Ezekiyeli 7
Mamanino aa Isilayeli asika
1 Majwi aa Mwami Leza akandisikila akuti kulindime, 2 “Yebo omuntu mboobu mbwaamba Mwami Leza azyanyika ya Isilayeli. Mamanino! Mamanino asika kumabazu oonse one aanyika. 3 Mamanino amusikila, ndiyanda kumuletela mapenzi. Ndiyanda kumubeteka kweendelana amilimo yanu akumubweedezezya bubi akaambo kabubi boonse mbomucita. 4 Nsikamweeteleli nokuba kumuleka buyo pe, kasimpe njoomubweedezezya zyeelede milimo yanu mibi iisesemya akati kanu. Ndendilyo nomuyooziba kuti ndendime Mwami Leza.”
5 Mboobu mbwaamba Mwami Leza ulati, “Mapenzi! Mapenzi aatamvwidwe alasika. 6 Mamanino asika! Mamanino asika! Aboolela kuzoopenzya ndinywe. Aboola. 7 Lunyonyooko lwamusikila nywebo nobantu banyika eeyi. Ciindi casika, buzuba buli aafwiifwi, kuli lupyopyongano kutali kutangala atala azilundu. 8 Ndiyanda kumutilila bukali bwangu akuzuzikizya kunyema kwangu kulindinywe, ndamubeteka kweendelana amilimo akumubweedezezya bubi akaambo kamilimo yanu iisesemya. 9 Nsikoomweetelela nokuba kumuleka buyo akumubweedezezya bubi kweendelana amilimo yanu iisesemya akati kanu. Ndendilyo nomuyooziba kuti mebo nde Mwami Leza ndime eemuuma.
10 “Kasimpe buzuba bwasika! Bwasika ncobeni! Lunyonyooko lwasika, musako wasyuuka micelo yakulisumpula yafulula! 11 Lupyopyongano lwaba musako wakuti babi basubulwe, taakwe bantu bayoosyaala pe, boonse buyo tabakasyaali noluba lubono lwabo nociba buti ncobajisi. 12 Ciindi casika, buzuba bwasika. Ooyo uuula atasekeleli, naba yooyo uuulisya atausi, nkaambo bukali bulasikila bantu boonse. 13 Taakwe naba omwe sikuuzya uyookkala ciindi cilamfu kuti akapilusye eeco ncaakauzizye, nkaambo bukali bwa Mwami Leza buyandakusikila baabo bacita zibi. Aboobo taakwe naba omwe uyoofutulwa. 14 Nikuba kuti basibe mweembo akulibambilila zintu zyoonse, takwe uuyooinka kunkondo nkaambo mebo ndinyemenede bantu boonse.
Kusubulwa kwa Baisilayeli akaambo kazibi zyabo
15 “Anze kuli nkondo, mukati kuli cuumo anzala, aabo bali muminzi bayoofwa ankondo, aabo bali mumunzi mupati bayoofwa anzala acuumo. 16 Boonse aabo bayoosyaala akutajaigwa bayootijila muzilundu, bayoolila mbuli bulila nziba zyamumakkuti, umwi aumwi uyoopengela zinyonyoono zyakwe. 17 Maboko oonse ayoolebuka maulu oonse ayoogonkelwa. 18 Bayoosama masaka akuyooyoowa kapati. Bayoofwa nsoni ayalo mitwe yabo iyoogelwa. 19 Bayoosowa nsiliva yabo mumigwagwa, ngolida yabo iyooba cintu cisofweede. Nsiliva angolida zyabo tazikakonzyi kuyoobavuna mubuzuba bwabukali bwa Mwami Leza. Tazikakonzyi kubakkutya nikuba kuzuzya mada aabo, nkaambo nzenzizyo zyakabalebya kuti babisye. 20 Bakali kulisumpwida zyatungale twabo tweebesi, batubelesya kupanga mituni yabo iisesemya azikozyanyo zivundausya kumoyo. Nkaako ndiyoocita kuti zintu eezi zikababede cintu cisofweede.
21 “Ndiyoocita kuti zikaabwe akusaalwa abamasi, bantu babi bamunyika bayoozitola, nkabela bayoozisofwaazya. 22 Njoobafutatila, nkabela bayoosofwaazya ŋanda yangu iiyandika, babbi bayoonjila mulinjiyo akwiisofwaazya.
23 “Zintu zyoonse zili mumanyongwe, nyika izwide bajayi alimwi aminzi ili mulupyopyongano. 24 Ndiyooleta bantu babi bamisyobo imwi kuti bazootole maanda aabo, njoolesya baabo balisumpula akaambo kanguzu zyabo, masena aabo aasalala ayoosofwaazigwa. 25 Ziyoosya zyaakubasikila bayooyandaula luumuno, pele tabakalujani. 26 Mapenzi manji ayooboola, mwavwambukila ayoomusikila. Bayooyanda cilengaano kuzwa kumusinsimi, akuyanda njiisyo zyamulawo kuzwa kumupaizi, pele tazikajanwi pe, abalo bapati bayooleka kulailila. 27 Mwami uyoolila, musololi uyootyompwa, maanza aabantu bamunyika ayookankama. Ndiyoobacita mbuli bweelede milimo yabo, njoobabeteka kweendelana anzyobacita. Ndendilyo nebayooziba kuti ndendime Mwami Leza.”