Ezekiyeli 28

Kusinsima azyamwami wa Taya

¹ Majwi aa Mwami Leza akandisikila akuti, ² “Yebo omuntu, ambila muleli wamunzi wa Taya kuti, mboobu mbwaamba Mwami Leza ulati, ‘Mukulisumpula kwamoyo wako’ ulati, ‘Ndili mbuli Leza, ndikkala acuuno ca Leza mukati kalwizi.’ Pele yebo uli muntu buyo, toli mbuli Leza, nikuba kuti uyeeya kuti uli musongo mbuli Leza. ³ Sena uli musongo kwiinda Daniyeli? Sena taakwe maseseke ngotazi? ⁴ Kwiindila mubusongo amukumvwisya kwako wakalijanina lubono akuba angolida ansiliva zinji muziyobwedo zyako. ⁵ Kwiindila muluzibo lwako lupati muli zyamakwebo, wakabuzya lubono lwako, lino akaambo kalubono lwako wakatalika kulisumpula muluyando lwako.

⁶ “Nkaako mboobu mbwaamba Mwami Leza ulati, ‘Mukuti uyeeya kuti uli musongo mbuli Leza, ⁷ njookuletela bazwamasi kuti bazookulwane, misyobo iiteengeleli pe, iizokulwana amapanga cakuti bweebesi abusongo bwako buyookweelela, bulemu bwako buyoomana. ⁸ Bayookujaya, uyoofwa lufu lubi akati kalwizi.’ ⁹ Sena uyookonzya kwaamba kuti, ‘Ndili mbuli Leza’ kumbele lyabaabo bayookujaya? Uyooba muntu buyo kutali mbuli Leza, kuli baabo bayookujaya. ¹⁰ Uyoojaigwa abatapalwidwe, bazwamasi bayookujaya. Ndime ndaamba, mbwaamba Mwami Leza.”

Lwiimbo lwakulila mwami wa Taya

¹¹ Majwi aa Mwami Leza akandisikila akuti, ¹² “Yebo omuntu, lila akaambo kamwami wa Taya umwaambile kuti, mboobu mbwaamba Mwami Leza ulati, ‘Wakali kweebelwa, wakazwide busongo kobeka.’ ¹³ Wakali mu Edeni, muunda wa Leza, mabwe meebesi oonse akali kukuletela bulemu, mabwe aabalangalisya, aatuba buu, aacisuku, aanyanzabili, aasalalisya, aabalangala, aacijulu-julu, aamweemvwe, alimwi aasalala. Mizila yako yakasyomaikidwe ngolida, zyakabambwa buzuba mbookalengwa. ¹⁴ Wakananikwa mbuli kelebu uukwabilila, iiyi, ndime ndakakusala. Wakali acilundu ca Leza cisalala, wakali kweenda akati kamabwe aamweka-mweka. ¹⁵ Kwakanyina tumpenda munzila zyako kuzwa buzuba mbookalengwa mane kusikila bubi nibwakajanwa kulinduwe. ¹⁶ Kwiindila mukusambala kwako kwakaduma, wakaba silutuzi, nkaako wakabisya. Aboobo ndakakugwisya acilundu ca Leza mukuusa, ndakakutanda okelebu uukwabilila akati kamabwe aamweka-mweka. ¹⁷ Wakatalika kulisumpula mumoyo akaambo kabweebesi bwako, akulisyoma busongo akaambo kabulemu bwako. Nkaako ndakakusowela ansi kuti bamwi bakweebele. ¹⁸ Kwiindila muzinyonyoono zyako zinji akutasyomeka mumakwebo wakasofwaazya masena aako aasalala. Nkaako ndakacita kuti kuzwe mulilo akati kako kuti ukusyukute, ndakakucita mbuli twe ansi, bantu boonse kabalangilide kababwene. ¹⁹ Masi oonse aakuzi ono aligambidwe akaambo kanduwe, wamana cibyaabi, alimwi tokabi limbi pe.”

Kusinsima azyamunzi wa Sidoni

²⁰ Majwi aa Mwami Leza akandisikila akuti, ²¹ “Yebo omuntu, kolanga ku Sidoni sinsima ziyoocitika kumunzi ooyu, ²² waambe kuti, mboobu mbwaamba Mwami Leza ‘Nsikuyandi omunzi wa Sidoni, nceticite mulinduwe ciyoondiletela bulemu. Bayooziba kuti ndendime Mwami Leza, ndaakukupa cisubulo akulitondezya kuti ndasalala mukati kako. ²³ Njookutumina cuumo, njoocita kuti bulowa bukeende mumigwagwa yako. Bajaidwe bayooba mulinduwe, bazookulwana amapanga kumabazu koonse. Ndendilyo nobayooziba kuti ndendime Mwami Leza.’

²⁴ “Bantu ba Isilayeli tabakakkali limbi abantu babi bali mbuli ziyasabavwimi amamvwa aabosya. Ndendilyo nobayooziba kuti ndendime Mwami Leza.

²⁵ “Mboobu mbwaamba Mwami Leza ulati, ‘Ndaakuyobolola bantu ba Isilayeli kuzwa mumasi oomo mubakamwaikide, njoolitondezya kuti ndasalala bamasi kabayoolangilide. Eelyo bayookkala munyika yabo, eeyo njindakapa kumubelesi wangu Jakobo. ²⁶ Bayookkala oomo cakuliiba, bayooyaka maanda akusyanga myuunda yamisaansa, bayooliiba ndaakusubula baabo boonse mbobabambene limwi bakali kubasampaula. Ndendilyo nobayooziba kuti mebo ndendime Mwami Leza wabo.’”