Ezekiyeli 14
Leza mbwaakasinganya kukomba mituni
1 Lino bapati ba Baisilayeli bamwi bakaboola kulindime akuzookkala kumbele lyangu. 2 Mpawo majwi aa Mwami Leza akandisikila akuti, 3 “Yebo omuntu baalumi aaba ncobabikkide kumyoyo yabo mmituni yalo, balibikkila zilebyo kumbele lyabo. Sena ndibalekele babuzye-buzye kulindime?” 4 Nkaako kanana kulimbabo ubaambile kuti, “Mboobu mbwaamba Mwami Leza ulati, ‘Kufumbwa Muisilayeli uubikka mituni kumoyo wakwe akubikka cilebyo cibi kumbele lyakwe, kwamana wainka kumusinsimi kuyoobuzya-buzya, mebo lwangu nde Mwami Leza njoomwiingula kweendelana abukombi bwakwe bupati bwamituni. 5 Njoocita boobu kuti ndiboozye myoyo yabantu ba Isilayeli, aabo boonse bakandisiya akaambo kamituni yabo.’
6 “Nkaako ambila musyobo wa Isilayeli kuti, mboobu mbwaamba Mwami Leza ulati, ‘Amweempe! Amufutatile mituni yanu, amusampaule milimo yanu yoonse iisesemya.’
7 “Kufumbwa Muisilayeli naba muzwakule uukkala mu Isilayeli uulizandula kuzwa kulinduwe akubikka moyo wakwe kumituni akubikka cilebyo cibi kumbele lyakwe, kwamana wainka kumusinsimi kuyoobuzya-buzya zyandime, mebo lwangu nde Mwami Leza ndiyoomwiingula. 8 Mebo lwangu njoomulwana muntu ooyo, uyooba citondezyo akasimi. Njoomugwisya akati kabantu bangu. Ndendilyo nemuyooziba kuti ndime Mwami Leza.
9 “Kuti naa musinsimi wakombelezegwa kuti asinsime, mebo lwangu nde Mwami Leza ndacita musinsimi ooyo kuti aambe zyakubeja, ndamana mebo lwangu ndamulwana akumunyonyoona kuzwa kubantu bangu. 10 Babuzya-buzya bayoopegwa mulandu wabo, abalo basinsimi bayoopegwa mulandu mbubonya mbuli mbabo. 11 Kuzwa waawo bantu ba Isilayeli tabakandisiyi limbi, nokuba kulisofwaazya lwabo muzinyonyoono zyabo. Bayooba bantu bangu ambebo ndiyooba Leza wabo, mbwaamba Mwami Leza.”
Muntu amuntu uyoofwida zyakwe
12 Majwi aa Mwami Leza akandisikila, 13 “Yebo omuntu, naa musyobo wandibisizya kwiindila mukutasyomeka, ndamana ndatandabika janza lyangu kuti ntapi zyakulya kutegwa kube nzala, kuti ndati ndijaye bantu bawo kwiindila mukubalumya banyama, 14 nikuba kuti baalumi aaba botatwe Nowa, Daniyeli a Jobo kabali mulinguwo, baalumi aaba nibalifutula buyo lwabo beni akaambo kabululami bwabo, mbwaamba Mwami Leza.
15 “Naa ndatuma banyama bamusokwe mucisi eeco coonse, bayoonyonyoona zyoonse cakuti cisi casyaala buyo kakutakwe muntu uukonzya kwiinda oomo akaambo kabanyama. 16 Masimpe nikuba kuti baalumi aaba kabali mulincico, mbuli mbwendi muumi, mbwaamba Mwami Leza, tiibali kunookonzya kucivuna. Tiibali kukonzya nikuba kuvuna bana babo balombe nobaba basimbi. Balo balikke mbindali kunookonzya kuvuna, pele nyika niyanyonyoonwa.
17 “Naa kuti ndaleta bamwi kuti bazoolwane cisi eeco akuti, ‘Nkeyanda kuti nkondo ivumpe cisi eeci, akujaya bantu baco abanyama babo,’ 18 masimpe nikuba kuti baalumi botatwe aaba bakali mulincico, tiibali kunookonzya kucivuna, nikuba kuvuna bana babo balombe nobaba basimbi. Balo balikke mbendali kunookonzya kuvuna. Nyika lwayo niyanyonyoonwa.
19 “Cimwi ciindi ndatuma cuumo mucisi eeco akutondezya bukali bwangu bwakunyonyoona bantu abanyama antoomwe. 20 Masimpe nikuba kuti ba Nowa, Daniyeli a Jobo kabali mulincico, nibatakonzya kufutula bana babo balombe nobaba basimbi. Nibakalifutula buyo akaambo kabululami bwabo beni. Mbwaamba Mwami Leza.”
21 Mboobu mbwaamba Mwami Leza ulati, “Kasimpe ciyoobija kapati ndaakutuma mbeta zyangu zyone ziyoosya kumunzi wa Jelusalemu nkokuti nkondo, nzala banyama babutambo acuumo, kuti zijaye bantu bawo abanyama babo. 22 Nikuba boobo bamwi bayoosyaala bana balombe abasimbi bayoozwa mulinguwo. Bayooboola kulindinywe, nkabela mwaakubona bukkale bwabo amilimo yabo, muyooyumizigwa akuluba mapenzi aayo ngindakaletede kumunzi wa Jelusalemu, nkokuti mapenzi ngindakaleta kulinguwo. 23 Ziyootontozya myoyo yanu mwaakubona bana aabo mbobakkala azeezyo nzyobacita, aawo muyooziba kuti tiindakamucitila zyoonse eezi kakutakwe kaambo.” Mbwaamba Mwami Leza.