Ezekiyeli 22
Milandu yamunzi wa Jelusalemu
1 Majwi aa Mwami Leza akandisikila kuti, 2 “Yebo omuntu, sena inga waubeteka munzi ooyu? Sena inga waubeteka munzi uutila bulowa? Koya ukawaambile zyamilimo yawo iisesemya yoonse 3 ukati, mboobu mbwaamba Mwami Leza ulati, ‘Yebo omunzi ooliletela lunyonyooko kwiindila mukutila bulowa akati kako, ulalisofwaazya kwiindila mukupanga mutuni, 4 wakaba aamulandu akaambo kabulowa mbookatila akulisofwaazya, akaambo kamituni eeyo njookapanga. Nduwe oolimanizizya mazuba omwini, myaka yako yatwentana. Nkaako njookucita kuti ube cisampuzyo kuli bamasi akuba cisesyo kuzisi zyoonse. 5 Aboobo bali aafwiifwi abaabo bali kulaale bayookusampaula yebo omunzi oolaampuwo mbi, oozwide lupyopyongano.’ 6 Bona baleli ba Isilayeli boonse bali mulinduwe mbobabelesya nguzu zyabo mukutila bulowa. 7 Mulinduwe bantu mobasampaula bamawisi abamanyina, mulinduwe badyaminina bazwakule, balagutaika bamusyaala abamukabafu. 8 Mwakasampaula zintu zyangu zibotu akusofwaazya masabata aangu. 9 Mulinduwe momuli bantu babejelezya mukucita kuti bantu banji kabajaigwa, mulinduwe momuli bantu aabo balya zipaizyo zyamumalende muzilundu, balacita milimo iibisya yabwaamu. 10 Mulinduwe momuli baabo banjila mumaanda aabamawisi, mulinduwe momuli baabo batanga bakaintu bacili kuciindi cabo, batanasalala mumulawo. 11 Mulinduwe momuli baalumi bacita zitaambiki abamukabeenzinyina, acimwi cuusya nsoni ncakuti kuli balalika bamukabana, abaabo baya kubacizi babo kabali mbana bamuntu omwe. 12 Mulinduwe muli bantu batambula zisinkamulomo kuti bajaye bantu, yebo ulakolotesya kuti ujane mpindu acinyonamucila, ulajana lubono munzila iitaluzi kwiindila mukunyanga beenzinyoko. Wakandiluba mebo, mbwaamba Mwami Leza.”
13 Kasimpe njookamba cakukankama, lubono oolo ndookajana munzila iitaluzi, abulowa oobo mbookatila akati kanu. 14 Sena uyoondiyumina naa uyoolivuna mubuzuba oobo mbwezookusubula? Mebo nde Mwami Leza ndime ndaamba, kasimpe njoocicita. 15 Nobamumunzi oomo njoomumwaisya akati kabamasi akumumwaisya muzisi zyoonse, njoomanya kutasalala kwanu. 16 Mwaakusofwaazigwa kumbele lyabamasi, ndendilyo nemuyooziba kuti mebo ndendime Mwami Leza.
Ceengelo ca Leza
17 Mpawo majwi aa Mwami Leza akandisikila akuti, 18 “Yebo omuntu, Baisilayeli tabali bantu kulindime pe. Bali buyo mbuli makwisyilili aamukuba, mundalila a loto eezyo zisyaala ciindi lubulo nolweenzemunwa mumulilo. 19 Nkaako mboobu mbwaamba Mwami Leza ulati, ‘Akaambo kakuti nyoonse mwaba makwisyilili, njoomubungika mu Jelusalemu. 20 Mbubonya mbuli bantu mbobabunganya nsiliva, mukuba, lubulo, loto amundalila muceengelo kuti zyeenzemunwe amulilo, mbubonya aabo njoomubunganya mukunyema amubukali bwangu, njoomubikka mukati kamunzi akumweenzemuna. 21 Njoomulundika, njoomufulida abukali bwangu eelyo muyooenzemuka mukati. 22 Mbubonya mbuli nsiliva mboyeenzemuka muceengelo, mbubonya oobo anywebo muyooenzemuka mukati kamunzi, ndendilyo nomuyooziba kuti mebo nde Mwami Leza ndamukalalila kapati.’”
Zinyonyoono zyabasololi baba Isilayeli
23 Alimwi majwi aa Mwami Leza akandisikila akuti, 24 “Yebo omuntu, ambila nyika kuti, ‘Ulinyika yatakawidwa mvula nokuba lunywaanywa mubuzuba bwabukali.’ 25 Kuli balivwiya-vwiya kuti basololi bawo bajaigwe munyika mumonya oomu, balavuluma mbuli syuumbwa uuzapaula ncaajaya, balya bantu, balatola ziyobwedo azintu zibotu kapati, cakuti bavuzya bamukabafu. 26 Bapaizi bawo balatyola mulawo wangu akusofwaazya zintu zyangu zisalala. Tabaandaanyi akati kacintu cisalala acintu buyo. Baiisya kuti kunyina lwaandaano akati kacintu citasalali acintu cisalala mumulawo. Batyola milawo yangu yakuti babambe masabata, cakuti ono ndasampaulwa akati kabo. 27 Balupati-pati bayo nyika eeyi bali mbuli baumpe bazapaula ncibajaya, balatila bulowa akujaya bantu kuti bajane lubono munzila iitaluzi. 28 Basinsimi bamunyika eeyi balasisa zibi eezi mbuli bantu basyingulula bwaanda amulambo, balabona zilengaano zyabuyo, balasonda akwaambila zyakubeja bantu. Balati, ‘Mboobu mbwaamba Mwami Leza,’ kakuli Mwami Leza taakwe ncaaamba. 29 Bantu bamunyika eeyi banyanga bantu akubba, badyaminina bacete ababulide, bazwakule tababaleli kabotu, tababacitili ziluleme.
30 “Ndakalangaula mwaalumi akati kabo wali kunookonzya kuyakulula bwaanda akuti azooime kumbele lyangu akati kamwaako kwiiminina nyika kutegwa intainyonyooni, pele kwakanyina amuntu pe. 31 Nkaako njoobanyemena akubanyonyoona mubukali bwangu bupati, ndibasubule akaambo kazeezyo zyoonse nzibakacita, mbwaamba Mwami Leza.”