Ezekiyeli 32
Mwami wa Ijipiti wakonzyanyizigwa aciwena
1 Mumwaka wakkumi aibili, mumwezi wakkumi aibili mubuzuba butaanzi, Baisilayeli kabali mubwaange, majwi aa Mwami Leza akandisikila akuti, 2 “Yebo omuntu, lila akaambo ka Falo mwami wa Ijipiti,” umwaambile kuti, “Uli mbuli syuumbwa akati kabamasi, uli mbuli cimpangaliko mulwizi cisotooka mumilonga yako ulavundaanya maanzi amaulu aako akukondoola milonga.” 3 Mboobu mbwaamba Mwami Leza ulati, “Njookuca akanyandi kangu amakamu-makamu aabantu, nkabela bayookukwelela anze akanyandi kangu. 4 Njookusowela anyika, njookusowela antangalala. Njoolekela bayuni bamuluuwo boonse kuti bakakkale alinduwe, abalo banyama bamusokwe boonse njoobalekela kuti bakakuzapaule. 5 Njooyanika nyama yamubili wako azilundu, makkuti njooazuzya azibeela-beela zyako. 6 Njootesya nyika abulowa bwako bukunka mane kuyoosika kuzilundu, tunkolola tuyoozula nyama yamubili wako. 7 Ndaakukuzimaanya, njoovumbilila julu kuti nyenyezi zyalyo zikabaye, njoovumbilila zuba akkumbi, awalo mwezi tuukabali pe. 8 Mimuni yoonse yamujulu ikabaye kulinduwe, njooleta mudima munyika yako.” Mbwaamba Mwami Leza.
9 “Njoopenzya bantu banji mumyoyo yabo ndaakukunyonyoona akati kabamasi, akati kazisi nzyootakazi pe. 10 Njoocita kuti bantu banji bakagambwe anduwe, bami babo bayookankama cakuyoowa akaambo kako ndaakuvuumusya panga lyangu kumbele lyabo. Kuzwida mubuzuba oobo banooyooyoowa mubuumi bwabo boonse.”
11 Mboobu mbwaamba Mwami Leza ulati, “Panga lyamwami waku Babuloni lizookulwana yebo. 12 Njoocita kuti makamu-makamu aako akajaigwe munkondo abaalumi basintanze, bantu basilunya kapati. Bayoomanizya kulisumpula kwacisi ca Ijipiti, makamu-makamu aaco oonse ayoolobezegwa. 13 Njoonyonyoona ŋombe zyaco zyoonse zili kumbali lyamaanzi manji, taacikwe muntu uciyooavundaanya nokuba kukondoola ansumba zyaŋombe. 14 Eelekela maanzi aaco kuti akabatame akucita kuti milonga ikeende mbuli mafuta, mbwaamba Mwami Leza. 15 Lino nenzoosaala cisi ca Ijipiti cikabe tongo, nenzoogwisya zintu zyoonse zili mulincico, ndaakujaya boonse bakkala moomo, ndendilyo nobayooziba kuti ndendime Mwami Leza. 16 Oolu ndolwiimbo lwakulizya Ijipiti. Bakaintu bazisi zimbi bayoolwiimba, kulila Ijipiti amakamu-makamu aaco oonse, bayoolwiimba, mbwaamba Mwami Leza.”
Cikkalilo cabafu
17 Mumwaka wakkumi aibili, mubuzuba bwakumi aasanu bwamwezi kabali mubwaange, majwi aa Mwami Leza akandisikila akuti, 18 “Yebo omuntu, lila akaambo kamakamu-makamu aa Ijipiti, batumine kunsi aanyika balo abakaintu bamisyobo yanguzu antoomwe abaabo bafwa. 19 Baambile kuti,
‘Sena nywebo mulayandwa kwiinda bamwi?
Amufwe muzikkwe akati kabatapalwidwe.’
20 Bayoowida akati kabaabo bajaidwe apanga. Panga lyasomonwa kale,
acikwelaanyizigwe antoomwe amakamu-makamu aaco oonse.
21 Kuzwa mucikkalilo cabafu mumonya oomo basololi basinguzu
bayooambila cisi ca Ijipiti abaabo bacigwasya kuti,
‘Bakazikkwa balilede antoomwe abatapalwidwe, abaabo bakajaigwa munkondo.’
22 “Cisi ca Asiliya cili kooko antoomwe ampi yaco yoonse, cilizingulukidwe azyuumbwe zyabaabo boonse bajaidwe, boonse aabo bakajaigwa munkondo. 23 Zyuumbwe zyabo zili mumpisi yadindi, mpi yaco ilicizingulukide. Boonse aabo bakali kuyoosya bantu munyika yabaumi balijaidwe, bakajaigwa munkondo. 24 Cisi ca Elamu nkocili, amakamu-makamu aabantu baco akazingulukide cuumbwe caco. Boonse balijaidwe, bakajaigwa munkondo. Boonse bakali kuyoosya bantu munyika yabaumi bakainka kunsi aanyika kabatapalwidwe. Bakafwa amause aabo, bakafwida amwi abaabo baya kwacimvumwe. 25 Cakalazikwa akati kabajaidwe, makamu-makamu akazingulukide cuumbwe caco. Boonse batapalwidwe bakajaigwa munkondo. Akaambo kakuti bakali kuyoosya bantu munyika yabaumi, bakafwa amause aabo, bakafwida amwi abaabo baya kwacimvumwe, bakalazikwa akati kabajaidwe.
26 “Cisi ca Misyeki aca Tubali nkozili, makamu-makamu aabantu bazyo azingulukide zyuumbwe zyazyo. Boonse tabapalwidwe, bakajaigwa munkondo nkaambo bakali kuyoosya bantu munyika yabaumi. 27 Sena tabalede antoomwe abasilumamba batapalwidwe aabo bakajaigwa, aabo bakazikkwa muzyuumbwe antoomwe azilwanyo zyabo zyankondo, iiyi bakatulisigwa mapanga aabo, azyalo ntobo zyabo zyakabikkwa kunsi lyamafuwa aabo? Nkaambo bantu basintanze aaba bakali kuyoosya bantu munyika yabaumi.
28 “Ayebo o Falo uyootyoloolwa akulazikkwa akati kabatapalwidwe, aabo bakajaigwa munkondo.
29 “Cisi ca Edomu nkocili, bami baco abaleli baco, nikuba kuti mbaasinguzu, balilazikidwe antoomwe abaabo bakajaigwa munkondo. Balilede abatapalwidwe, abaabo bayanda kufwa.
30 “Baleli bakunyika boonse a Basidoni boonse bakaliko, bakainka abajaidwe camause nikuba kuti mbibakali kuyoosya bantu munguzu zyabo. Bakafwa kabatapalwidwe antoomwe abaabo bakajaigwa munkondo, baluuside antoomwe abaabo bayanda kufwa.
31 “Falo, ampi yakwe yoonse, bayoobabona, uyooumbulizigwa aakubona makamu-makamu aakwe oonse aabo bakajaigwa munkondo, mbwaamba Mwami Leza. 32 Nikuba kuti ndakamulekela kuti kayoosya bantu munyika yabaumi, Falo antoomwe amakamu-makamu aakwe bayoolazikwa akati kabatapalwidwe, antoomwe abaabo bakajaigwa munkondo, mbwaamba Mwami Leza.”