Jobo 27
1 Jobo wakacili kwaamba akuti,
2 “Mbuli Leza mbwali muumi, watakandibeteka kabotu,
Singuzuzyoonse wapenzya buumi bwangu,
3 kufumbwa mebo ndanoociyoya,
alimwi Singuzuzyoonse acinoondipa buumi,
4 taakwe nenjooamba cakubeja pe.
Mulaka wangu taukaambi calucengo.
5 Pe, nsikooamba kuti muliluzi,
mane kusikila ndikafwe nsikoozumina kuti ndili aamulandu.
6 Ndilikakatide kubululami bwangu, nsileki,
nsikwe buungwaungwa aasyoonto mubuumi bwangu boonse.
7 “Sinkondoma asubulwe mbuli bubi bwabo,
ayooyo uundilwana asubulwe mbuli muntu uutaluleme.
8 Ino ndulangilo nzi ndwajisi muntu uutazi Leza,
ndulangilo nzi ndwajisi ciindi Leza namukosola akutola buumi bwakwe?
9 Sena Leza ulamvwa kulila kwakwe ciindi mapenzi naamusikila?
10 Sena uyootangala muli Singuzuzyoonse?
Sena uyooompolola kuli Leza ziindi zyoonse?
11 Njakwiisya mbozibede nguzu zya Leza,
kufumbwa ceeco cili mumuzeezo wa Singuzuzyoonse nsikooyoocisisa pe.
12 Iiyi, ncobeni nywebo nyoonse mwalibonena kale ameso aanu,
ino nywebo mwaambila nzi cabuyo?
13 Caabilo ncapa Leza kumuntu mubi,
alukono ndobatambula basikudyaminina kuzwa kuli Singuzu zyoonse ndoolu:
14 Kuti naa mubi bana bakwe bavuzigwa nkokuti bayoomana,
bayoomana cilongomuzyolelwa munkondo, bana babo banoolala anzala lyoonse.
15 Bamusyaala bamubi bayoomana cilwazi, bamukabafu babo tabakabalili.
16 Nikuba kuti akalundike nsiliva mane ikavule mbuli lasuko,
akuvuzya zyakusama kwiindilila taakwe pe.
17 Iiyi, ulakonzya kulundika, pele baluleme mbabayoozisama,
abalo batakwe mulandu bayooabana nsiliva eeyo.
18 Ŋanda njayaka ili mbuli luubilili buyo,
ninteteete mbuli citungu casikulinda.
19 Ulalala kavubidwe pele taciyoociti limbi oobo,
ulasinsimuka pele ulajana lubono lwakwe lwamana.
20 Ziyoosyo zilamuboolela kufwambaana mbuli fwipi-fwipi,
fwipi-fwipi lyamaanzi manji, alimwi muciindi camasiku guwo pati lilamukukulizya.
21 Luuwo luzwa kujwe lulamunyamuna eelyo ulaloba,
lulamukukula kuzwa mucilawo cakwe.
22 Luuwo oolu lulamubbubbulila caluciso talumweengeleli, lulamuvupaula,
23 lulamuvupula akumufulida kuzwa mubusena bwalo.