Ezekiyeli 25

Kusinsima kwa Ezekiyeli azya Baamoni

¹ Majwi aa Mwami Leza akandisikila akuti, ² “Yebo omuntu, langa kunyika ya Baamoni usinsime ziyoocitika kulinjiyo. ³ Baambile kuti, amumvwe majwi aa Mwami Leza. Mboobu mbwaamba Mwami Leza ulati, ‘Nkaambo kakuti mwakati,’ ‘Ee buya!’ Ciindi busena bwangu busalala nibwakasofwaazigwa, ciindi nyika ya Isilayeli niyakoolwa, ciindi bantu bamu Juda nibakatolwa mubwaange, ⁴ njoocita kuti bantu bakujwe bakuzunde. Bayooyaka zilawo zyabo mukati kako akubikka zikkalilo zyabo munyika yako. Bayoolya micelo yako akunywa mukupa wako. ⁵ Njoocita kuti munzi wa Labba ube macelelo aankamela, cisi ca Amoni ciyooba bbutelo lyambele. Ndendilyo nomuyooziba kuti ndendime Mwami Leza. ⁶ Mboobu mbwaamba Mwami Leza ulati, ‘Akaambo kakuti mwakakamba amaanza aanu, akulyatauka akusekelela camoyo woonse akaambo kamapenzi aanyika ya Isilayeli, ⁷ mebo lwangu njoomuuma ajanza lyangu ndemwini, akuti mukasaalwe abamasi. Njoomugwisya mulibamasi akumunyonyweeda limwi kuzwa muzisi zyoonse. Ndiyoomunyonyoona, ndendilyo nomuyooziba kuti ndendime Mwami Leza.’”

Kusinsima azya Mowabu

⁸ Mboobu mbwaamba Mwami Leza ulati, “Akaambo kakuti Mowabu a Siiya balati, ‘Bona, bamusyobo wa Juda babambuli bamasi boonse.’ ⁹ Njoocita kuti minzi iikwabilila munyinza wa Mowabu isaalwe, kubikkilizya aminzi myeebesi ya Betijesyimoti, Baalimeoni a Kiliataimu. ¹⁰ Njooaba Bamowabu antoomwe a Baamoni kubantu bakujwe kuti babatole, kutegwa Baamoni kabataciyooyeeyegwi akati kabamasi. ¹¹ Eelyo njoosubula cisi ca Mowabu. Ndendilyo nibayooziba kuti ndendime Mwami Leza.”

Kusinsima azya Edomu

¹² Mboobu mbwaamba Mwami Leza ulati, “Akaambo kakuti bamu Edomu bakapilusya bubi kuli bamusyobo wa Juda akuba amulandu mupati mukucita oobo, ¹³ nkaako mboobu mbwaamba Mwami Leza ulati, ‘Njoouma bamu Edomu akuyoojaya bantu bamumo abanyama babo. Njoobanyonyoona kutalikila ku Temani mane kuyoosika ku Dedani bayoojaigwa munkondo. ¹⁴ Njoobweedezya bubi kuli bamu Edomu kwiindila mubantu bangu Baisilayeli, nkabela bayoocita ba Edomu mubukali bwangu bupati, bayooziba kuti ndime ndababweedezezya bubi, mbwaamba Mwami Leza.’”

Kusinsima azya Filisiti

¹⁵ Mboobu mbwaamba Mwami Leza ulati, “Akaambo kakuti Bafilisiti bakacita zyalunya akubweedezya bubi akuba aankoto mumyoyo yabo, abusinkondonyina bwakale-kale kuti banyonyoone bamu Juda, ¹⁶ nkaako mboobu mbwaamba Mwami Leza ulati, ‘Ndiyanda kuuma Bafilisiti ajanza lyangu, njoonyonyoona Bakeleti abaabo boonse basyeede kumbali ankomwe zyalwizi. ¹⁷ Njoobabweedezezya bubi citaambiki akuyoobasubula mubukali bwangu. Ndendilyo nobayooziba kuti ndendime Mwami Leza, ndaakubabweedezezya bubi.’”