Intembauzyo 126
Lwiimbo lwa kutanta
1 Cakali mbuli kulota buyo, mbuli kulota buyo ciindi Mwami Leza naakaboozya baange ku Ziyoni.
2 Twakasekelela kapati, twakaimba cakutangala,
aawo bamasi bakatalika kwaamba kuti, “Mwami Leza wakabacitila zintu zipati.”
3 Masimpe Mwami Leza watucitila zintu zipati, nkaako tulasekelela kapati.
4 Tuboozezye buvubi bwesu, O Mwami Leza,
tube mbuli tulonga twamaanzi twaku Negebu, munkanda.
5 Aabo basyanga kumwi kabalila, bayoobotelwa akwiimba nyimbo zyalutangalo.
6 Muntu uuyakukusyanga kaya bulila, uyoopilukila kaimba nyimbo zyalutangalo.
Uyoopilukila kayumwide amisunta yabutebuzi bwamaila.