Ezekiyeli 9

Bakomba mituni mbubakajaigwa

¹ Lino ndakamvwa Leza kaita ajwi pati cakupozomoka kati, “Leta balindizi bamunzi kuno, umwi aumwi kajisi acilwanyo.” ² Mpawo ndakabona baalumi bali cisambomwe kabazwida kubbazu lyamulyango wakutala, uulangide kunyika, umwi aumwi kajisi cilwanyo cankondo. Ngubakali aawe wakali mwaalumi wakasamide zisani zyandeketela wakajisi azilembyo zyakali mucibuno cakwe. Bakanjila akuzooima kumbali aacipaililo camukuba.

³ Lino bulemu bwa Leza wa Isilayeli bwakaya mujulu kuzwa atala lyabakelebu aawo mpobwakabede, bwakasuntumukila kucikotamino caŋanda ya Mwami Leza. Mpawo Mwami Leza wakaita mwaalumi ooyo wakasamide zisani zyandeketela wakajisi nkomo yazilembyo mucibuno cakwe, ⁴ akuti kulinguwe, “Koya mumunzi wa Jelusalemu woonse, ukabikke cizibyo ankumo zyabaabo akulila akaambo kazintu zyoonse zisesemya zicitwa mulinguwo.”

⁵ Nindakalikuswiilila, wakati kulibamwi, “Amumutobele mukati kamunzi mukabajaye, mutakabeeteleli nokuba kubeengelela. ⁶ Mukajaye bamadaala, bakubusi basankwa abasimbi, bakaintu abana, pele mutakabagumi aabo boonse bajisi cizibyo.” Mukatalikile kubusena bwangu busalala. Nkaako bakatalikila abapati bakaimvwi kumbele lyaŋanda ya Leza.

⁷ Mpawo Mwami Leza wakati kulimbabo, “Amusofwaazye ŋanda, mukazuzye mabbuwa abajaidwe. ‘Kamuya.’” Nkaako bakainka akutalika kujaya bantu mumunzi oonse. ⁸ Lino kabacijaya, mebo ndakalisyeede endikke, ndakavuntama ansi kandoongolola ndakati, “Akaka O Mwami Leza! Sena uyanda kunyonyoona basyeede boonse ba Isilayeli mubukali bwako mbonyemenede munzi wa Jelusalemu?”

⁹ Leza wakandiingula kuti, “Zinyonyoono zyamusyobo wa Isilayeli awa Juda nzipati kapati, nyika izwide bujayi awalo munzi uzwide zintu zitaluleme. Balati, ‘Mwami Leza walekelezya nyika yesu, tazibwene eezi pe.’ ¹⁰ Mwami Leza wakaingula kuti, ‘Nsikoobeetelela nokuba kubaleka buyo, pele ndabasubwida zeezyo nzibakacita beni.’” ¹¹ Mpawo mwaalumi ooyo wakasamide zyandeketela kajisi ankomo yazilembyo kubbazu lyakwe wakaingula kuti, “Ndacita mbubonya mbuli mboolailila.”