Jobo 24
1 “Nkaambo nzi Singuzuzyoonse ncatajisi ziindi zyeelede zyakubeteka?
Nkaambo nzi aabo bamuccilila nkobataboni kukosola kwakwe?
2 Bantu balakwakwabula munyinza,
baleembela matanga aambelele ngibakasaala.
3 Balatola mbongolo zyabamusyaala,
balajatilizya musune wamukamufu mukuti wakakweleta.
4 Balatanda bacete mumigwagwa,
nkaako bacete bamunyika yoonse balayuba.
5 Amulange abalo bacete, bali mbuli bacibize baingaila munkanda,
balaya kumilimo yabo kabayandaula cakulya munkanda, bayandawida bana babo.
6 Balavulula maila, batebwida babi nsaansa.
7 Busiku boonse baloona cintanda,
tabajisi cakulivumba ciindi campeyo.
8 Baugwa mvula iizwida mumalundu,
balalimanikizya mumandomba mukuyanda kuyusa.
9 Nkobali basilunya bamwi bacita bamusyaala buzike,
balajatilizya bana babacete mukuti bakakweleta.
10 Bacete baleenda acintanda, balafwa nzala
nikuba kuti batebwida bamwi.
11 Beengela bavubi mafuta, mbabalyatauka nsaansa
muzikandilo zyabavubi, nikuba boobo balafwa nyota.
12 Muminzi kulamvwigwa kutongela kwabayasidwe abayanda kufwa,
nikuba boobo Leza taswiilili kukomba kwabo.
13 “Kuli bamwi bakaka mumuni, aabo batamvwisyi nzila yawo,
nikuba kukkalilila munzila yawo.
14 Mujayi ulabuka masiku, ujaya bacete abateteete.
Mbukwasiila waba mubbi.
15 Simamambe awalo ulalindila lubundu-bundu,
usama syaamankwamu kati, ‘Taakwe uutindibone pe.’
16 Masiku babbi balapwaya maanda,
nkabela bucica buyo balalijalila lwabo,
nkaambo tabayandi mumuni.
17 Akati kamasiku nciindi cabo,
balizibwene aziyoosya zyamumudima.
18 “Lino babi balakukulwa afwipi-fwipi lyamaanzi,
cipaanzi cabo casinganyizigwa munyika,
cakuti tabakonzyi kubeleka mumyuunda yabo yamisaansa.
19 Mbuli zuba acilanga mboziyuminizya caanda,
mbubonya oobo lufu mbolugwisya basizibi munyika.
20 Nibaba banyina bayoomuluba mubi,
mulanzyi ulamubumba cakukkomana.
Mbubonya oobu bubi abwalo bulatyolwa mbuli musamu wawa.
21 Eezi ziyoocitika nkaambo bapenzya bakaintu batazyali,
alimwi tabacitili kabotu bamukabafu.
22 Nikuba boobo Leza ulanyonyoona buumi bwabasinguzu amunguzu zyakwe,
nikuba kuti balilikkalilide, banyina lulangilo lwabuumi.
23 Ulabaleka kabaliiba, pele nzila zyabo zyoonse ulizilangilide.
24 Balisumpukide kwaciindi ciniini buyo, kwamana balazimaana.
Balafwiinsigwa mbuli bantu boonse, balagonkwa mbuli makunka aamaila.
25 Kuti naa aambe kuti oobo mbokubede,
nguni uukonzya kwaamba kuti ndabeja,
akuntondezya kuti majwi aangu ngabuyo?”