Ezekiyeli 31

Mbwaakeelanya cisi ca Ijipiti kumulombe

¹ Mumwaka wakkumi aumwi, mumwezi watatu mubuzuba butaanzi, kabali mubwaange, majwi aa Mwami Leza akandisikila akuti,

² “Yebo omuntu, ambila Falo mwami wa Ijipiti amakamu-makamu aakwe kuti,

Nguni uukonzyanyizigwa anduwe mubulemu?

³ Koyeeya zya Asiliya, wakali mbuli mulombe mu Lebanoni,

wakajisi mitabi mibotu yakali kupa cimvule kucisaka coonse,

wakali mulamfu, mpela yamitabi yawo yakali kulibonya mucoonde.

⁴ Maanzi ngaakaukomezya, tusensa tulamfu ntutwakacita kuti ukulisye,

milonga yawo yakali kweenda koonse-koonse cakuzinguluka cisiko cako,

tunkolola twayo twakali kukunkila kumisamu yamusokwe.

⁵ Nkaako mulombe wakali mulamfu kwiinda misamu yamusokwe yoonse,

wakasyuuka kapati, mitabi yawo yakalampa kapati,

wakavwevwela kapati akaambo kamaanzi manji.

⁶ Bayuni bamuluuwo boonse bakayaka ziteente mumatewo aawo,

banyama bamusokwe boonse bakali kuzyalila munsi aamitabi yawo,

misyobo yoonse yampuwo yakali kukkala mucimvule cawo.

⁷ Wakali kweebeka kabotu, wakavwevwede matewo,

nkaambo miyanda yawo yakajisi maanzi manji.

⁸ Milombe yakali mumuunda wa Leza tiiyakali kukonzya kuuinda,

aalo matewo amipulanga taakeelana amitabi yawo.

Taakwe musamu nuuba omwe mumuunda wa Leza wakeelene anguwo mubweebesi pe.

⁹ Ndakuucita kuti weebeke kuujisi amitabi minji,

aboobo misamu yoonse yamu Edeni mumuunda wa Leza yakaufwida munyono.

¹⁰ “Nkaako mboobu mbwaamba Mwami Leza ulati, ‘Mukuti wakali mulamfu cakuti mpela yawo yakali kulibonya mucoonde, akuti wakali kulisumpula akaambo kabulamfu bwawo, ¹¹ ndakuuaba kumuleli wamasi, kutegwa aucite kweendelana abubi bwawo. Ndakausowa, ¹² nkabela bantu basilunya bazwa mumasi aambi, bakaugonka akuusiya. Matewo aawo akawida muzilundu amumakkuti oonse, mitabi yawo ilikwapukide mutunkolola toonse twamucisi. Misyobo yoonse yamunyika yakazwa mucimvule cawo akuusiya. ¹³ Bayuni bamuluuwo boonse bakakkala mumitabi yawo iiwide, abalo banyama boonse bamusokwe bakali akati kamitabi yawo. ¹⁴ Nkaako kunoonyina misamu iimbi iili munsi aamaanzi iiyoolampa kapati cakulisumpula, tiikalampi cakuti mpela yayo mucoonde kaziyoolibonya. Taakwe misamu niiba buti ijisi maanzi manji iitikalampe boobo pe, yoonse iyoogonkwa ikafwe, iyoobbila munyika, akufwa mbuli muntu nsi, mbubonya mbuli baabo bafwa.’”

¹⁵ Mboobu mbwaamba Mwami Leza ulati, “Mubuzuba mbuuyoofwa, njoocita kuti tusensa twamaanzi tukaulile, njoosinka tulonga twawo, maanzi aawo manji ayoolesegwa. Akaambo kanguwo njooleta mudima a Lebanoni, misamu yoonse yamusokwe iyooyuma. ¹⁶ Njoocita kuti bamasi bakakankame baakumvwa kuwa kwawo, ndaakuujaya abaabo bayoofwa. Eelyo misamu yoonse yamu Edeni, misamu mibotu kapati yamu Lebanoni, misamu yoonse yakali kutililwa kabotu, yakasowelwa kunsi lyanyika. ¹⁷ Aabo bakali kukkala mucimvule cawo, bamasi baugwasya abalo bakafwida antoomwe anguwo, waakuba antoomwe abaabo bakajaigwa munkondo.

¹⁸ “Musamu nzi wamu Edeni uunga wakonzyanyizigwa anduwe mubulemu amubupati? Nikuba boobo ayebo uyootemenwa limwi amisamu yamu Edeni mukafwide limwi kunsi lyanyika, uyoofwida limwi antoomwe abatapalwidwe, aabo bakajaigwa munkondo.

“Uuyoofwa boobu ngu Falo abamakamu-makamu aakwe oonse, mbwaamba Mwami Leza.”