Ezekiyeli 24
Cibiya cili aankalaya
1 Mumwaka wafuka, mumwezi wakkumi, mubuzuba bwakkumi, majwi aa Mwami Leza akandisikila akuti, 2 “Yebo omuntu, bulembe buzuba oobu, buzuba buno, nkaambo mwami waku Babuloni wasinkilizya munzi wa Jelusalemu sunu mabala.” 3 Ambila musyobo ooyu muzangi cikozyanyo, ubaambile kuti, mboobu mbwaamba Mwami Leza ulati,
“Sibika cibiya, cisibike, utile maanzi mukati.
4 Bikka mulincico zituli zyanyama, zituli zibotu zyoonse,
nyama yamweendo ayakkuko. Cizuzye azifuwa zibotu eezi,
5 wamana ubweze ciyasyo usosele nkuni kuti zifuwa zibizwe,
cileke cibile wamana ukange zifuwa zili mumo.”
6 Mboobu mbwaamba Mwami Leza ulati, “Maawe kumunzi wabantu batila bulowa, kucibiya cili aankalaya, cili andamina zitakazwi. Kogwisya cituli comwe-comwe kakunyina akuzyuumina cisolo pe. 7 Nkaambo bulowa bwakatilwa mumunzi buli mulinguwo, okabutilila amwaala wabbwe, tookabutilila ansi kuti ivu libuvwikkile. 8 Kutegwa bukali bwangu bubuke, akuti ndipilusye cibi, ndabikka bulowa bwawo atala amwaala wabbwe, kutegwa butavwikkilwi.”
9 Nkaako mboobu mbwaamba Mwami Leza ulati, “Maawe kumunzi uutila bulowa, mebo lwangu njoolundika nkuni. 10 Nkaako lundika nkuni ukutule mulilo. Ujike kabotu nyama, uvwelanye tununkilizyo, kanga zifuwa kusikila zilileke. 11 Omana ubikke cibiya cinyina cilimo amakala mane kusikila cipye, amukuba waco upye, kutegwa ndamina zyaco zyeenzemuke, nkalaya yaco ipye. 12 Cibiya eeci cakatazya, ndamina zyaco tiizyazwa, tiizyeenzemuka pe. 13 Lino ndabona kuti bwaamu bwako mbwacisapi. Mukuti ndakasoleka kukusalazya pele cakaka kuti usalazigwe, tokasalali alimwi pe mane kusikila bukali bwangu bukabuke. 14 Mebo nde Mwami Leza ndime ndaamba. Ciindi cangu cakuti ono ndikucite casika. Nsikooleka pe, nsikookweengelela, nikuba kukuleka buyo pe. Uyoobetekwa kweendelana akweenda kwako amilimo yako, mbwaamba Mwawi Leza.”
Lufu lwa muka Ezekiyeli
15 Majwi aa Mwami Leza akandisikila akuti, 16 “Yebo omuntu, ndiyanda kukuyumukila, ndikunyange muntu ooyo ngoyandisya kapati. Nikuba boobo uteemi nokuba kulila naa kulosya misozi. 17 Koide buyo kutongela, utalili mufu pe. Kolyaangide cingundu cako, kosamide andyasyo kumaulu, utalivumbi kumeso, nokuba kulya cilyo caadilwe.”
18 Nkaako ndakaambila bantu makani aayo cifumo-fumo, eelyo kumangolezya mukaintu wangu wakafwa. Nibwakaca ndakacita mbubonya mbuli mbundakalaililidwe.
19 Mpawo bantu bakandibuzya kuti, “Sena totitwaambile zintu eezi ncozyaamba?”
20 Eelyo mebo ndakabaambila kuti, “Majwi aa Mwami Leza akandisikila akuti, 21 Ambila musyobo wa Isilayeli kuti, ‘Mboobu mbwaamba Mwami Leza ulati, ndiyanda kusofwaazya busena bwangu busalala ciyubilo ciyumu eeco ncoulisumpwida, eeco ncomuyandisya, eeco cili kumoyo wanu. Bana balombe abasimbi aabo mbimwakasiya bayoojaigwa munkondo. 22 Nkabela muyoocicita eeco nciconya ncindacita. Tamukalivumbi kumeso nikuba kuyoolya zilyo zyaadilwe. 23 Tamukagwisyi zingundu zyanu kumitwe andyasyo zyanu kumaulu. Tamukeemi nokuba kulila, pele muyookotela akaambo kazinyonyoono zyanu, munooyootongela. 24 Ezekiyeli uyooba citondezyo kulindinywe, muyoocita anywebo mbuli mbwaakacita walo. Caakucitika eeci, ndendilyo nomuyooziba kuti ndendime Mwami Leza.’”
25 Lino yebo omuntu, mubuzuba oobo mbwenjoogwisya ciyubilo cabo ciyumu, kutangala kwabo abulemu, eeco ncobayandisya, eeco cili kumoyo wabo, bana babo balombe abasimbi, 26 mubuzuba oobo uutikatije uyooboola kuzookwaambila makani. 27 Ciindi eeco uyookonzya kukanana, uyookanana kulinguwe, tokoonoocuumwide pe. Nkaako uyooba citondezyo kulimbabo, eelyo bayooziba kuti ndendime Mwami Leza.