Ezekiyeli 20

Muntu mbwazangila luyando lwa Leza

¹ Mumwaka waciloba, mumwezi wasanu mubuzuba bwakkumi bwabwaange, bamwi bapati ba Isilayeli bakaboola kuzoobuzya-buzya zya Mwami Leza, nkaako bakakkala kumbele lyangu.

² Mpawo majwi aa Mwami Leza akandisikila akuti, ³ “Yebo omuntu, ambila bapati bamu Isilayeli, ubaambile kuti, mboobu mbwaamba Mwami Leza ulati, ‘Sena mwaboolela kuzoobuzya-buzya zyandime? Kasimpe mbuli mbwendi muumi, nsikoomulekela kuti mubuzye-buzye zyandime mbwaamba Mwami Leza.’

⁴ “Sena ulakonzya kubabeteka? Sena ulakonzya kubabeteka yebo omuntu? Koya ukanane ambabo azyamilimo iisesemya yakali kucita basikale babo ⁵ ubaambile kuti, ‘Mboobu mbwaamba Mwami Leza,’ ulati, ‘Mubuzuba mbundakasala Isilayeli ndakakonkezya cakutambika kujulu akaambo kalunyungu lwaluzubo lwa Jakobo akuliyubununa lwangu mu Ijipiti.’ Kanditambikide kujulu ndakati, ‘Ndime Mwami Leza wanu.’ ⁶ Mubuzuba oobu ndakakonkezya kulimbabo kuti njoobagwisya mu Ijipiti akubaleta munyika eeyo njindakabalangawida, nyika iikunka mukupa abuci, nyika iinda masi oonse kubota. ⁷ Ndakati kulimbabo, ‘Umwi aumwi wanu agwisye zikozyanyo zibi eezyo nzyomwakalibikkila, tamweelede kulisofwaazya amituni yanu mu Ijipiti. Ndime Mwami Leza wanu.’

⁸ “Pele bakandizangila akutandiswiilila tiibagwisya zikozyanyo zibi eezyo nzibakali kukomba, nikuba kuleka mituni yamu Ijipiti. Ndakali kuyanda kuti ndibacite mubukali bwangu akubasubula mu Ijipiti. ⁹ Pele akaambo kazina lyangu ndakaleka kucita oobo kutegwa litasampaulwi abamasi aabo mbibakali kukkala aabo, mukuti ndakaliyubununa ku Baisilayeli abalo kababwene ciindi nindakabagwisya mu Ijipiti. ¹⁰ Nkaako ndakabasolweda kuzwa mu Ijipiti akubaleta munkanda. ¹¹ Ndakabapa malailile aangu akubazibya milawo, nkaambo muntu ooyo wiiswiilila uyoopona akaambo kanjiyo. ¹² Alimwi ndakabapa masabata aangu kuti cibe citondezyo akati kandime ambabo, kutegwa bazibe kuti mebo nde Mwami Leza ndime ndakabasalazya.

¹³ “Nikuba boobo bantu ba Isilayeli bakandizangila munkanda. Tiibakatobela malailile aangu, pele bakakaka milawo yangu, nikuba kuti muntu ooyo uuswiilila uyoopona akaambo kanjiyo, pele balo bakaindilizya kusofwaazya masabata aangu. Aboobo ndakayanda kuti ndibacite mubukali bwangu akubanyonyoona munkanda. ¹⁴ Pele akaambo kazina lyangu, ndakaleka kutegwa litasampaulwi abamasi balo bakabona ciindi nindakabagwisya. ¹⁵ Ndakatambika kujulu alimwi nindakabakonkezya munkanda kuti nsikoobaleta munyika eeyo njindakabapede, nyika iikunka mukupa abuci, nyika mbotu kwiinda masi oonse. ¹⁶ Nkaambo bakakaka milawo yangu akutatobela malailile aangu, bakasofwaazya masabata aangu. Mukuti bakabikka myoyo yabo kumituni. ¹⁷ Nikuba boobo ndakabeengelela akutabanyonyoona tiindakabalobya munkanda pe. ¹⁸ Ndakaambila bana babo munkanda kuti, ‘Mutanootobeli mbeta zyabamauso nikuba kubamba milawo yabo, nikuba kulisofwaazya amituni yabo. ¹⁹ Mebo ndime Mwami Leza wanu, kamutobela malailile aangu, alimwi mweelede kunoobambisya milawo yangu. ²⁰ Kamubamba masabata aangu mwaasalazye, kutegwa cibe citondezyo ncitwapangana akati kandime andinywe. Ndendilyo nomuyooziba kuti mebo ndendime Mwami Leza wanu.’

²¹ “Pele bana aaba bakandizangila. Tiibakatobela malailile aangu, tiibakabamba milawo yangu, eelyo iicita kuti muntu wiiswiilila apone akaambo kanjiyo, alimwi bakasofwaazya masabata aangu. Nkaako ndakali kuyanda kuti ndibacite mubukali bwangu akubasubula kabacili munkanda. ²² Pele ndakaleka kucita boobo, akaambo kazina lyangu tiindakacita boobo kutegwa litasampaulwi abamasi balo bakabona ciindi nindakabagwisya. ²³ Ndakatambika kujulu alimwi nindakabakonkezya munkanda kuti njoobamwaila akati kabamasi akubamwaisya muzisi zyoonse, ²⁴ nkaambo tiibakaswiilila milawo yangu, bakakaka malailile aangu akusofwaazya masabata aangu, myoyo yabo yakali kusukamina mituni yabamawisi. ²⁵ Ndakabalekela kuti batobele mbeta zitaluzi akuti batobele milawo eeyo njibatakali kukonzya kubamba. ²⁶ Ndakabalekela kuti basofwaazigwe kwiindila muzipego zyabo, zyakupaizya bana babo bakusaanguna, kuti kabayoowa kutegwa bazibe kuti mebo ndendime Mwami Leza.

²⁷ “Nkaako ono, yebo omuntu, ambila bantu ba Isilayeli, uti kulimbabo, mboobu mbwaamba Mwami Leza ulati, ‘Muli ceeci abalo bamauso bakandisampaula mukundisiya.’ ²⁸ Nindakabaleta munyika eeyo njindakakonkezya kuti njoobapa, nibakabona kalundu kalamfu naa musamu uuvwevwede, bakainka ooko kuyoopa zipaizyo zyabo. Bakali kupa zituuzyo eezyo zyakandikalazya, bakali kupa tununkilizyo twabo akutuula zituuzyo zyazyakunywa. ²⁹ Eelyo ndakati kulimbabo, ‘Ino nkuumalende nzi nkomuunka?’” Busena oobu buciitwa kuti busena bwamalende asunu. ³⁰ Nkaako ambila musyobo wa Isilayeli kuti, “Mboobu mbwaamba Mwami Leza ulati, ‘Sena anywebo mulalisofwaazya mbuli bwakacita basikale banu akuyandisya zisusi zyazikozyanyo zibi?’ ³¹ Nomupa zipego zyanu, nomupaizya bana banu balombe mumulilo, citondezya kulisofwaazya nkomucita amituni yanu yoonse kusikila sunu. Sena inga ndamulekela kuti mubuzye-buzye zyangu, nywebo nomusyobo wa Isilayeli? Kasimpe mbuli mbwendi muumi, mbwaamba Mwami Leza, nsikoomulekela kuti mubuzye-buzye ndime.” ³² Kayi mulati, “Tuyanda kuba mbuli bamasi, mbuli bantu bamunyika, balo bakomba cisamu naa bbwe.” Pele eezyo nzyomuyeeya tazikacitiki pe.

Leza ulasubula akulekelela

³³ Kasimpe mbuli mbwendi muumi mbwaamba Mwami Leza njoomulela ajanza lyangu lyanguzu, akuboko kutandabede mubukali bupati. ³⁴ Ndiyoomuboozya kuzwa mumasi oomo mumwakamwaisidwe ajanza lyanguzu akuboko kutandabede mubukali bupati. ³⁵ Njoomuleta munkanda yabamasi, nkabela ooko njoomubeteka camulomo mpande. ³⁶ Mbubonya mbubuli mbundakabeteka basikale banu munkanda yacisi ca Ijipiti, mbwenjoomubeteka anywebo, mbwaamba Mwami Leza. ³⁷ Njoomulangisya ndaakumweendelezya, nkabela njoocita kuti mukazumine cizuminano cangu. ³⁸ Ndizoobagwisya aabo bandipapila abandizangila. Nikuba kuti ndiyoobaleta kuzwa kunyika ooko nkobakkede, pele tabakooyoonjila munyika ya Isilayeli. Ndendilyo nomuyooziba kuti ndendime Mwami Leza.

³⁹ Nywebo nomusyobo wa Isilayeli, mboobu mbwaamba Mwami Leza ulati, “Kamuya nyoonse mukamanine mituni yanu milimo! Pele musule aakooku kasimpe muyoondiswiilila, tamuciyoosampauli limbi zina lyangu lisalala azipego amituni yanu. ⁴⁰ Acilundu cangu cisalala, cilundu cilamfu ca Isilayeli, mbwaamba Mwami Leza, ooko munyika eeyo musyobo wa Isilayeli woonse uyoondimanina milimo, nkabela ambebo njoobatambula. Ooko ndiyooyanda zituuzyo zyanu azipego zibotu antoomwe azipaizyo zyanu zisalala. ⁴¹ Ndiyoomutambula mbuli tununkilizyo ndaakumugwisya kuzwa mumasi oomo mumwakamwaisidwe, njoolitondezya kuti ndasalala kumbele lyabamasi. ⁴² Eelyo muyooziba kuti ndendime Mwami Leza, ndaakumuleta munyika ya Isilayeli, nyika eeyo njindakakonkezya nketambikide kuti njooipa kuli basikale banu. ⁴³ Lino ooko muyooyeeya bukkale bwanu amilimo yanu yoonse eeyo njimwakali kucita mukulisofwaazya, nkabela muyoolisesemwa nobeni akaambo kabubi boonse mbumwakacita. ⁴⁴ Muyooziba kuti ndendime Mwami Leza, ndaakumweengelela akaambo kazina lyangu, kutali bweelede nzila zyanu zibi amilimo yanu mibi, nywebo nomusyobo wa Isilayeli, mbwaamba Mwami Leza.”

Mulilo kumusanza

⁴⁵ Majwi aa Mwami Leza akandisikila akuti, ⁴⁶ “Yebo omuntu, langa kumusanza, kambauka ziyoocitika kumusanza, usinsime aziyoocitika kuzisaka zyakunyika yakumusanza. ⁴⁷ Ambila cisaka cakumusanza kuti, ‘Koswiilila majwi aa Mwami Leza.’ Mboobu mbwaamba Mwami Leza ulati, ‘Ndiyanda kukuumpa, nkabela mulilo uyoosyukuta masamu aako oonse, matete amayumu. Waakuvwilima tuukazimi pe, aboobo bantu boonse kuzwa kumusanza kuyoosika kunyika bayoopya agunzila eelyo. ⁴⁸ Bantu boonse bayoobona kuti mebo nde Mwami Leza ndime nduukutula, tuukazimwi pe.’”

⁴⁹ Mpawo ndakati, “Maawe, O Mwami Leza! Bandaamba kuti, ‘Sena taide kwaamba buyo zikozyanyo?’”