Jobo 26
Jobo
1 Lino Jobo wakaingula wati,
“Eena mbondigwasya mebo eentajisi nguzu oobu!
2 Eena mbondiyumya-yumya mebo eentajisi mputo!
3 Eena mbwelaililwa mebo eentajisi busongo!
Eena mbotondezya kuti uli aaluzibo oobu.
4 Nguni wakwaambila kwaamba boobo?
Ani wazijana kuli eezi?
5 Lino myuuya yabafu ilazyangama,
mucikkalilo cayo cili kunsi aalwizi.
6 Zyuumbwe tazivumbide kuli Leza.
Abwalo busena bwakunyonyoonwa tabusisidwe kulinguwe.
7 Wakakwakwabula julu lyoonse,
alimwi wakaanzika nyika aatakwe cintu.
8 Ulayobola maanzi mumakumbi aakwe,
alimwi kkumbi talituluki akaambo kakulema kwawo.
9 Ulasitilila mwezi akkumbi lyakwe.
10 Wakabikka munyinza walwizi, uuandaanya mumuni amudima.
11 Zicinda zyajulu zilazungaana, akaambo kabukali bwa Leza.
12 Anguzu zyakwe wakabatamika lwizi,
alimwi amaanu aakwe wakanyonyoona Lahabu, tosi.
13 Akuyoya kwakwe majulu akabotezegwa,
janza lyakwe lyakauma nzoka eeyo yakali kutija.
14 Bona zyoonse eezi nzipaanzi buyo zyamilimo yakwe,
akaka swebo tumvwa buyo kuvwiya-vwiya kwakwe.
Aboobo nguni uunga ulaziba kuzuma kuzulide kwanguzu zyakwe?”