Ezekiyeli 12
Citondezyo cakulibambila kuya mubwaange
1 Lino majwi aa Mwami Leza akandisikila akuti, 2 “Yebo omuntu, ukkede aabantu bazangi. Balijisi meso, pele tababoni, balijisi matwi, pele tabamvwi, nkaambo mbantu bazangide.
3 “Nkaako yebo omuntu, angaanga twako kulibambilila kuzwa kalitwa mwaaba, kabakulangilide, ukanyamuke akuunka kubusena bumbi. Ambweni bayooziba nikuba kuti mbantu bazangide. 4 Lyanootwa mwaaba, kabalangilide ukagwisye zintu zyako akulibambila kuunka. Kumangolezya, banoolangilide ukanyamuke ukaunke mbuli baabo batolwa mubwaange. 5 Kabalangilide, ukadonkole mubwaanda eelyo ukagwisizye mpawo zintu zyako. 6 Ukazikulike balo kabalangilide akuzitola ciindi calubundu-bundu. Livumbe kumeso kutegwa utaboni nyika, nkaambo ndakucita citondezyo kumusyobo wa Isilayeli.”
7 Aboobo ndakacita mbuli mbundakalaililwa. Sikati ndakagwisya zintu zyangu kulibambilila kuunka. Nikwakaba kumangolezya ndakafumba akudonkola bwaanda amaanza aangu. Ndakabweza zintu zyangu kulubundu-bundu ndakazikulika amakuko balo kabalangilide.
8 Lino nibwakaca, majwi aa Mwami Leza akandisikila akuti, 9 “Yebo omuntu sena musyobo wa Isilayeli muzangi tiiwakakubuzya kuti, ‘Ino ucita nzi?’ 10 Baambile kuti, mboobu mbwaamba Mwami Leza ulati, ‘Makani ajatikizya muleli wacisi ca Jelusalemu abaabo bakkala mumo. 11 Baambile kuti ndime citondezyo kulindinywe. Mbubonya mbuli mbundacita mbociyooba oobo akulindinywe. Mulatolwa mubwaange.’
12 “Muleli uubeendelezya uyookulika zintu zyakwe kulubundu-bundu akuyooinka, bayoomudonkweda mubwaanda mpayooinda. Uyoolivumba kumeso kutegwa atakaboni nyika. 13 Ndiyoomuteya nkabela uyoocegwa mukakole kangu, njoomuleta ku Babuloni, nyika ya Bakalodiya, pele takaiboni pe nkonkuko nkwayoofwida. 14 Boonse aabo bamutobela njoobamwaisya mumabazu oonse, balupati-pati bakwe ampi zyakwe zyoonse, akubatandaanya apanga lisomwedwe.
15 “Bayooziba kuti ndime Mwami Leza ndaakubamwaisya akati kabamasi akubamwaisya muzisi. 16 Pele njoosiya bamwi bace buyo kuti batakajaigwi munkondo, nzala acuumo kutegwa muzisi oomo mobayooinka bakabone zisesemyo zyoonse nzyobacita.”
Citondezyo camusinsimi uukankama
17 Majwi aa Mwami Leza akandisikila akuti, 18 “Yebo omuntu, kokankama ciindi nolya cilyo cako, kozyangama cakuyoowa ciindi nonywa maanzi aako. 19 Ambila bantu bamucisi kuti, ‘Mboobu mbwaamba Mwami Leza azyabaabo bakkala mu Jelusalemu amunyika ya Isilayeli’ ulati, ‘Bayoolya zilyo zyabo cakulibilika akunywa maanzi cakutyompwa, nkaambo zyoonse zili munyika ziyoogwisigwa akaambo kalupyopyongano lwaboonse bakkala mumo. 20 Minzi eeyo iijisi bantu iyooba matongo, nyika iyoosyaala buyo. Ndendilyo nemuyooziba kuti ndendime Mwami Leza.’”
Majwi aa Leza ayoozuzikizigwa
21 Majwi aa Mwami Leza akandisikila akuti, 22 “Yebo omuntu, ino nkasimpi nzi aako nkomujisi munyika ya Isilayeli nomuti, ‘Mazuba alainda pele zilengaano tazizuzikizigwi?’ 23 Baambile kuti, ‘Mboobu mbwaamba Mwami Leza’ ulati, ‘Ndiyanda kuti nkalesye kasimpi aaka, nkabela tabaciyookaambi limbi mu Isilayeli.’ Baambile kuti mazuba ali aafwiifwi zilengaano zyoonse noziyoozuzikizigwa. 24 Kunooyoocinyina zilengaano zyakubeja akusonda kwakwiide kulabalika. 25 Pele mebo nde Mwami Leza njooamba eeco ncenjanda, nkabela ciyoozuzikizigwa kakunyina akutola ciindi pe. Mumazuba aanu, nywebo nomusyobo muzangi, njoozuzikizya kufumbwa eeco ncendaamba, mbwaamba Mwami Leza.”
26 Majwi aa Mwami Leza akandisikila akuti, 27 “Yebo omuntu, musyobo wa Isilayeli ulati, ‘Cilengaano ncabona ncanyika iiza kumbele ooku, usinsima zyamazuba aayooboola.’”
28 Nkaako baambile kuti, “Mboobu mbwaamba Mwami Leza, ulati, ‘Majwi aangu taakoomuka kucitika pe, zyoonse nzendaamba zilazuzikizigwa, mbwaamba Mwami Leza.’”