Ezekiyeli 26
Kusinsima azya Taya
1 Mumwaka wakkumi aumwi, mubuzuba butaanzi bwamwezi, majwi aa Mwami Leza akandisikila kuti, 2 “Yebo omuntu,” wakati, “Mboobu bamunzi wa Taya mbobawelela, balati, ‘Jelusalemu wamwaigwa! Buvubi bwawo bwamana! Tatucikazyanyi limbi anguwo!’ 3 Nkaako mboobu mbwaamba Mwami Leza ulati, ‘Ndiyanda kukulwana omunzi wa Taya, ndiyooleta misyobo minji kuti izookulwane, mbuli lwizi noluyuuntanya mayuwe aalo. 4 Bazoonyonyoona maanda aa Taya akoola maanda aawo malamfu. Ndiyoogwisya makomwe oonse mane ukabe mbuli mwaala. 5 Kulwizi uyooba mbuli busena bwakuyanzalila tunyandi, nkaambo ndime ndaamba, mbwaamba Mwami Leza. Uyoosaalwa abamasi, 6 minzi yabo munyika eeyo iitali yansumbu iyoonyonyoonwa munkondo. Ndendilyo nobayooziba kuti ndendime Mwami Leza.’”
7 Mboobu mbwaamba Mwami Leza ulati, “Kuzwa kulubazu lwakunyika ndiyooleta Nebukadineza mwami waku Babuloni mwami wabami kuti azoolwane a Taya abasinkalaki ampi yakwe mpati. 8 Uyoonyonyoona minzi yawo munyika iitali yansumbu munkondo, uyooyaka zitantaala zyakuulwanina, uyoolundika zitantaala zyavu kubwaanda, uyoounyonyoona ankondo. 9 Maanda aako ayoopwaigwa, akumwaya maanda aako malamfu ayooolwa azilwanyo zyakwe. 10 Mabbiza aakwe manji ayoosika akukulundumwida lusuko. Maanda aako ayootenkaana akaambo kamuzunzumina wamabbiza aankondo, zikwiliba ankalaki ziyoonjila mumilyango yako mbuli ciindi linjila bantu mumunzi uujisi bwaanda budonkokede. 11 Nsumba zyamabbiza aakwe ziyoolyatauka mumigwagwa yoonse, uyoojaya bantu bako munkondo, zicinda zyako ziyumu ziyooolwa. 12 Lubono lwako luyoosaalwa, uyoobweza makwebo aako, uyoopwayaula bwaanda bwako boonse akuyoomwayaula maanda aako mabotu, uyoosowa mabwe, mapulanga amakomwe aako mulwizi. 13 Njoomanizya cikwala canyimbo zyako, nyimbo zyatuntimbwa tazikamvwigwi limbi pe. 14 Njookucita mbuli mwaala, eelyo uyooba busena bwakuyanzalila tunyandi. Tokayakululwi limbi, mebo nde Mwami Leza ndime ndaamba, mbwaamba Mwami Leza.”
15 Mboobu mbwaamba Mwami Leza azyamunzi wa Taya ulati, “Sena nkomwe zyalwizi tazikatenkaani waakuwa, ciindi bacisigwa nobayootongela, akujaigwa kwabantu bako mulinduwe? 16 Eelyo baleli boonse bakunkomwe zyalwizi bayoosiya zyuuno zyabo zyabwami, bayoosamununa majansi aabo azisani zicekawidwe. Kabayoowede bayookkala ansi, banooyookankama ciindi coonse, akugambwa akaambo kako. 17 Nkabela bayooema akaambo kako, bayooti,
‘Maawe! Wanyonyooka buti omunzi wampuwo,
uuzwide bantu bakumbali aalwizi.
Wakali aanguzu kulwizi, yebo abantu bako
wakali kuyoosya uuli woonse wakali kukkala moomo.
18 Lino nkomwe zyalwizi zilatenkaana mubuzuba bwakuwa kwako,
nsumbu mulwizi ziliyoowede akaambo kakooleka kwako.’”
19 Mboobu mbwaamba Mwami Leza ulati, “Ndaakukucita tongo, mbuli minzi iitakwe bantu, ndaakuvundausya lwizi, maanzi aalo aakukuvumba, 20 ayebo njookujaya mbuli baabo bakafwa, bantu bakale-kale. Njoocita kuti ukakkale kunsi aanyika, mbuli matongo aakale-kale, antoomwe abaabo bafwide, tokapilukili limbi nokuba kuyookkala munyika yabaumi. 21 Njookumanya cakuti uyooyoowa, tociyoobi limbi. Uyooyandaulwa, pele tokajanwi pe, mbwaamba Mwami Leza.”