Ezekiyeli 29

Businsimi azyacisi ca Ijipiti

¹ Mumwaka wakkumi, mumwezi wakkumi, mubuzuba bwakkumi aabili, kabali mubwaange majwi aa Mwami Leza akandisikila akuti, ² “Yebo omuntu, langa kumwami Falo waku Ijipiti, sinsima ziyoocitika kulinguwe akucisi coonse ca Ijipiti. ³ Mwaambile kuti, mboobu mbwaamba Mwami Leza ulati, ‘Nsikuyandi yebo Falo mwami wa Ijipiti, nduwe cimpangaliko cipati cili mumilonga yako.’ Waamba kuti, ‘Nailo nguwangu, ndime ndakalipangila.’ ⁴ Pele ndiyooca myeebo yako akalobyo, ndiyoocita kuti nswi zili mutulonga twako zikanamatile kumaamba aako. Njookugwisya mutulonga twako, nswi zyoonse zinooyoonamatide kumaamba aako. ⁵ Njookusiya munkanda, yebo answi zyoonse zyamutulonga twako. Muyoofwida muluundu, tamukayobololwi nikuba kubwezegwa. Njoomupa kuti mube zilyo zyabanyama bamusokwe abayuni bamuluuwo.

⁶ “Nkaako boonse bakkala mu Ijipiti bayooziba kuti mebo ndime Mwami Leza.

“Yebo Ijipiti kugwasya ooko nkookagwasya Baisilayeli kwakali mbuli musako walubu buyo. ⁷ Nibakakuyaama wakatyoka wabayasa munkwa bakaminuka musana.” ⁸ Mboobu mbwaamba Mwami Leza ulati, “Ndiyookuletela basimapanga bazookulwane, nkabela bazoojaya bantu bako abanyama bako. ⁹ Ijipiti iyooba tongo acimpayuma. Ndendilyo nobayooziba kuti ndendime Mwami Leza.”

Mukuti wakaamba kuti, “Nailo nguwangu, ndime ndakuupanga.” ¹⁰ Nsikuyandi yebo atulonga twako. Njoocita nyika ya Ijipiti kuba tongo acimpayuma kuzwa ku Migidoli kuyoosika ku Aswani mane kuyoosika kumunyinza wa Kusyi. ¹¹ Taakwe muntu naba munyama uuyooinda mulinjiyo pe, taakwe uyookkala mulinjiyo kwamyaka iili makumi one. ¹² Njoocita nyika ya Ijipiti kuba tongo lisyeede buyo, minzi yawo iyooba tongo kwamyaka iili makumi one. Njoomwaya Baijipiti mukati kamisyobo iimbi akubamwaisya muzisi zyoonse.

¹³ Nikuba boobo mboobu mbwaamba Mwami Leza ulati, “Kumamanino aamyaka iili makumi one njooyobolola Baijipiti kuzwa mumasi oomo mubakamwaisidwe. ¹⁴ Njoobaboozya kuzwa mubwaange akubapilusya ku Patilosi kunyika yabasikale babo. Kuyooba bwami buyoolibombya. ¹⁵ Bunooli bwami bulibombya kwiindilila, tabukalisumpuli alimwi kwiinda masi amwi. Njoobucita kuti kabuyooli buteteete cakuti butakakonzyi kulela misyobo imwi. ¹⁶ Ijipiti taikabi limbi nyika njobanoosyoma Baisilayeli, pele iyooba ciyeezyo cazibi cayo cakuti banooyoopilukila kulinjiyo kuti bakagwasigwe. Ndendilyo nobayooziba kuti ndendime Mwami Leza.”

Mwami Nebukadineza uzoozunda cisi ca Ijipiti

¹⁷ Mumwaka wamakumi obilo aciloba, mumwezi mutaanzi, mubuzuba butaanzi, majwi aa Mwami Leza akandisikila akuti, ¹⁸ “Yebo omuntu, Nebukadineza mwami waku Babuloni wakabelesya mpi yakwe kuti alwane munzi wa Taya, bantu boonse bakali aalunkulu, bakalicuzaukide amakuko. Nikuba boobo walo ampi yakwe taakwe ncobakajana mukulwana Taya. ¹⁹ Nkaako mboobu mbwaamba Mwami Leza ulati, ‘Ndiyanda kwaaba cisi ca Ijipiti kuli Nebukadineza mwami waku Babuloni, nkabela uyootola lubono lwaco. Uyoobweza akusaala cisi kuti cibe cakuvola campi yakwe. ²⁰ Ndamupa cisi ca Ijipiti kuti cibe bulumbu bwakwe, nkaambo kaceeco walo ampi yakwe ncibakandicitila, mbwaamba Mwami Leza.’

²¹ “Mubuzuba oobo njooyumya Baisilayeli, alimwi njoocita kuti yebo Ezekiyeli ukaambe akati kabo. Eelyo bayooziba kuti ndendime Mwami Leza.”