Ezekiyeli 8
Cilengaano cabili Zyakukomba mituni mu Jelusalemu
1 Mumwaka wacisambomwe, mumwezi wacisambomwe mubuzuba bwasanu bwamwezi, nindakakkede muŋanda yangu, bapati bacisi ca Juda kabakkede kumbele lyangu, janza lya Mwami Leza lyakandisikila. 2 Ndakabona cintu cili muciimo camuntu. Cintu eeco cakali kuboneka kuti cakali kuyaka mulilo kuzwa mucibuno mane do ansi. Kuzwa mucibuno kuyoosika mujulu cakali kumweka mbuli mukuba uusyobedwe. 3 Wakatandabika cakali kulibonya mbuli janza wakandijata masusu akundinyamuna. Muuya wa Leza wakandinyamuna, kundinyamuna kunditola akati-kati kanyika ajulu, muzilengaano zya Leza wakanditola ku Jelusalemu, kumanjililo aamulyango wakunyika mubbuwa lyamukati ooko kwakaimvwi mutuni uunyemya Leza. 4 Lino ooko kumbele lya Mwami Leza kwakali kulibonya bulemu bwa Leza wa Isilayeli, mbubonya mbuli mucilengaano ncindakabwene mucibanda.
5 Mpawo Mwami Leza wakati kulindime, “Yebo omuntu langa kubbazu lyakunyika. Aboobo ndakalanga, kumanjililo aamulyango wakunyika kuli cipaililo ndakabona mutuni uunyemya Leza.
6 “Yebo omuntu, sena wazibona zintu zisesemya kapati nzyobacita bamusyobo wa Isilayeli kuno? Sena zintu eezi tazikonzyi kundicita kuti nditantamuke kule kuzwa kubusena bwangu busalala? Pele kasimpe ulabona zintu zisesemya kwiinda zeezi.”
7 Kumane wakandileta kumanjililo aabbuwa. Nindakalanga ndakabona bwaanda budonkokede. 8 Leza wakati kulindime, “Yebo omuntu, kosya lino mubwaanda.” Aboobo ndakabbobola bwaanda nkabela ndakabona mulyango aawo. 9 Mpawo Leza wakati kulindime, “Njila ubone bubi azintu zisesemya nzyobacita oomo.”
10 Nkaako ndakanjila akulanga-langa, ndakabona zilembedwe abwaanda boonse bauka bamisyobo-misyobo abanyama basesemya amituni yoonse yamusyobo wa Isilayeli. 11 Kumbele lyazeezi kwakaimvwi bapati bamusyobo wa Isilayeli bali makumi aali ciloba, akati kabaaba kwakali Jaazaniya mwanaa Syafani. Umwi aumwi wakajisi citentelo catununkiliyo, nkabela kwakali kuuntumuka busi bununkilila bwatununkilizyo.
12 Leza wakati kulindime, “Yebo omuntu, sena wabona eeco bapati bamusyobo wa Isilayeli ncobacita mumudima, umwi aumwi kaimvwi kukaanda kamutuni wakwe? Balati, ‘Mwami Leza tatubwene, Mwami Leza wakabisya nyika eeyi.’”
13 Alimwi Leza wakati, “Ulababona kabacita zintu zisesemya kwiinda zeezi.”
14 Mpawo Mwami Leza wakandiboozya kumanjililo aamulyango wakunyika lyaŋanda yakwe, aawo ndakabona bakaintu bakkede kabalila Tamuzi. 15 Leza wakati kulindime, “Yebo omuntu sena ulizibwene zyoonse eezi? Uyoobona zintu zisesemya ziinda zeezi nzyoobona kale.” 16 Musule akooku wakandileta mubbuwa lyamukati lyaŋanda ya Mwami Leza, lino ooko kumanjililo aaŋanda ya Leza akati kakkoce acipaililo, kwakali baalumi bakatisike kumakumi obilo abasanu. Kabafutatilide ŋanda ya Mwami Leza kabalangide kujwe, bakali kukoteme kabakomba zuba kujwe. 17 Leza wakati kulindime, “Sena wacibona eeci yebo omuntu? Sena mbaleke buyo bantu bacisi ca Juda nobacita zintu zisesemya nzyobacita muno? Sena beelede kunoopyopyonganya cisi lyoonse kabandinyemya? Bona mbuli mbobandisampaula cakulikwaya! 18 Nkaako njoobacita mubukali, nsikabeeteleli nokuba kubaleka buyo pe. Nikuba kuti bakandililaukile, nsikabaswiilili pe.”