Ezekiyeli 18
Muntu amuntu uyoofwida zyakwe
1 Majwi aa Mwami Leza akandisikila akuti,
2 “Ino bantu baamba nzi nobabelesya kasimpi aaka akaambo kanyika ya Isilayeli,
‘Basikale bakalya nsaansa zipapa, nkaako meno aabana abaabunyengulukwa?’”
3 Kasimpe mbuli mbwendi muumi, mbwaamba Mwami Leza,
tamukakabelesyi limbi kasimpi aaka mu Isilayeli pe.
4 Muntu uuli woonse nguwangu, nkokuti wisi antoomwe amwanaakwe mulombe, boonse mbibangu. Muntu ooyo uubisya nguyoofwa.
5 Atwaambe kuli muntu uululeme, uucita buyo zyeelede aziluleme. 6 Muntu ooyu katalyi zyamalende mucilundu, nokuba kukomba mituni ya Baisilayeli. Tasofwaazyi mukamweenzinyina, nokuba koona amukaintu uuli kuciindi cakwe. 7 Tadyaminini muntu naba ni, pele ulapilusya eeco ncaakasyomezya naakakweleta. Tabbi pele ulaaba zilyo zyakwe kuli baabo bafwide nzala akupa zisani kuli baabo batajisi pe. 8 Takweletesyi kuti ajane mpindu, nokuba kubweza cinyonamucila. Muntu uutayandi kucita cibi, ulabeteka cakutasalulula akati kabantu. 9 Ulatobela malailile aangu, ulabamba milawo yangu cakusyomeka. Muntu ooyu uululeme, uyoopona ncobeni, mbwaamba Mwami Leza.
10 Lino atwaambe muntu ooyu kajisi mwana mulombe sinkondo, uutila bulowa, nokuba kucita zimwi zyazeezi, 11 eezyo walo wisi nzyaatakacita, “Ulalya zyamalende mucilundu akusofwaazya mukamweenzinyina. 12 Uladyaminina bacete abapengede. Ulabba. Tapilusyi eeco ncaakasyomezya. Ulakomba mituni. Ulacita zintu zisesemya. 13 Ulakweletesya kuti ajane mpindu, kwamana ulabweza cinyonamucila. Sena muntu uuli boobo ulakonzya kupona? Peepe. Akaambo kakuti wakacita zintu zisesemya eezi, kasimpe ulajaigwa, nguwaliletela lufu mwini.
14 “Pele atwaambe kuti ooyu muntu kajisi mwana mulombe uubwene zibi zyoonse wisi nzyacita, pele nikuba kuti ulazibona, walo kataciti zintu mbuli zeezi, 15 katalyi zyamalende mucilundu, nokuba kukomba mituni ya Baisilayeli. Tasofwaazyi mukamweenzinyina. 16 Tadyaminini muntu naba buti, nokuba kutambula cisyomezyo cacikwelete. Tabbi, pele ulapa zilyo zyakwe kubantu bafwa nzala akupa zisani kubantu batajisi zisani. 17 Tayandi kubisya, takweletesyi kuti ajane mpindu nokuba kutambula cinyonamucila. Ulabamba milawo yangu akutobela malailile aangu. Mwana ooyu takafwidi cibi cawisi pe, unooyoopona ncobeni. 18 Pele wisi uyoofwida zibi zyakwe mwini, nkaambo wakali kuunina, akubbida munyina akuti wakali kucita cintu cibi akati kabantu bokwabo.
19 “Ambweni mulabuzya kuti, ‘Nkaambo nzi mwana ncateelede kupengela mulandu wawisi?’ Lino mukuti mwana wakali kucita ziluzi aziluleme, alimwi wali kubambisya malailile aangu oonse, uyoopona ncobeni.” 20 Muntu ooyo uubisya nguuyoofwa. Mwana takonzyi kupengela mulandu wawisi, awalo wisi teelede kupengela mulandu wamwana pe. Bululami bwamuntu uuluzi mbubwakwe alikke, abubi bwamubi abwalo buyakumugama alikke.
21 Pele kuti naa muntu mubi waleka zinyonyoono zyoonse nzyaakabisya akubamba malailile aangu oonse, akuti kacita ziluzi aziluleme, uyoopona ncobeni takoofwa pe. 22 Taakwe mulandu nuuba omwe uuyooyeeyegwa limbi. Akaambo kazintu ziluleme nzyaakacita, uyoopona. 23 Sena ndabotelwa kubona kuti ba sizibi bafwa? Mbwaamba Mwami Leza. Peepe ndabotelwa kubona kuti basiya nzila zyabo zibi kuti bapone.
24 Kuti naa muntu uululeme wasiya bululami bwakwe akucita cinyonyoono akutalika kucita zintu zisesemya eezyo zicita muntu mubi, sena uyoopona? Taakwe cintu nociba comwe caziluleme eezyo nzyaakacitide ciyooyeeyegwa. Akaambo kakutasyomeka kwakwe uyooba aamulandu, alimwi akaambo kazinyonyoono eezyo nzyaakacita uyoofwa.
25 Ambweni mulaamba kuti, “Nzila ya Mwami Leza tiiluzi.” Amuswiilile nomusyobo wa Isilayeli, “Sena nzila yangu tiiluzi?” Sena tazili nzila zyanu zitaluzi? 26 Kuti naa muntu uululeme wasiya bululami bwakwe akucita cinyonyoono, uyoofwida cinyonyoono eeco, uyoofwa akaambo kacinyonyoono eeco ncaacita. 27 Pele kuti muntu wasiya bubi oobo mbwaacita, wacita cintu ciluzi ciluleme, ulalivuna mwini. 28 Mukuti ulizi milandu yoonse njaakacita, nkaako waileka, uyoopona ncobeni, takoofwa pe. 29 Nikuba boobo bamusyobo wa Isilayeli balati, “Nzila ya Mwami Leza tiiluzi.” Sena nzila zyangu taziluzi nomusyobo wa Isilayeli? Sena tazili nzila zyanu zitaluzi?
30 Nkaako nywebo nomusyobo wa Isilayeli, ndamubeteka, umwi aumwi kweendelana anzila zyakwe, mbwaamba Mwami Leza. Amweempe! Amusiye zibi zyanu zyoonse, ndendilyo nomutakwe kusubulwa akaambo kazibi zyanu. 31 Amuleke zibi zyoonse nzyomwakacita, mube amoyo mupya amiyeeyo mipya. Nkaambo nzi ncomuyanda kufwa nomusyobo wa Isilayeli. 32 Nsibotelwi mulufu lwamuntu uuli woonse, mbwaamba Mwami Leza. Amweempe kuti mupone.