Ezekiyeli 16
Bamu Jelusalemu mbobatasyomeki
1 Majwi aa Mwami Leza akandisikila akuti, 2 “Yebo omuntu koya ukazibye munzi wa Jelusalemu zyazisesemyo zyawo 3 ukati, mboobu Mwami Leza mbwaambila munzi wa Jelusalemu ulati, ‘Wakazyalilwa munyika ya Bakenani, uso wakali Muamoli, banyoko bakali Bahiti. 4 Mubuzuba mbookazyalwa lukombo-kombo lwako tiilwakakosolwa, alimwi tookasanzigwa kuti usalale, tookacubwa munyo nokuba kuvungailwa mucisani. 5 Taakwe muntu naba omwe wakakweetelela nokuba kukubeda aankumbu kuti akucitile zintu eezi zyoonse. Pele wakasowegwa buyo musokwe, nkaambo mubuzuba mbookazyalwa wakasampulwa.’
6 “Nkabela ndakainda ooko nkookabede ndakabona kogwalaya mubulowa eelyo kocilede mubulowa ndakati kulinduwe ‘Kopona!’ 7 Ndakakucita kuti ube mbuli kasyango kamusokwe. Wakakomena akusima akuba kabwe kabotu kakwizingene. Wakabbubbuzya nkolo, masusu akalampa, nikuba boobo wakali kweenda buyo acinswe kotasamide. 8 ‘Lino nindakainda alimwi, nindakakulanga ndakabona kuti wasika muciimo cakukwata, ndakakuvumba ajansi lyangu kutegwa ndivumbe cinswe cako. Ndakakukonkezya akupangana cizuminano anduwe, mbwaamba Mwami Leza, aawo wakaba wangu.’
9 “Ndakakusanzya amaanzi akusanzya bulowa bwakagagatide alinduwe, akukunanika mafuta. 10 Ndakakusamika cisani cicekawidwe akukusamika ndyasyo zyacikutu. Ndakakupa zisani zyandeketela zisani zidula kapati. 11 Ndakakusakatizya atubwe tweebesi. Ndakakusamika nkaya kumaboko, akawenge munsingo, 12 ndakakubikka kasita mumpemo atunkwinta-nkwinta, amusini mubotu kumutwe. 13 Mbombubo oobo mbookabotezegwa angolida, ansiliva. Zisani zyako zyakali zyandeketela zyakali kudula kapati alimwi kazicekawidwe. Zyakulya zyakali busu bunante, buci amafuta aaoliva. Wakali kweebeka cakuti wakeelela kuba mwami mukaintu. 14 Mpuwo yako mbotu yakamwaika akati kabamasi akaambo kakweebeka kwako, nkaambo bulemu mbundakakupa bwakacita kuti uboneke kabotu, mbwaamba Mwami Leza.
15 “Pele wakasyoma bweebesi bwako akutalika kubelesya mpuwo yako mbotu mubuvuule. Wakaba syacipabeenda akaambo kabwaamu. 16 Wakabweza zisani zyako zimwi kuti ubotye busena bwamalende oomo mooli kucitila buvuule. Zintu eezi tiizyakeelede kucitwa, alimwi tazyeelede kucitwa. 17 Umane wakabweza tubwe tweebesi kapati ooto ntwindakakupa, wakabweza ngolida ansiliva zyangu akuzibumbya mituni misankwa akutalika kuvuula anjiyo. 18 Wakabweza zisani zyako zicekawidwe akuzivumba, wakatuula mafuta aangu atununkilizyo kumbele lyayo. 19 Wakacita mbubonya akuli zyakulya nzindakakupa, busu bunante, amafuta aaoliva abuci kuti uzilye, pele yebo wakazibuula mbuli tununkilizyo kumbele lyayo. Ncenciceeci cakacitika, mbwaamba Mwami Leza.
20 “Wakatola bana bako balombe abasimbi aabo mbookandizyalila akubapaizya kuti babe cilyo camituni. Sena tookalamwa abuvuule bwako? 21 Wakajaya bana bangu akubapaizya kumituni. 22 Mumilimo yako yoonse iisesemya amubuvuule bwako tookayeeya mazuba abukubusi bwako, nookali kweenda aacinswe, kogwalaya mubulowa bwako.
23 “Maawe, maawe kulinduwe, mbwaamba Mwami Leza. Kuyungizya kuzinyonyoono zimwi, 24 wakaliyakila citantaala akupanga kaanda kumalende muzisambalilo zyoonse. 25 Kumagolelo aamugwagwa uuli woonse wakayaka kaanda kamalende akuubaula bweebesi bwako, kwiindilizya busyacipabeenda kubantu boonse. 26 Wakavuula a Baijipiti basibwaamunyoko mbobambene aabo akundinyemya mubuvuule bwako oobo mbooindilizya. 27 Nkaako ndakakulwana akucesya nyika yako, ndakakwaaba kuli basinkondonyoko bantu bacisi ca Bafilisiti, aabo bakagambwa akaambo kazisapi zyako. 28 Wakavuula a Baasiliya, nkaambo tolamwi, nikuba boobo tookamvwa pe. 29 Wakaindilila mubuvuule bwako cakuti wakatalika abaku Babuloni, nyika yabasimakwebo bamato, nokuba boobo ino, tookamvwa pe.
30 “Uli muntu uusukeme kapati, mbwaamba Mwami Leza, mukucita zintu zyoonse eezi, ucita mbuli muvuule wabavuule. 31 Nookayaka zitantaala kumagolelo aamugwagwa umwi aumwi akupanga twaanda twamalende muzisambalilo zyoonse, tookali mbuli muvuule mukuti wakali kukaka kubbadelwa.
32 “Yebo omukaintu mwaamu! Uyandisya beenzu kwiinda mulumi wako! 33 Muvuule uuli woonse ulatambula mali, pele yebo nduwe oopa bayandwa bako boonse zipego, kuti ubape masinkamulomo baboole kulinduwe kuzoovuula kuzwa kumabazu oonse. 34 Mubuvuule bwako yebo toendi mbuli bakaintunyoko pe, kayi taakwe uuboola kulinduwe. Nduwe ooya kulimbabo, nkaambo nduwe oobbadela, kwamana yebo tobbadelwi pe.”
Lubeta lwa Leza kumunzi wa Jelusalemu
35 “Nkaako yebo omuvuule swiilila majwi aa Mwami Leza. 36 Mboobu mbwaamba Mwami Leza ulati, ‘Nkaambo kakuti wakakuna lubono lwako akutondezya cinswe cako mubuvuule bwako abayandwa bako, akaambo kamituni yako iisesemya amukuti wakabapaizizya bulowa bwabana bako,’ 37 nkaako njooyobolola bayandwa bako aabo mbolibotezya ambabo, aabo mbooli kuyanda antoomwe abaabo mboosulaikide. Njoobayobolola kuti bazookusamunune kumbele lyabo, boonse bayoobona cinswe cako. 38 Njookupa cisubulo ceelede bakaintu bacita bumambe, bakatila bulowa, njookuboozezya mulandu wabulowa bwakatika mubukali amukunyema kwangu. 39 Eelyo njookwaaba kubayandwa bako, nkabela bayoomwayaula zitantaala zyako akunyonyoona twaanda twako twamalende. Bayookusamununa zisani akutola tubwe twako tweebesi akukusiya buyo acinswe. 40 Bayooboola ankamu yabantu kuzookulwana, balo bayookuuma mabwe akukukosoola amapanga aabo. 41 Bayootenta maanda aako akuyookupa cisubulo kumbele lyabakaintu banji. Njoolesya buvuule bwako, nkabela tociyoobbadeli limbi bayandwa bako. 42 Ndendilyo bukali bwangu kulinduwe nobuyootooka, njooleka kukunyemena kapati, njootontobala, nsikoonooyoocinyemede.
43 “Akaambo kakuti tookayeeya mazuba abukubusi bwako, pele wakandinyemya azintu zyoonse eezi, njookuboozezya zyoonse nzyookacita, mbwaamba Mwami Leza. Sena tookayungizya zisapi kuzisesemyo zyoonse nzyookacita?”
Mwana musimbi uba mbuli banyina
44 Boonse aabo babelesya tusimpi, bayoobelesya kasimpi aaka kulinduwe kuti, “Mbuli banyina, mbuli mwana.” 45 Yebo kasimpe ukozya banyoko, bakasampaula mulumi wabo abana bakwe, alimwi kasimpe uli mbuli bana bokwanu basimbi aabo bakasampaula balumi abana babo. Banyoko bakali Bahiti, uso wakali Muamoli. 46 Mupati wako mukaintu wakali Samaliya ooyo wakali kukkala kulubazu lwakunyika abana bakwe basimbi, musyoonto wako musimbi wakali kukkala ku musanza abana bakwe basimbi ngu Sodomu. 47 Tookeenda munzila zyabo buyo akucita milimo iisesemya, pele munzila zyako zyoonse wakabisya kwiinda mbabo. 48 Kasimpe mbuli mbwendi muumi, mbwaamba Mwami Leza, musyoonto wako Sodomu abana bakwe basimbi tiibakacita zyeezyo yebo abana bako basimbi nzyomwakacita.
49 “Lino nceeci cinyonyoono musyoonto wako Sodomu ncaakacita walo abana bakwe basimbi bakali basikasampu-sampu, bakali kulidomenena kabatakwe makani, tiibakali kugwasya bacete abapengede. 50 Bakali kulibikka aantu akucita zintu zisesemya kumbele lyangu. Nkaako ndakabakaka mbubonya mbuli mbolibwenene. 51 Samaliya taakacita nociba cisela cazinyonyoono yebo nzyookacita pe. Wakacita azintu zinji zisesemya kwiinda mbabo, akucita bana bokwanu kuti balibonye mbuli kuti bakaliluleme kweelanya zintu zyoonse eezi nzyookacita. 52 Weelede kusampuka, nkaako wacita kuti bana bokwanu babe baluleme. Lino mukuti yebo wakabisya kapati kwiinda mbabo, balo balibonya kuti baliluleme kwiinda nduwe. Lino kofwa nsoni, uuse, nkaambo wacita bana bokwanu kuti balibonye mbuli kuti baliluleme.”
Sodomu a Samaliya bayooboozegwa
53 “Nikuba boobo, njooboozya coolwe ca Sodomu abana bakwe basimbi acoolwe ca Samaliya abana bakwe basimbi antoomwe acoolwe cako, 54 kutegwa ukafwe nsoni, ukause akaambo kakuumbilizya ooko nkookali kubacitila. 55 Bana bokwanu Sodomu antoomwe abana bakwe a Samaliya antoomwe abana bakwe basimbi, bayoopilukila ooko nkubakakkede kusaanguna, aboobo ayebo abana bako basimbi muyoopilukila ooko nkumwakali kukkala kusaanguna. 56 Mubuzuba bwakubotelwa oobo tokooyoambaula azya Sodomu mwanookwanu 57 bubi bwako kabutanayubununwa. Ono bantu baku Edomu balakusampaula antoomwe ambobabambene limwi abantu bamu Filisiti, kasimpe boonse balakusampaula. 58 Uyoosubulwa akaambo kazisapi zyako amilimo yako iisesemya, mbwaamba Mwami Leza.
59 “Mboobu mbwaamba Mwami Leza ulati, ‘Njookucita bweelede, nkaambo wakasampaula cikonkezyo cangu kwiindila mukutyola cizuminano cangu, 60 nikuba boobo njooyeeya cizuminano eeco ncindakapanga anduwe mumazuba aabukubusi bwako, nkaako njoopanga cizuminano citamani anduwe. 61 Lino uyooyeeya nzila zyako, nkabela uyoousa waakutambula bana bokwanu, boonse bapati abasyoonto bako. Njoocita kuti babe mbuli bana bako basimbi, pele kutali kuti ndapanga mukweendelana acizuminano nceyoopanga anduwe. 62 Mbombuboobu mbwendiyoopanga cizuminano anduwe, eelyo uyooziba kuti ndendime Mwami Leza. 63 Ndaakukulekelela zyoonse eezi nzyookacita, uyooyeeya akufwa nsoni, wamana tociyookaambi limbi akaambo kamause aako, mbwaamba Mwami Leza.’”