Jobo 29
Jobo
1 Jobo wakacili kwaamba wakati,
2 “Nicali cibotu kuti nindacili mbuli mumyezi yamana,
mbuli mumazuba aalya Leza naakacili kundilanganya.
3 Ciindi lambe lyakwe nilyakacili kundimunikila,
akaambo kamumuni wakwe ndakali kukonzya kweenda mumudima,
4 mbuli mbundakabede mubulongwe a Leza mumazuba aangu
aabukubusi naakali kuleleka ŋanda yangu.
5 Singuzuzyoonse naakacili aandime,
abana bangu nibakacili aandime.
6 Nindakacili kutila buyo mukupa,
misamu yangu yamaoliva niyakali kukomena kabotu
nimuba mulubwe-lubwe.
7 Nindakali kulya kubusena bwakuswaanganina,
nindakakkala acuuno cangu akati kabalupati-pati mumunzi.
8 Bana bakubusi nibakali kundibona bakali kusosoloka,
amadaala akali kwiima cakulemeka.
9 Bana babami bakaleka kwaambaula, baumuna.
10 Majwi aabami akaumuzigwa, ayalo milaka yabo yakabatama mumilomo yabo.
11 Kufumbwa wakandimvwa wakandiita kuti ndisicoolwe,
kufumbwa wakandibona wakandilumbaizya.
12 Nkaambo ndakavuna bacete bakali kuyanda lugwasyo,
alimwi abamusyaala bakali kubula basikubagwasya.
13 Muntu wakali afwiifwi kufwa wakandileleka.
Ndakacita moyo wamukamufu kuti wiimbe munkondo.
14 Ciindi coonse ndakali kucita ziluleme,
milimo yangu yoonse yakali londokede.
15 Ndakali meso kuboofu, ndakali maulu kubantu balemene.
16 Ndakali mbuli wisi kubacete nindakali kubavuna,
nikuba kuti tiindakazi ndakayandaula penzi lyabo.
17 Ndakali kupwaya mpobe zyabataluleme,
akubacita kuti balosye ncobakali kulya.
18 Aboobo ndakali kuyeeya kuti,
‘Ndiyoofwida akati kabana bangu,
mazuba aangu ayoovula mbuli musenga.’
19 Ndakalilelekedwe, miyanda yangu yakali tandabede kuyoosika kumaanzi,
kwakali mume amitabi yangu masiku oonse.
20 Bulemu bupya bwakali kuboola kulindime,
nguzu zyangu tiizyakanamana pe.
21 Baalumi bakandiswiilila,
bakalindila kabaumwine kuti bamvwe kulaya kwangu.
22 Nindakamana kukanana taakwe wakacili kukanana limbi
nkaambo majwi aangu akabayasa.
23 Bakali kulangila ndime mbuli balimi mbobalangila mvula ciindi cacilimo.
24 Nindakabamwemwetela tiibakasyoma,
alimwi taakwe wakazima lutangalo lwabusyu bwangu.
25 Ndakabasalila nzila akubaambila zyakucita,
ndakali mbuli mwami kulimbabo.
Masimpe, ndakeendeenda mbuli mwami akati kabasilumamba bakwe,
akubatontozya mumapenzi aabo oonse.