Jobo 28
Zyakulumbaizya basongo
1 “Ncobeni kuli mugodi kujanwa nsiliva,
abusena ngolida nkoisalazigilwa.
2 Lubulo lulasigwa kuzwa munyika,
mukuba uleenzemunwa kuzwa kumabwe.
3 Bantu balalangaula mumudima,
bayandaula mabwe aayo mumudima uusiya mbi
mane do kusimpila mugodi.
4 Balasya manjililo aamumugodi kule kuzwa nkobakkala bantu,
balalubwa abasilweendo, balalengelela amakole balazeemuka.
5 Atala aanyika kulazwa cakulya, kunsi kwayo kuli mulilo uuyeenzemuna.
6 Kuzwa munyika balagwisya mabwe aacijulu-julu,
alimwi ngolida ilajanwa mulusuko lwayo.
7 Nzila iitola kunsi taakwe luunga uuizi,
aliso lyalubanze talinaibwene pe.
8 Banyama bakali tabanaiindide, syuumbwa tanaiinda pe.
9 Basimugodi balapandaula mabwe mayumu nta,
balasya lyoonse ansi azilundu bazyula ntalisyo zyazyo.
10 Baladonkola maindilo mumandomba
Meso aabo alabona lubono loonse luyandisi.
11 Balasinkila bapoompo baansi kutegwa kabatanjizyi maanzi.
Lubulo lusisidwe balaluyubununa amumuni.
12 “Ani bwalo busongo bujanwa kuli?
Aalo maanu ino akkala kuli?
13 Taakwe muntu uuzi mpindu yabo,
alimwi tabujanwi akati kabantu.
14 Mpisi ilaamba, ‘Tabuli aandime pe.’
Alwalo lwizi lulaamba, ‘Tabuli aandime pe.’
15 Busongo tabuulwi angolida niiba buti,
muulo wabusongo tuupimwi ansiliva.
16 Mpindu yalubulo lwangolida,
niiba iizwa kubusena bwa Ofii,
niiba mpindu yamabwe aaŋaima naaba aacijulu-julu
naanka yamabwe mayandisi mabwe aamakwalala
mbuli cibize taakonzyi kweelana abusongo.
17 Ngolida amabwe aabalangala tazyeelani abusongo,
atwalo tunkwinta-nkwinta twangolida iini-ini tatusintanwi abusongo.
18 Tubwe tusalala pyu amabwe aabalangalisya nzyabuyo,
kweelanyika abusongo oobu, ncobeni muulo wabusongo ulainda wambaanyina.
19 Mabwe mayandisi aacisuku aaku Kusyi taaelani ambubo,
niiba ngolida iini-ini tiielani ambubo pe.
20 Ani bwalo busongo buzwa kuli? Mbusena nzi bujanwa maanu?
21 Nkaambo bulisisidwe kuzwa kuzilenge zyoonse,
nikuba kubayuni bauluka.
22 Cikkalilo cabafu alufu zilati,
‘Twakamvwa buyo mpuwo yabo.’
23 “Pele Leza alikke nguuzi nzila yabo,
alimwi nguuzi nkobukkala.
24 Nkaambo ulalanga kumagolelo aanyika,
nkabela ulabona zyoonse zili kunsi aajulu.
25 Leza nguwakapa nguzu kuluuwo,
akweeleka kukomena kwalwizi lupati.
26 Nguwakabikka milawo yamvula, akubamba nzila zyandabo.
27 Kuciindi eeco wakabuyeeya akubwaambilizya busongo,
wakabwiimika akubuzumizya.
28 Lino kumuntu wakati,
‘Masimpe, kulemeka Mwami Leza mbobusongo,
akwalo kweenguluka bubi ndoluzibo.’”