Ezekiyeli 30
Mwami Leza uyoosubula cisi ca Ijipiti
1 Majwi aa Mwami Leza akandisikila akuti, 2 “Yebo omuntu, sinsima waambe kuti mboobu mbwaamba Mwami Leza ulati, lila waambe kuti,
‘Maawe kubuzuba oobo!’
3 Buzuba buli aafwiifwi, buzuba bwa Mwami Leza buli aafwiifwi,
buzuba bwamakumbi, ciindi cakunyonyoonwa kwabamasi.
4 Basimapanga bazoolwana cisi ca Ijipiti, mapenzi ayoosikila cisi ca Kusyi.
Bamu Ijipiti banji bayoojaigwa, lubono lwaco luyootolwa, ntalisyo zyaco ziyoomwaigwa.
5 “Cisi ca Kusyi a Puti, ca Lidiya acisi coonse ca Alabiya, Libiya, abantu bamucisi eeco cakasyomezegwa bayoojaigwa apanga antoomwe abamu Ijipiti.”
6 Mboobu mbwaamba Mwami Leza ulati, “Boonse bagwasya Ijipiti bayoofwa, nguzu zyabo nzyobalisumpwida ziyoobeelela. Kuzwa ku Migidoli kuyoosika ku Aswani bantu bako bayoojaigwa munkondo kabacili mu Ijipiti, mbwaamba Mwami Leza. 7 Bayookkala buyo mbuboobu akati kazisi zisyeede buyo, minzi yabo iyooba tongo akati kaminzi iimwaidwe. 8 Ndendilyo nobayooziba kuti ndendime Mwami Leza, ndaakutenta cisi ca Ijipiti akupwayaula boonse bacigwasya. 9 Mubuzuba oobo njootuma babelesi kabatantide mato kuti bakayoosye bantu ku Kusyi baliibide. Bayoopenga kapati mubuzuba bwakunyonyoonwa kwa Ijipiti, nkaambo buzuba oobo bulasika ncobeni.”
10 Mboobu mbwaamba Mwami Leza ulati, “Makamu-makamu aamu Ijipiti njooalobya kwiindila muli Nebukadineza mwami waku Babuloni. 11 Walo ampi yakwe, iiinda bamasi oonse lunya, bayooletwa kuti bazoonyonyoone nyika. Bayoolwana bamu Ijipiti amapanga, nyika yoonse iyoozula bantu bajaidwe.
12 “Njooyuminizya tulonga toonse tukunkila mumulonga wa Nailo, akuyooaba nyika kubantu babi, kwiindila muli bamasi njoonyonyoona nyika azintu zyoonse zili mulinjiyo. Mebo nde Mwami Leza ndime ndaamba.”
13 Mboobu mbwaamba Mwami Leza ulati, “Njoonyonyoona mituni akumanizya zikozyanyo mu Memfisi. Takuciyoobi limbi muleli mu Ijipiti, nyika yoonse njooiyoosya. 14 Njoomwaya munzi wa Patilosi, njootenta munzi wa Zowani, akuyoopa cisubulo kumunzi wa Tebesi. 15 Njookalalila bamu Pelusiyamu, mayubilo mayumu aabamu Ijipiti, akuyoonyonyoona makamu-makamu aamu Tebesi. 16 Njootenta cisi ca Ijipiti, Pelusiyamu uyooalabana mumacise. Tebesi uyoomwaigwa aguwo pati, Memfisi unooli mumause. 17 Bakubusi baku Heliyopolisi abaku Bubasitisi bayoojaigwa munkondo, ayalo minzi iyoojatwa. 18 Buzuba oobu mu Taapenesi buyooba bwamudima, ndaakunyonyoona cisi ca Ijipiti, ooko nguzu zyaco ziyooela. Ciyoovumbwa makumbi, aminzi yaco yoonse iyoojatwa. 19 Mbombuboobu mbwenjoopa cisubulo kucisi ca Ijipiti, eelyo bayooziba kuti ndendime Mwami Leza.”
Kuzundwa kwamwami wa Ijipiti
20 Mumwaka wakkumi aumwi mumwezi mutaanzi, mubuzuba bwaciloba Baisilayeli kabali mubwaange, majwi aa Mwami Leza akandisikila akuti, 21 “Yebo omuntu, ndatyola kuboko kwa Falo mwami wa Ijipiti. Takwaangidwe kuti kupone nikuba kubikkwa kasengele kuti kusime kutegwa akonzye kujata panga. 22 Nkaako mboobu mbwaamba Mwami Leza ulati, ‘Nsimuyandi Falo mwami wa Ijipiti. Njootyola maboko aakwe oonse, kuboko kuumbulu akooko kutyokede, njoocita kuti panga likamuloke. 23 Njoomwaisya Baijipiti akati kabamasi akubamwaila muzisi zyoonse. 24 Mwami waku Babuloni njoomuyumya kapati, akuyoomupa panga lyangu, pele njootyoloola maboko aa Falo, nkabela uyootongela kapati munkondo. 25 Mwami waku Babuloni njoomuyumya, pele maboko aa Falo ayoolebuka. Ndendilyo nobayooziba kuti ndendime Mwami Leza, ndaakupa panga lyangu kumwami waku Babuloni kuti akalibelesye mukulwana cisi ca Ijipiti. 26 Njoomwaisya Baijipiti akati kabamasi akubamwaila muzisi zyoonse. Ndendilyo nobayooziba kuti ndendime Mwami Leza.’”