Ezekiyeli 11

Munzi wa Jelusalemu mbuwakasinganyizigwa

¹ Lino Muuya wa Leza wakandinyamuna akundileta kumulyango waŋanda ya Mwami Leza uulangide kujwe. Lino ooko kumanjililo aamulyango kwakali baalumi bali makumi obilo abasanu, akati kabaabo kwakali Jaazaniya mwana wa Azu a Pelatiya mwanaa Benaiya, basololi babantu. ² Mwami Leza wakandaambila kuti, “Yebo omuntu, aaba mbebantu bakanza zintu zibi akupa malailile mabi kubantu bamumunzi ooyu. ³ Balati, ‘Sena ciindi cakuyaka maanda tacili afwiifwi? Munzi ooyu ncibiya cibila, swebo twaba nenyama.’ ⁴ Nkaako sinsima zyamapenzi aabo, sinsima, yebo omuntu.”

⁵ Mpawo Muuya wa Mwami Leza wakandisikila akundaambila kuti, “Mboobu mbwaamba Mwami Leza ulati, ‘Mbombuboobu mbomwaamba nomusyobo wa Isilayeli, pele ndilizi azyoonse nzyomuyeeya.’ ⁶ Mwakajaya bantu banji mumunzi ooyu, mwakazuzya migwagwa yawo abajaidwe.

⁷ “Nkaako mboobu mbwaamba Mwami Leza ulati, ⁸ ‘Mitumba eeyo njomwakasowa, njenyama, nkabela munzi ooyu ncecibiya, pele kwamana ndamutanda mulinguwo. ⁹ Muyoowa apanga, tee ndendiyooleta kuzoolwana, mbwaamba Mwami Leza. ¹⁰ Njoomutanda mumunzi ooyu akuyoomwaaba kubazwamasi akuyoomupa cisubulo. ¹¹ Muyoojaigwa munkondo, njoomubeteka kuminyinza ya Isilayeli. ¹² Ndendilyo nemuyooziba kuti ndendime Mwami Leza, nkaambo tiimwakatobela mbeta zyangu nokuba kubamba milawo yangu, pele mwakatobela ziyanza zyamisyobo njomubambene limwi.’”

¹³ Lino kandicisinsima, Pelatiya mwanaa Benaiya wakafwa. Mpawo ndakavuntama ansi akupozomoka ajwi pati, ndakati, “O Mwami Leza! Sena ulabanyonyweeda limwi basyeede boonse ba Isilayeli?”

Leza mbwaakasyomezya baange

¹⁴ Majwi aa Mwami Leza akandisikila akuti, ¹⁵ “Yebo omuntu, bana bokwanu, iiyi, bana bokwanu beni bali mbaluzubo lwako antoomwe abamusyobo woonse wa Isilayeli, aabo bantu bamu Jelusalemu mbobati, ‘Bali kulaale a Mwami Leza, twakapegwa nyika eeyi kuti ibe lukono lwesu.’”

¹⁶ Nkaako baambile kuti, “Mboobu mbwaamba Mwami Leza ulati, ‘Nikuba kuti ndakabatanda kuti bakkale abamasi akubamwaisya akati kazisi zimbi, nikuba boobo mukaindi kaniini buyo ndiyooba aambabo muzisi oomo mobabede.’”

¹⁷ Nkaako baambile kuti, “Mboobu mbwaamba Mwami Leza ulati, ‘Njoomuyobolola akati kabamasi akumuleta kuzwa muzisi oomo mumwakamwaikilide, ndiyoomupa nyika ya Isilayeli alimwi.’” ¹⁸ Bayoopilukila kunyika yabo, nkabela bayoogwisya zikozyanyo zyoonse zivundausya kumoyo amituni iisesemya. ¹⁹ Ndiyoobapa moyo omwe akubapa muuya mupya, njoogwisya moyo wabbwe akubapa moyo wabuntu. ²⁰ Ndendilyo nebayootobela mbeta zyangu, alimwi nebayoocenjela akubamba milawo yangu. Bayooba bantu bangu ambebo ndiyooba Leza wabo. ²¹ Pele aabo balipede mukukomba zikozyanyo zivundausya kumoyo amituni yabo iisesemya, njoobasubula akaambo kazeezyo nzyobacita, mbwaamba Mwami Leza.

Bulemu bwa Leza mbubwakazwa mu Jelusalemu

²² Mpawo bakelebu azikwiliba zyabo kazili munsi lyabo, bakababamuna mababa aabo, bulemu bwa Leza wa Isilayeli bwakali atala lyabo. ²³ Lino bulemu bwa Mwami Leza bwakanyamuka mumunzi bwazwa bwaakukkalila kucilundu cili kujwe lyamunzi. ²⁴ Muuya wa Leza wakandinyamuna akundileta kubaange bakali mu Babuloni, mucilengaano eeco ncindakapegwa a Muuya wa Leza.

Kumane cilengaano eeco ncindakabwene cakainka kujulu, ²⁵ nkabela ndakaambila baange zintu zyoonse eezyo Mwami Leza nzyaakanditondezya.