Ezekiyeli 6

Mwami Leza mbwasulide mituni

¹ Majwi aa Mwami Leza akasika kulindime akuti, ² “Yebo omuntu, langa kuzilundu zya Isilayeli, sinsima uzisinganye ³ uti, ‘Nozilundu zya Isilayeli, amuswiilile majwi aa Mwami Leza.’ Mboobu mbwaamba Mwami Leza kwaamba zyazilundu atulundu, kumimpata akumakkuti ulati, ‘Ndiyanda kuleta panga kuti ndizoomulwane, nzoonyonyoone malende aanu. ⁴ Zipaililo zyanu ndizoozimwayaula zipaililo zyanu zyatununkilizyo ndizoozipwayaula alimwi ndiyoojaya bantu banu kumbele lyamituni yanu. ⁵ Ndiyoobikka mitumba ya Baisilayeli kumbele lyamituni yabo, akumwayaula mafuwa aabo munsi aazipaililo zyabo. ⁶ Kufumbwa ooko nkomuyookkala, minzi eeyo iyoonyonyoonwa, malende ayoopwaigwa akoolwa, mituni yanu iyoopwaigwa akunyonyoonwa, zipaililo zyanu ziyoopwaigwa akumwaigwa, azyoonse nzimwakapanga ziyooloba. ⁷ Bantu banu bayoojaigwa akufwida akati kanu, ndendilyo nomuyooziba kuti ndime Mwami Leza.’

⁸ “Pele bamwi njoobaleka, bamwi banu tabakajaigwi ndaakumumwaila akati kazisi abamasi. ⁹ Nkabela muzisi oomo mobayootolwa mubwaange, aabo bayootija bayoondiyeeya, ndakali kuusa kapati akaambo kamyoyo yabo iiyandisya kukomba mituni, cakuti bakandifutatila akutalika kulanga kumituni eeyo njibakali kusukamina. Bayoolisesemwa lwabo beni akaambo kabubi mbubakali kucita amilimo yabo yoonse iisesemya. ¹⁰ Bayooziba kuti ndime Mwami Leza, tiindakali kubakonga buyo kuti ndiyoobaletela mapenzi aaya.”

¹¹ Mboobu mbwaamba Mwami Leza ulati, “Amukambe kamulyata ansi.” Kamuti, “Maawe! Akaambo kabubi amilimo iisesemya iicitwa amusyobo wa Isilayeli, nkaambo bayoojaigwa munkondo, nzala acuumo. ¹² Ooyo uuli kulaale uyoojaigwa acuumo ooyo uuli aafwiifwi uyoojaigwa munkondo, pele ooyo uuyoosyaala akulekwa uyoofwa anzala. Mbombuboobu mbwendiyoocita mubukali bwangu. ¹³ Eelyo bayooziba kuti ndendime Mwami Leza, ciindi bantu baakwaalabana akati kamituni munsi aazipaililo zyabo, mutulundu toonse aatala aazilundu zyoonse munsi aamasamu aavwevwede, mumasena oomo mubali kutenta tununkilizyo twabo kumituni yabo yoonse. ¹⁴ Ndiyoobauma ajanza lyangu akucita kuti nyika yabo ikabule cintu kuzwa kunkanda kuyoosika ku Dibula ooko nkobakkala. Ndendilyo nebayooziba kuti ndendime Mwami Leza.”