Jobo 23
Jobo
1 Mpawo Jobo wakaingula wati,
2 “Asunu kutongooka kwangu nkwakuzanga,
kunsi lyajanza lyakwe demu ntongela buyo.
3 Akaka nindalizi nkwendikonzya kumujana,
mane nindaakusika ankwakkala buya!
4 Nindaakumwaambila kaambo kangu,
nindaakutola matongoosi aangu kulinguwe.
5 Nikwali kunga ndaziba eeco ncaali kunoondiingula,
nindaakumvwa eeco ncaali kunoondaambila.
6 Sena naayakundikakila canguzu? Pe, naayakundiswiilila.
7 Ndimuntu uululeme nindaakukazyanya anguwe ooko,
awalo naaya kundaamba kuti nsikwe mulandu alili.
8 “Nikuba kuti ndainka kujwe, tako pe,
ndapiluka kumbo akwalo nsimujani pe.
9 Ndamuyandaula kubbazu lyalumwensi,
pele nsikonzyi kumubona pe,
ndasandukila kululyo akwalo nsimuboni.
10 Nikuba boobo ulizi mbonjenda amana kundisunka njooba
mbuli lubulo lwangolida iini-ini.
11 Ndili munzila ya Leza, nditobede ntaamo zyakwe,
ndeenda munzila yakwe nketaleyi pe.
12 Tiindakaleka kutobela malailile aakwe,
ndabamba majwi aakwe kwiinda nzeyanda zimwi.
13 Pele nguni ukonzya kumucita kuti asandule muyeeyo wakwe?
Ulacita coonse ncayanda.
14 Mbombuboobu mbwayoomanizya coonse ncandibikkilide,
alimwi zintu zinji zili boobu nkozili mumiyeeyo yakwe.
15 Nkaako ndakankama nkaambo kakwe, ndamuyeeya, ndayoowa.
16 Nkaambo ka Leza moyo wangu wanetuka,
Singuzuzyoonse ulandiyoosya kapati.
17 Ndizingulukidwe amudima,
mudima uusiya mbi uvumbilide meso aangu.