Ezekiyeli 17
Cikozyanyo casikwaze amusaansa
1 Majwi aa Mwami Leza akandisikila akuti, 2 “Yebo omuntu, labika kalabi akwaambila bamusyobo wa Isilayeli cikozyanyo. 3 Baambile kuti, mboobu mbwaamba Mwami Leza, ulati, ‘Sikwaze mupati wamababa aanguzu malamfu aababamukide aajisi mapepe aamisyobo-misyobo wakasika ku Lebanoni. Wakajata mpela yamulombe, 4 wakatyola mpela yantembwaani yamusamu ooyu akwiitola kunyika yabantu basambazi, waakwiisyangila mumunzi wabasimakwebo. 5 Wakabweza mbuto zimwi zyamunyika yako akuyoosyanga munyika yambolezi. Wakaisyanga yakaba mbuli mukumbuzu kumbali aamaanzi manji, 6 wakasyuuka akuba samu fwiifwi, wakavwevwela mbuli musaansa. Mitabi yawo yakalangide kuli sikwaze, pele miyanda yawo yakalisimpide kunsi. Nkaako samu eelyo lyakaba musaansa akuba aamitabi akumena matu.’
7 “Kumane kwakali sikwaze umwi mupati wamababa mapati, amapepe manji. Lino musamu wamusaansa ooyo wakamena miyanda yakalanzya kuli sikwaze ooyo kuzwa waawo mpuwakasyangidwe. Mitabi yamusaansa ooyo yakalanga kulisikwaze kuti kaitilila maanzi. 8 Wakasyangidwe muvu bbotu kumbali amaanzi manji kutegwa ube aamitabi, uzyale micelo akuba musamu wabulemu.
9 “Baambile kuti, ‘Mboobu mbwaamba Mwami Leza’ ulati, ‘Sena ulakomena kabotu?’ Sena tuukoozyulwa asikwaze wakusaanguna uulya? Akucelwa micelo yawo kuti uyume? Tulelema twawo toonse tulayuma. Takukayandiki muntu wangu nobaba bantu banji kuti bauzyule. 10 Nikuba kuti uzyulwe akuzikkilwa ambi, sena ulakomena kabotu? Sena tuukooyumina limwi ciindi waumpwa luuwo lwakujwe? Kasimpe ulayumina mumuunda muwakasyangilwa.”
Kasimpi mbukakapandululwa
11 Mpawo majwi aa Mwami Leza akandisikila akuti, 12 “Ambila musyobo ooyu muzangi kuti, ‘Sena tamuzi ncozyaamba zintu eezi?’ Baambile kuti, ‘Mwami waku Babuloni wakainka ku Jelusalemu akuyoojata mwami wawo wamutola walo abaleli bakwe akubaleta ku Babuloni.’ 13 Amane wakajata umwi wamukwasyi wabwami akupangana cizuminano anguwe, wacita kuti akonkezye. Wakatolelezya abalupati-pati bamwi bamucisi, 14 kutegwa bwami oobo butakabi limbi ampuwo, bukabambe buyo cizuminano ncibwaacita. 15 Pele mwami wakamuzangila akutuma batumwa ku Ijipiti kuti bakalete mabbiza ampi mpati. Sena uzoozwidilila? Sena muntu uucita mbuli ceeci uzookonzya kutija? Sena ulakonzya kutyola cizuminano amana atije?
16 “Kasimpe mbuli mbwendi muumi, mbwaamba Mwami Leza, uyoofwida mu Babuloni, munyika yamwami ooyo wakamubikka acuuno cabwami, uulaacikonkezyo ncaasampaula, uulaacizuminano ncaatyola. 17 Falo ampi yakwe nkali amakamu-makamu manji aabantu taakwe ncobayoogwasya, munkondo eeyo pe, kwaakuyakwa bwaanda azitantaala kuti kujaigwe bantu banji. 18 Wakasampaula cikonke mukutyola cizuminano. Lino akaambo kakuti wakapa cikonke, nikuba boobo wacita zintu eezi, takakonzyi kutija pe.
19 “Nkaako mboobu mbwaamba Mwami Leza, ‘Kasimpe mbuli mbwendi muumi njoomupa cisubulo akaambo kacikonke cangu ncaasampaula acizuminano cangu ncaatyola.’
20 “Njoomuteya kanyandi kangu, nkabela uyoocegwa. Njoomuleta ku Babuloni akuzoomubeteka, nkaambo taakali kusyomeka kulindime pe.” 21 Basilumamba bakwe boonse bayootija bayoojaigwa munkondo, aabo bayoosyaala bayoomwaikila mumabazu oonse. Ndendilyo nomuyooziba kuti mebo nde Mwami Leza ndime ndaamba.
22 “Mboobu mbwaamba Mwami Leza ulati, ‘Mebo lwangu nde Mwami Leza ndime eeyoonumpula mpela yamulombe,
njootyola ntembwaani yawo, njooisyanga acilundu cilamfu atala.
23 Njooisyangila aansonje yacilundu ca Isilayeli, ciyooba aamitabi akuzyala micelo,
ciyoozyala amicelo akuyooba mulombe wabulemu.
Bayuni bamisyobo-misyobo bayooyaka ziteente mulinguwo,
bayoojana ciyubilo mucimvule camitabi yawo.
24 Masamu aamusokwe oonse ayooziba kuti mebo nde Mwami Leza ndafwiimpya masamu malamfu,
alimwi ndalampya masamu mafwiifwi akucita kuti musamu muyumu usyuuke.
Mebo nde Mwami Leza ndime ndaamba, nkabela njoocicita ncobeni.’”