Ezekiyeli 23
Zyabakaintu bobilo
1 Majwi aa Mwami Leza akandisikila akuti, 2 “Yebo omuntu, kwakali bakaintu bobilo bana bada lyomwe. 3 Nibakacili basimbi, kabakkala mu Ijipiti, bakatalika kucita zyabwaamu baba bavuule. Nkukonya ooko nkolo zyabo nkuzyakatyankilwa, anonso zyabusimbi bwabo nkuzyakasyobelwa. 4 Mupati wakali Ohola, musyoonto wakwe wakali Oholiba. Bakali bakaintu bangu, bakazyala bana balombe abasimbi. Ohola ngu Samaliya, Oholiba ngu Jelusalemu.
5 “Ohola wakatalika buvuule kacili wangu, wakali kunyomenena bayandwa bakwe Baasiliya, basilumamba 6 basama zyacijulu-julu, beendelezi abasilutwe babasilumamba, boonse bakali baalumi bakubusi beebeka, bakali kutanta mabbiza. 7 Wakaba muvuule a Baasiliya boonse, wakalisofwaazya mwini akaambo kamituni yoonse yabayandwa boonse aabo mbakali kunyomenena. 8 Taakaleka buvuule oobo mbwaakatalikila mu Ijipiti, oomo mwaakabeda mwaamu. Kuzwa ciindi naakali musimbi wakali kweenda abaalumi mbuli muvuule.
9 “Nkaako ndakamwaaba kubayandwa bakwe Baasiliya, aabo mbaakali kunyomenena. 10 Bakamusamununa, bakatola bana bakwe balombe abasimbi, walo bakamujaya apanga. Wakaba kasimi akati kabakaintunyina, nkabela wakasubulwa kapati.
11 “Musyoonto wakwe Oholiba wakalibonena eeci, nikuba boobo mukunyomenena kwakwe amubuvuule bwakwe wakamwiinda mupati wakwe. 12 Awalo wakanyomenena Baasiliya, beendelezi abasilutwe babasilumamba, basilumamba muzisani zyabo, basikutanta mabbiza, boonse bakali bakubusi beebeka. 13 Ndakati mukuti awalo wakalisofwaazya boonse bobilo bagamide nzila yomwe.
14 “Pele eelyo naakaindila buya buvuule bwakwe. Wakabona baalumi bakasimbidwe abwaanda, bakali Bakalodiya bakasimbwa mumusila uusalala, 15 bakasimbidwe matambo muzibuno zyabo, kakuli zingundu kumutwe, boonse bakali kulangika mbuli balupati-pati bankalaki baku Babuloni, bakazwa ku Kalodiya. 16 Mbwaakababonena buyo, wakabanyomenena akutuma batumwa kulimbabo ku Kalodiya. 17 Mpawo Bakalodiya bakaboola kulinguwe, kuti bazoobonane, nkabela muluunyaunya lwabo bakamusofwaazya. Naakamana kusofwaazigwa ambabo wakabasiya kabijilidwe kapati. 18 Lino naakazumanana mubuvuule bwakwe kayabulitondezya, ndakamusiya nkebijilidwe kapati, mbubonya mbuli mbundakasiya mwanookwabo. 19 Nikuba boobo ciindi eeci wakaindilizya buvuule bwakwe naakayeeya mazuba aabusimbi bwakwe, naakali muvuule mu Ijipiti. 20 Ooko wakali kunyomenena bayandwa bakwe, bakakomezezye mbuli mbongolo, bakajisi nguzu mbuli zyabbiza. 21 Wakalisukeme azyazisapi zyabusimbi bwako, ciindi ciya nookaba mwaamu mu Ijipiti, ooko nkookali kutyankwa nkolo.
Leza bwaakabeteka mukaintu musyoonto
22 “Nkaako yebo, Oholiba, mboobu mbwaamba Mwami Leza ulati, ‘Njoobusya bayandwa bako kuti bazookulwane, aabo bakapiluka kababijilidwe, njoobaleta kuti bazookulwane kuzwa kumabazu oonse, 23 nkokuti baku Babuloni a Bakalodiya boonse, bantu bazwa ku Pekodi, Syowa a Kowa, antoomwe a Baasiliya boonse, baalumi beebeka, antoomwe abeendelezi boonse abasilutwe, bapati babasikutanta nkalaki, abalupati-pati, boonse kabayootantide amabbiza.’ 24 Bayooboola kuzookulwana kabajisi zilwanyo, nkalaki azikwiliba antoomwe ankamu yabantu, bayoondandama kuti bakulwane kuzwa mumabazu oonse kabajisi ntobo mpati azisyoonto, kabayoosamide angowani. Njookwaaba kulimbabo kuti bakakusubule, nkabela bayookusula mbuli bweelede kuyanda kwabo. 25 Njookunyemena kapati nkabela abalo bayookucita mubukali. Bayootenda mpemo amatwi aako, nkabela bamwi banu aabo bayoosyaala bayoobajaya apanga. Bayootola bana bako balombe abasimbi, aabo bayoosyaala bayootentwa mumulilo. 26 Bayookusamununa zisani zyako akuyootola tubwe twako tweebesi. 27 Mbombuboobu mbwenjoolesya zisapi abuvuule mbookatalikila mu Ijipiti. Tokazisukamini limbi zintu eezi waakuzibona nokuba kuyooyeeya limbi zyamu Ijipiti.”
28 Mboobu mbwaamba Mwami Leza ulati, “Ndiyanda kukwaaba kulibaabo bakusulaika, aabo mbookacita kuti bapiluke kababijilidwe kapati. 29 Bayookucita mukukusulaika akuyootola zintu zyoonse nzyookabelekela. Bayookusiya buyo acinswe mbuboobu, bayookweenena, uyoousa, cinswe abwaamu bwako ziyooyubununwa, 30 nzizyakuletela zeezi, nkaambo wakali kunyomenena bamasi aboobo wakalisofwaazya omwini amituni yabo. 31 Wakatobela nzila yamupati wako, nkaako ndakusubula ayebo mbubonya mbuli nguwe.”
32 Mboobu mbwaamba Mwami Leza ulati,
“Uyoonywa nkomeki yacisubulo camupati wako,
nkomeki mpati ndamfu, iyookuletela masampu acisesyo,
nkaambo ilizwide kapati.
33 Uyookolwa akufwa nsoni, nkomeki yakunyonyoona akuba tongo,
nkomeki yamupati wako Samaliya.
34 Uyooinywa akwiikunina limwi, uyoopwasyauka,
akuzapauka nkolo. Ndime ndaamba, mbwaamba Mwami Leza.”
35 Lino mboobu mbwaamba Mwami Leza ulati, “Mbokunga wakandiluba akundifutatila weelede kuti ucibone akaambo kazisapi abuvuule bwako.”
36 Mwami Leza wakandaambila kuti, “Yebo omuntu, sena inga wandibetekela Ohola a Oholiba? Koya ukababone amilimo yabo iisesemya, 37 nkaambo bakali kucita bumambe, nkaako bakaba aamulandu wabulowa. Bakali kucita bumambe amituni yabo, bakali kunga bapaizya bana babo aabo mbibakandizyalila, kuti babe cilyo camituni. 38 Bakacita aceeci kulindime. Kuciindi eeco nciconya bakasofwaazya busena bwangu busalala, akusofwaazya masabata aangu. 39 Mubuzuba mbubonya oobo mbubakapaizya bana babo kumituni, bakanjila mubusena bwangu busalala akubusofwaazya. Mbubakacita oobo muŋanda yangu.
40 “Alimwi bakali kutumina batumwa kubaalumi bakali kuzwida kulaale. Bakalikunga basika bakasamba, balambika zikoye zyabo akusama tuwenge. 41 Bakakkala abulo bwabulemu, kumbele lyabo kakubambidwe-bambidwe atebule aawo mpoobabikka tununkilizyo amafuta aangu.
42 “Kwakali kumvwigwa cikwala camakamu aabantu balikwaide. Basabeya bakoledwe bakaitwa kuzwa kunkanda antoomwe abaalumi bamwi, bakasamika mukaintu ooyu ninga kumaboko aakwe antoomwe amusyoonto wakwe, akubikka misini yeebeka amitwe yabo. 43 Mpawo ndakaambilila yooyo wakakatede abumambe kuti, ‘Abacite mbuli bavuule, nkaambo mbavuule.’ 44 Nkaako bakoona anguwe. Mbubonya mbuli baalumi mboboona amuvuule, abalo bakoona abakaintu aabo basizisapi, Ohola a Oholiba. 45 Pele bantu baluleme bayoobapa cisubulo cabakaintu bacita bumambe akutila bulowa, nkaambo mbaasimamambe alimwi mbakutila bulowa.”
46 Mboobu mbwaamba Mwami Leza ulati, “Amwiite nkamu yabantu ibalwane kuti bayoowe basaalwe. 47 Nkamu eeyo ibaume mabwe akubakosoola amapanga, nkamu iyoojaya bana babo balombe abasimbi akutenta maanda aabo. 48 Mbombuboobu mbwenjoolesya zisapi munyika, kutegwa bakaintu boonse bacenjelele mpawo, kuti bataiyi zyanduwe. 49 Ulasubuka akaambo kazisapi zyako, ulacibona akaambo kazibi zyako zyakukomba mituni. Ndendilyo noyooziba kuti ndendime Mwami Leza.”