Ezekiyeli 15

Munzi wa Jelusalemu uli mbuli musaansa mubi

¹ Majwi aa Mwami Leza akandisikila akuti, ² “Yebo omuntu, ino kasamu kamusaansa inga kabota buti kwiinda tutabi tuli toonse twamusaansa wamusokwe? ³ Sena kuli tusamu tutemwa kuli nguwo tubelesegwa mulimo umwi twatemwa? Sena mpanda zyato nzyakwaanzikila zintu? ⁴ Pele twamana kutemwa buyo, tulaumpwa mumulilo, mpela zyato zyamana kupya tulatentwa ampotuli akati, ‘Sena tulakonzya kubelesegwa cimwi cintu? ⁵ Kuti naa tiitwali kukonzya kubelesegwa nitwacili kabotu, ino inga twabelesegwa buti twamana kupya akuba twe?’”

⁶ Nkaako mboobu mbwaamba Mwami Leza ulati, “Mbubonya mbuli mbundakapa zisamu zyamusaansa akati kamisamu yamusokwe kuti zibe nkuni zyamulilo, mbubonya oobo mbweenjoobacita bantu bakkala mu Jelusalemu. ⁷ Njoobasubula ncobeni. Nikuba kuti bakatije mulilo, pele uyoobatenta. Aawo muyooziba kuti ndime mebo nde Mwami Leza, ndakabasubula. ⁸ Njoocita kuti nyika ikasyaale buyo, nkaambo tiibali kusyomeka, mbwaamba Mwami Leza.”