Ezekiyeli 10

Bulemu bwa Mwami Leza mbubwakazwa muŋanda ya Leza

¹ Lino ndakalanga, ndakabona zyakali mbuli cuuno cabwami cakabambizigwa mabwe aacijulu-julu atala aamweenya uuvungumene atala aamitwe ya Bakelebu. ² Mwami Leza wakati kumwaalumi ooyo wakasamide zisani zyandeketela, “Koya unjile akati kazikwiliba kunsi lyabakelebu. Bweza makala aamulilo kuzwa akati kabakelebu waamwaile-mwaile mumunzi.” Nkendangilide wakanjila.

³ Lino bakelebu bakaimvwi kubbazu lyakumusanza lyaŋanda ya Leza ciindi mwaalumi ooyo naakanjila, alyalo kkumbi lyakalikuzuzya bbuwa lyamukati. ⁴ Mpoonya bulemu bwa Mwami Leza bwakazwa aawo atala lyabakelebu akuya kucikotamino caŋanda ya Leza. Kkumbi lyakazuzya ŋanda ya Leza eeyo, bbuwa lyakazula kubala kwabulemu bwa Mwami Leza. ⁵ Muzunzumina wamababa aabakelebu wakali kukonzya kumvwigwa nokuba kulaale mbuli kubbuwa lyaanze, wakali mbuli jwi lya Leza Singuzuzyoonse ciindi naambaula.

⁶ Ciindi Mwami Leza naakalailila mwaalumi wakasamide zyandeketela kuti, “Gwisya mulilo akati kazikwiliba uuli akati kabakelebu,” mwaalumi wakanjila akuyooima kumbali acikwiliba. ⁷ Mpoonya umwi wabakelebu wakayokola mulilo ooyo wakali akati kabo. Wakayokolola umwi akuubikka mumaanza amwaalumi ooyo wakasamide zyandeketela, walo wakaubweza akuunka. ⁸ Kunsi amababa aabakelebu kwakali kulibonya cakali kulangika mbuli janza lyamuntu.

⁹ Nindakalanga, ndakabona zikwiliba zyone kumbali abakelebu, munsi aaumwi aumwi kwakali cikwiliba comwe-comwe, zikwiliba eezi zyakali kumweka-mweka mbuli mabwe aamakwalala. ¹⁰ Kwaamba zyabube bwazyo, zyoonse zyone zyakaleelene, zyakajisi zili mbuli mibalo mukati kamibalo. ¹¹ Lino nizyakeenda, zyakali kukonzya kweenda akugama lubazu lomwe lwamabazu one ooko kwakalangide bakelebu, zikwiliba eezi tiizyakali kuleya-leya ciindi bakelebu nibakali kweenda. Bakelebu bakali kukonzya kuunka kufumbwa ooko kwakalangide mitwe yabo, kabataleyi-leyi pe. ¹² Nkabela mibili yabo yoonse, kubikkilizya masule, maanza amababa, zyoonse zyakazwide meso aalo koonse-koonse, mbuli bwakali zikwiliba zyabo zyone. ¹³ Ndakamvwa zikwiliba kaziitwa kuti “Banamutendelele.” ¹⁴ Kelebu omwe-omwe wakajisi masyu one. Busyu butaanzi bwakali bwakelebu, bwabili bwakali bwamuntu, bwatatu bwakali bwasyuumbwa, bwane bwakali bwasikwaze.

¹⁵ Mpawo bakelebu bakanyamuka. Eezi zyakali nzezilenge zipona nzindakabwene kumbali amulonga wa Kebaa. ¹⁶ Bakelebu nibakeenda, zikwiliba zili munsi lyabo azyalo zyakeenda, lino bakelebu nibakababamuna mababa kuti banyamuke ansi, zikwiliba azyalo tiizyakasiya busena bwazyo. ¹⁷ Bakelebu nibakaima, azyalo zyakaima, bakelebu nibakanyamuka, azyalo zyakanyamuka ambabo, nkaambo muuya wazilenge zipona wakali mulinzizyo.

¹⁸ Mpawo bulemu bwa Mwami Leza bwakazwa kucikotamino caŋanda ya Leza akuyooimina atala lyabakelebu. ¹⁹ Lino nkecilangilila, bakelebu bakababamuna mababa aabo akunyamuka kuzwa ansi, nibakeenda, zikwiliba azyalo zyakainka ambabo. Bakaakwiima kumanjililo amulyango uuli kujwe waŋanda ya Mwami Leza, nkabela bulemu bwa Leza wa Isilayeli bwakali atala lyabo. ²⁰ Mbozyakabede oobo zilenge zipona eezyo nzindakabwene kunsi lya Leza wa Isilayeli kumbali aamulonga wa Kebaa, nkabela ndakaziba kuti mbaakelebu. ²¹ Kelebu umwi aumwi wakalijisi masyu one, amababa one, nkabela kunsi lyamababa aabo kwakali cakali kulibonya mbuli janza lyamuntu. ²² Masyu aabo akali kukozyanya aabaabo mbindakabona kumbali aamulonga wa Kebaa. Umwi aumwi wakali kweenda cakululama.