusiilana zibaka.” 17 Lino wakalailila ooyo mubelesi wakali kubingila kumbele kwini wakati, “Kuti aakukuswaanganya Isau akakubuzye kuti, ‘Ino nguni simalelo wako? Alimwi muya kuli? Nguni ulaalubono oolo ndojisi?’ 18 Ukati, ‘Oolu lubono ndulwa Jakobo mutwanga wako. Walutumya kuli Isau simalelo wakwe, wamupa buyo. Nkabela awalo Jakobo lwakwe mwali munsi ulaza.’” 19 Boonse wakabalailila nzila yomwe yakwaamba, wakamulailila oobo mubelesi wabutanga bwabili awabwatatu, mane boonse mbuli mbobakali kutobelana wakati, “Oobu mbomweelede kwaambila Isau mwaswaangana anguwe. 20 Mweelede kwaamba kuti, ‘Awalo Jakobo mutwanga wako ulaza musule lyesu.’” Iiyi mutwanga wako Jakobo wakayeeya kuti, ambweni inga moyo wamupati wangu ulakkala kuti naa ndamutumina zipego, twaswaangana ambweni inga wakonzya kundilekelela akunditambula kabotu. 21 Lino zipego zyakasaanguna kuya kumbele lyakwe, walo wakasyaala kuzivuka bwamasiku aayo.
Jakobo mbwaakatingaana amungelo wa Leza ku Peniyeli
22 Masiku ngoonya aayo Jakobo wakabuka, wakatola bakaintu bakwe bobilo abakaintu bazike bakwe bobilo, abana bakwe bakali kkumi aumwi, eelyo bakazubuka mulonga wa Jabboko acito cawo. 23 Naakamana kubazubusya akuzubusya zintu zyoonse nzyaakajisi, 24 wakasyaala alikke buyo. Lino mwaalumi umwi wakatingaana awe mane bwaca.
25 Mwaalumi ooyo naakabona kuti wakacilwa kumuzunda, wakaampa Jakobo akasolo, eelyo kasolo kakapesuka kabatingaana. 26 Mpoonya mwaalumi ooyo wakaambila Jakobo kuti, “Ndilekezya ngunke, nkaambo bwaca.” Pele Jakobo wakaingula kuti, “Nsikookulekezya pe, ccita undileleke.” 27 Muntu ooyo wakabuzya kuti, “Ino nduweni?” Jakobo wakati, “Ndime Jakobo.” 28 Lino muntu ooyo wakati, “Lino tociyooitwi limbi kuti Jakobo nkaambo watingaana a Leza alimwi abantu, nkabela wazunda, nkaako unootegwa Isilayeli.” 29 Jakobo wakati, “Akaka, ndaambila zina lyako.” Walo wakaingula kuti, “Ino zina lyangu ndyobuzya ndyanzi?” Amane wakaleleka Jakobo.
30 Mpoonya Jakobo wakati, “Ndabona Leza meso ameso kwamana ndicipona!” Aboobo busena oobo wakabuulika kuti Peniyeli. 31 Aawo zuba lyakapasula ciindi Jakobo naakazwa ku Peniyeli, wakazwa kaya busunkuta nkaambo kakupesuka kwakasolo. 32 Nkankakaako Baisilayeli ncobatalidi nyama yamulambi wakasolo asunu, mukuti mpampawo aakaampwa Jakobo naakapesuka.