Ezekiyeli 19
Lwiimbo lwakuusa
1 Leza wakandaambila kuti ndiimbe lwiimbo lwakweema akaambo kabaleli bamu Isilayeli bobilo
2 wakati, “Banyoko bakali mbuli syuumbwa muzyazi ulaampuwo kapati.
Bakali kulala akati kabasyuumbwa akukomezya bana babo.
3 Bakalela umwi wabana babo, waba syuumbwa wanguzu.
Wakaiya kuzapaula banyama, wakali kulya bantu.
4 Lino bamasi bakamvwa zyanguwe, nkaako wakawida mudiba lyabo.
Bakamutola kajisi tulobyo kunyika ya Ijipiti.
5 Banyina nibakabona kuti nzyobalangila tazicitiki,
lulangilo lwabo lwakamana, nkaako bakabweza mwanaabo uumbi akumucita kuti abe syuumbwa wanguzu.
6 Wakali kweendeenda akati kabasyuumbwa, nkaambo ciindi eeci wakali syuumbwa wanguzu.
Wakaiya kuzapaula banyama, wakali kulya bantu.
7 Wakali kumwayaula mayubilo mayumu akunyonyoona minzi yabo.
Nyika aboonse bakali kukkala mulinjiyo bakayoowa naakali kutimba.
8 Eelyo bamasi bakaboola kuzoolwana, aabo bazwa muzisi zimuzingulukide.
Bakamuteya kanyandi kabo, nkaako wakawida mudiba lyabo.
9 Bakamukwela atulobyo twabo akumubikka mucizangala akumuleta kumwami waku Babuloni.
Bamubikka muntolongo kutegwa kutimba kwakwe kakutaciyoomvwigwi limbi muzilundu zya Isilayeli.
10 Banyoko bakali mbuli musaansa mumuunda wamisaansa, uusyangidwe kumbali aamaanzi,
wakalizyede kapati alimwi wakali aamitabi minji akaambo kamaanzi manji.
11 Mitabi yawo yakali miyumu, yakali kweelela kuba musako wamuleli.
Wakali mulamfu kwiinda mpanda zyoonse, wakali kulibonya akaambo kabulamfu bwawo akaambo kamitabi yawo minji.
12 Pele mubukali wakazyulwa akusowelwa ansi. Luuwo lwakujwe lwakuuyumya,
micelo yawo yakacelwa, mitabi yawo yakapusama nkabela yakatentwa mumulilo.
13 Lino wakasyangwa munkanda, munyika njumu, mucimpayuma.
14 Mulilo wawo wakatabukila kuzwa kumutabi umwi mupati akutenta micelo yawo.
Taakwe mutabi wawo muyumu wakasyaala alinguwo uunga wabambizigwa musako wamuleli pe.
Olu ndwiimbo lwakweema lwiimbwa lipengwa.”