Ezekiyeli 21
Zya panga lya Mwami Leza
1 Majwi aa Mwami Leza akandisikila akuti, 2 “Yebo omuntu langa kumunzi wa Jelusalemu, kambauka zyakoolwa kwabusena bwawo busalala. Sinsima ziyoocitika kunyika ya Isilayeli 3 waambe kuti, ‘Mboobu mbwaamba Mwami Leza,’ ulati, ‘Ndiyanda kukulwana. Njoosomona panga lyangu kuzwa mumukutu walyo kuti nkanyonyoone boonse baluleme ababi. 4 Mukuti ndiyanda kunyonyoona baluleme ababi, njoosomona panga lyangu kuzwa mumukutu walyo kuti nkanyonyoone bantu boonse kutalikila kumusanza mane kuyoosika kunyika. 5 Ndendilyo bantu boonse nobayooziba kuti ndime nde Mwami Leza ndasomona panga kuzwa mumukutu walyo, nsikaliboozyi alimwi pe.’
6 “Nkaako, kotongela yebo omuntu! Tongela kumbele lyabo kotyompedwe akuusa kapati. 7 Baakukubuzya kuti, ‘Ino utongela nzi?’ Ukati, ‘Akaambo kamakani aaboola. Alaboola ncobeni! Kasimpe azoocitika, mbwaamba Mwami Leza.’” 8 Majwi aa Mwami Leza akandisikila akuti,
9 “Yebo omuntu, sinsima uti, mboobu mbwaamba Mwami Leza,” ulati,
“Panga, panga likwengedwe lisyobedwe,
10 likwengedwe kuti lijaye, lilisyobedwe, limweka mbuli lulabo!
Yebo mwanaangu, wasampaula cisubulo akulaya kwangu koonse.
11 Kwalaililwa kuti panga lisyobwe, libelesegwe amaanza,
lyakwengwa akusyobwa kuti lipegwe mumaanza aasikujaya uulibambilide.
12 Lino weeme, yebo omuntu, nkaambo liyanda kujaya bantu bangu,
liyanda kujaya baleli boonse bamu Isilayeli.
Bayoojaigwa antoomwe abantu bangu bamwi. Nkaako lyuume-ume acamba.
13 Lino ndisunka bantu bangu, kuti naa bateempi,
zyoonse eezi ziyoocitika kulimbabo.
14 “Nkaako lino sinsima yebo omuntu, ukambe. Panga liinduluke ziindi zyobilo noziba ziindi zyotatwe. Eeli ndipanga lyakujazya, ndipanga lyakujaya kupati, liyoobasinkilizya kumabazu oonse. 15 Licitya kuti bantu bangu babe bakandu kabacinyina camba akwiide kuwa. Ndiyanda kulwana munzi wabo apanga libeka mbuli lulabo, lilibambilide kujaya. 16 Opanga banyonyoone bali kululyo, wamana ujaye bali kulumwensi, kufumbwa ooko mabemba nkwaavuumukila. 17 Ambebo lwangu ndakamba, ndendilyo bukali bwangu nebuyoobuka. Mebo nde Mwami Leza ndime ndaamba.”
Panga lyamwami waku Babuloni
18 Majwi aa Mwami Leza akandisikila akuti, 19 “Yebo omuntu, bamba migwagwa oomo muzooinda panga lyamwami waku Babuloni, yoonse yobilo kaizwa mucisi comwe. Ubikke mbaakani mugwagwa mpuuleela mumunzi. 20 Bamba mugwagwa oomo muzooinda panga liyoolwana munzi wa Labba wa Baamoni, umwi ugame kucisi ca Juda amunzi walukwakwa wa Jelusalemu. 21 Nkaambo mwami waku Babuloni uzooimina aaandanina mugwagwa, aalya aaandanina migwagwa yobilo, kuti abuzye kwiindila mukuuma cisolo. Uyoouma cisolo amivwi, uyoobuzya-buzya mituni yakwe. Uyoolanga-langa muni. 22 Lino kujanza lyakwe lyalulyo kuli muvwi uujisi mbaakani yamunzi wa Jelusalemu. Ooko nkwayopozomokela malailile aankondo. Nkonkuko nkoyoobikka cakugwisya bwaanda, uyooyaka zitantaala aŋanda ndamfu. 23 Kuyoolibonya mbuli kuti kuuma kwakwe kwacisolo nkwabuyo kuli baabo bakakonkezya kuba kulubazu lwakwe, pele uyoobayeezya zyamulandu wabo, uyoobatola mubwaange.
24 “Nkaako mboobu mbwaamba Mwami Leza ulati, ‘Mbuli mbumwacita kuti mulandu wanu nywebo nobantu wiibalukwe kwiindila mukuzanga kwaantangalala, akuyubununa zinyonyoono zyanu muli zyoonse nzyomucita, lino mukuti mwakazicita eezi, muyootolwa mubwaange.’
25 “Yebo omuleli wa Isilayeli oosofweede omubi, buzuba bwako bwasika, ciindi cako cakusubulwa ono casika eeni-eni. 26 Mboobu mbwaamba Mwami Leza ulati, ‘Samununa cingundu, gwisya musini.’ Tacikabi mbuli mbucakabede kale. Balibombya bayoosumpulwa, aabo balisumpula bayooletwa ansi. 27 Uyoonyonyoonwa, uyoonyonyoonwa, njoocita kuti musini ukanyonyoonwe. Tuukapegwi kumuntu uumbi mane do kusikila ooyo weelede akaboole, ngonguwe ngondiyoopa.
Zyapanga a Baamoni
28 “Lino yebo omuntu sinsima waambe kuti,
‘Mboobu mbwaamba Mwami Leza azya Baamoni akusampaula kwabo.’
Panga, panga lilisomwedwe kuti lijaye,
lilisyobedwe kuti linyonyoone, limweka mbuli lulabo!
29 Nikuba kuti wakali kubona zilengaano zyakubeja, akumvwa majwi aakubeja mukusonda, uyoolazikwa ansingo zyababi aabo bayanda kujaigwa, balo bali buzuba bwabo bwasika, ciindi cabo cakusubulwa casika eeni-eni. 30 Pilusya panga mumukutu walyo. Mubusena oomo mumwakazyalilwa, munyika yabasikale banu, njoomubeteka. 31 Njoomukalalila kapati, njoomunyemena citaambiki, akumwaaba kubantu basilunya, bantu bacibwene kunyonyoona. 32 Muyooba nkuni zyamulilo, munyika yanu muyootika bulowa, tamuciyooyeeyegwi limbi, mebo nde Mwami Leza ndime ndaamba.”