Ezekiyeli 13

Basinsimi babeji mbubakasinganyizigwa

¹ Majwi aa Mwami Leza akandisikila akuti, ² “Yebo omuntu, bakazye basinsimi ba Isilayeli aabo basinsima zyamanjezeezya aabo beni, ubaambile kuti, ‘Amuswiilile majwi aa Mwami Leza.’” ³ Mboobu mbwaamba Mwami Leza ulati, “Maawe kubasinsimi bafuba-fuba batobela manjezeezya aabo beni, batakwe ancobabona.” ⁴ Basinsimi bako O Isilayeli bali mbuli bamwaaba mumatongo. ⁵ Tiibakainka kuti kabasinka bwaanda mubwakakolomokede alimwi tababuyakululi kutegwa kabuli buyumu, nkaambo Baisilayeli tabakonzyi kulikwabilila mubuzuba bwankondo ya Mwami Leza. ⁶ Zilengaano zyabo nzyabuyo, akusonda kwabo nkwakubeja. Balati, “Mboobu mbwaamba Mwami Leza.” Kakuli Mwami Leza taakabatuma pele balalangila kuti majwi aabo azuzikizigwe. ⁷ Sena tamuboni zilengaano zyakubeja akwaamba zyakusonda kwakubeja nomuti, “Mboobu mbwaamba Mwami Leza.” Nokuba kuti endime ndaamba?

⁸ Nkaako mboobu mbwaamba Mwami Leza ulati, “Akaambo kamajwi aanu aakubeja azilengaano zyakubeja, nsimuyandi pe, mbwaamba Mwami Leza. ⁹ Ndiyoobalwana basinsimi aabo babona zilengaano zyakubeja abasonda akwaamba zyakubeja. Tabakabi bankamu yabantu bangu nokuba kulembwa mumabbuku aamusyobo wa Isilayeli, alimwi tabakanjili munyika ya Isilayeli. Ndendilyo nemuyooziba kuti ndendime Mwami Leza.”

¹⁰ Mukuti basowa bantu bangu nobati, “Kuli luumuno,” kakuli taakwe luumuno akuti nobayaka bwaanda butakwe ankobuya balabusyingulula amulambo uutuba, ¹¹ nkaako baambile aabo babusyingulula amulambo uutuba kuti bulawa. Mvula yafwipi-fwipi iyooboola, nkabela njootumina acivulamabwe ciyoombulumuka, kuyooba guwo liyoobbubbulisya. ¹² Bwaanda bwaakuwa, sena bantu tabakamubuzyi kuti, “Ino uli kuli mulambo ooyo ngumwakabusyinguluzya?”

¹³ Nkaako mboobu mbwaamba Mwami Leza ulati, “Mubukali bwangu njoolekela guwo kkali, mukunyema kwangu, njoolekela civulamabwe amvula yafwipi-fwipi iyoowa cakunyonyoona kapati. ¹⁴ Njoomwayaula bwaanda oobo mbumwakasyingulula mulambo uutuba, njooboola cakuti bukabambasale antalisyo zyabo zikasyaale buyo mbuboobu. Bwaakuwa anywebo muyoonyonyookela mukati, ndendilyo nomuyooziba kuti ndendime Mwami Leza. ¹⁵ Bukali bwangu buyoobukila abwaanda oobo ali baabo bakabusyingulula mulambo. Njoomwaambila kuti, ‘Bwaanda booleka akulimba abaabo bakabusyingulula mulambo. ¹⁶ Aabo basinsimi ba Isilayeli bakasinsimina mu Jelusalemu akubona zilengaano zyaluumuno kakuli kunyina aluumuno, mbwaamba Mwami Leza.’”

Majwi aakusinganya basinsimi bakaintu

¹⁷ Lino yebo omuntu, langa bantu bako aabo basinsima manjezeezya aabo ubaambile kuti, ¹⁸ Mboobu mbwaamba Mwami Leza ulati, “Maawe kubakaintu aabo basuma mifuko kumaboko aabo oonse, basuma ziduku zya masani malamfu aaindene-indene kumitwe kutegwa kamuteya bantu. Sena muyeeya kuti mulateya buyo bantu kwamana nywebo kamuli kabotu? ¹⁹ Mwakandisampaula akati kabantu bangu akaambo kamaila mace atufwefwelenga twatunkwa. Kamubejela bantu bangu, aabo baswiilila zyakubeja kwanu, mwakajaya baabo batakeelede kujaigwa, akuleka baabo bateelede kunoocipona.”

²⁰ Nkaako mboobu mbwaamba Mwami Leza ulati, “Nsiyandi mifuko yanu eeyo njomuteya bantu bangu mbuli bayuni, nzooikwamauna kumaboko, nzoobaangununa bantu aabo mbomuteya mbuli bayuni. ²¹ Ndizoozapaula masani aanu akuvuna bantu bangu kuzwa kulindinywe, tamuciyoobapenzyi limbi, ndendilyo nomuyooziba kuti ndendime Mwami Leza. ²² Nkaambo kakuti mwakatyompya baluleme akaambo kakubeja kwanu, kakuli mebo tiindakabausya nsoni, akuti mwayumya-yumya babi kuti batasiyi nzila zyabo zibi kutegwa kabacipona, ²³ nkaako tamuciyooboni limbi zilengaano zyakubeja nokuba kusonda. Njoovuna bantu bangu kuzwa kulindinywe. Ndendilyo nomuyooziba kuti ndendime Mwami Leza.”