Ezekiyeli 27
Lwiimbo lwakulila Taya
1 Majwi aa Mwami Leza akandisikila akuti, 2 “Yebo omuntu kolila akaambo kamunzi wa Taya, 3 ambila munzi ooyu uuyakidwe kunkomwe yalwizi, uusambala kubantu banji-banji kuti, mboobu mbwaamba Mwami Leza ulati, Yebo omunzi wa Taya, waamba kuti, ‘Mebo ndeebeka.’
4 Yebo wakali kukkala atala aalwizi,
bayaki bako bakubotya kapati. Mbuli bwato bubotu.
5 Bakabeza zisamu zyoonse zyamipulanga iizwa ku Seniya,
bakabweza milombe yaku Lebanoni kuti bakusimpile cisamu candembela.
6 Bakabeza mibanga yaku Basyani kuti bakupangile nkasi,
bakabeza mikamba iizwa ku Basyani kunkomwe zyaku Saipulasi.
7 Bakabamba cibuye cakabotezegwa ameja aabazovu.
Sani lyako lyakeenzya bwato licekawidwe bbotu lyakabambilwa ku Ijipiti,
lyakali mbuli ndembela, zivumbilizyo zyako zyakali zyacijulu-julu acisombo,
zyakali kuzwa kunkomwe zyamilonga yaku Elisya.
8 Bantu baku Sidoni a Aavadi bakali basinkasi bako bantu bako bacibwene omunzi wa Taya mbibakali kukweenzya.
9 Bantu basibupampu muli zyabwato bakali basibuuya baku Gebali,
mbibakali kweenzya bwato bwako. Mato oonse abaaenzya bakaboola kuti bazooule makwebo aako.
10 “Bantu bazwa ku Pesiya, Lidiya a Puti bakali mbebasilumamba mumpi yako. Bakaanzika ntobo angowani zyakukwabilizya bwaanda bwamunzi wako, cakuti wakaba aabulemu. 11 Bantu baku Aavadi aku Heleki bakali kulindilila bwaanda bwako mabazu oonse. Baalumi baku Gamadi bakali mumaanda aako malamfu. Bakaanzika ntobo zyabo abwaanda bwako, bakakubotya kapati.
12 “Munzi wa Taasyisyi wakali kusambalana anduwe akaambo kalubono lunji ndojisi, bakali kucincana nsiliva, lubulo, mukuba amundalila kuba makwebo. 13 Zisi zya Gilisi, Tubali a Misyeki zyakali kusambalana anduwe, bakali kucincana bazike azingwali-ngwali zyamukuba kuti batole lubono lwako.
14 “Bantu baku Betitogaama bakali kucincana mabbiza aakubelesya, aankondo amamyuulu kuti batole zyamakwebo aako.
15 “Bantu baku Lodisi bakali kusambalana anduwe, bantu banji bazwa kunkomwe zyalwizi mbibakali kuula makwebo aako, bakali kubbadela meja aabazovu amasamu aamucenje.
16 “Cisi ca Alamu cakali kusambalana anduwe akaambo kazintu zinji nzyookali kupanga, bakali kucincana mabwe meebesi, masani aacisombo, aacekawidwe, aandeketela, mabwe aaebeka aasalala pyu.
17 “Cisi ca Juda aca Isilayeli zyakali kusambalana anduwe, bakali kucincana maila aazwa ku Miniti, zinkwa, buci, amafuta aamabbona kuti batole zyamakwebo aako.
18 “Munzi wa Damasikasi akaambo kazintu nzyopanga, wakali kusambalana mumakwebo aawaini uuzwa ku Heliboni, aboya bwambelele kuzwa ku Zahaa.
19 “Badani a Bagiliki bazwa ku Uzali bakali kuula makwebo aako, bakali kucinca lubulo lufulidwe, mafuta aakasiya akalamasi, kuti batole zyamakwebo aako.
20 “Munzi wa Dedani wakali kusambalana zisani zyakubikka amisana yamabbiza.
21 “Cisi ca Alabiya abaleli boonse baku Keda mbebakali kuula makwebo aako, bakali kusambalana anduwe mumakwebo aatubelele, bagutu, ampongo.
22 “Basimakwebo baku Syeba a Laama bakali kusambalana anduwe, akaambo kamakwebo aako bakali kucincana tununkilizyo tubotu twiindene-indene atubwe tuyandisi angolida.
23 “Baku Halani, Kane a Edeni, abasimakwebo baku Syeba, Asyuu abaku Kilimadi bakali kusambalana anduwe. 24 Mucisambalilo cako bakali kusambalana anduwe azisani zibotu, zisani zyacijulu-julu, zicekawidwe, amasani amabala-mabala aajisi tukole toosedwe twaangidwe tukoto.
25 “Mato aaku Taasyisyi ngaabweza makwebo aako.
Ulilemedwe alubono lunji mukati kalwizi.
26 Basinkasi bako mbabakutola mulwizi.
Pele luuwo lwakujwe luyookupwayaula akati kalwizi.
27 Buvubi bwako, makwebo azyakusambala zyako, basimato, basikufwala mato,
bauzya makwebo aako abasilumamba bako boonse aabo basikutanta
bayooloba akati kalwizi myoo buzuba bwato bwaakukwamuka.
28 Nkomwe zyalwizi ziyootenkaana, bantu bako beendela mulwizi baakulila.
29 “Boonse basinkasi bayoosiya mato aabo,
basimato abeendela mulwizi boonse bayooimina ankomwe.
30 Bayoopozomoka akukulila kapati, bayoolivwikila vu kumitwe akulibbunta mutwe.
31 Bayoolikulula masusu akaambo kanduwe, alimwi bayoosama masaka.
Bayookulila cakupenga kapati mumoyo akulilisya.
32 Baakulila akulyeema akaambo kako, bayooema akulila nduwe kabati,
‘Nguni noliba lili wakaumuzigwa mbuli Taya uuzingulukidwe lwizi?’
33 Makwebo aako naakali kwiinzigwa mulwizi, wakali kulamya misyobo minji,
akaambo kalubono lwako lunji azyakusambala, wakavubya bami bamunyika.
34 Lino wapwaigwa alwizi, akati kampisi yamaanzi,
zyakusambala zyako ankamu yabantu boonse mwafwida aamwi.
35 Boonse bakkala munkomwe zyalwizi bagambwa akaambo kako, bami babo balazyangama cakuyoowa, baloomfokeledwe kumeso cakuyoowa. 36 Basikuula makwebo aako balakusyolooka, wamana cibyaabi, tokabi limbi pe.”