Ezekiyeli 33

Leza mbwaakabikka Ezekiyeli kuba mulindizi

¹ Majwi aa Mwami Leza akandisikila akuti, ² “Yebo omuntu, ambila basicisinyoko kuti, ‘Ciindi nendileta nkondo mucisi, kwamana bantu bacisi eeco basala umwi wabo kuti abe mulindizi, ³ eelyo wabona bantu bazoolwana cisi cakwe, mpawo wasiba mweembo kuti acenjezye bantu, ⁴ kuti naa umwi wamvwa kwamana tacenjeli wamana wajaigwa, mulandu wakwe mwini walijazya.’ ⁵ Lino mbokunga wamvwa kulila kwamweembo pele kwamana walo tacenjeli bulowa bwakwe buli aalinguwe mulandu uyooba wakwe. Nikwali kuti wacenjela naalifutula lwakwe mwini. ⁶ Pele kuti mulindizi wabona basinkondonyina kabazabuza, kwamana walo tasibi mweembo kuti acenjezye bantu cakuti umwi wabo wajaigwa munkondo, ooyo wafwa wafwida zinyonyoono zyakwe, pele mulindizi njoomupa mulandu wabulowa bwayooyo wajaigwa.

⁷ “Yebo omuntu, ndakucita kuti ube mulindizi wa Isilayeli, nkaako swiilila majwi ngendaamba, ubacenjezye amakani ngendaamba. ⁸ Kuti naa ndaambila muntu, ‘Omuntu sizibi, kasimpe ulafwa,’ kwamana yebo tomwaambili kuti asiye nzila zyakwe, muntu sizibi ooyo uyoofwa akaambo kazinyonyoono zyakwe, pele njoopa nduwe mulandu wabulowa bwakwe. ⁹ Pele kuti naa wamucenjezya muntu sizibi ooyo kuti asiye nzila zyakwe, kwamana walo taciti boobo, ulafwa akaambo kazinyonyoono zyakwe, pele yebo ulafutuka.

Muntu umwi aumwi mbweelede kulibamba

¹⁰ “Yebo omuntu, ambila musyobo wa Isilayeli kuti, mwaamba kuti, ‘Milandu yesu azibi zyesu zyoonse zyatulemena, lino twamana akaambo kazinyonyoono. Ino inga twapona buti?’ ¹¹ Baambile kuti, ‘Mbubonya mbuli mbwendi muumi, mbwaamba Mwami Leza, nsibotelwi mulufu lwabasizibi, pele ndiyanda kuti basiye nzila zyabo bapone. Amupiluke, amupiluke musiye nzila zyanu zibi! Nkaambo nzi nomuyanda kufwa nomusyobo wa Isilayeli?’

¹² “Nkaako yebo omuntu ambila basicisinyoko kuti, ‘Bululami bwamuntu uululeme tabukonzyi kumufutula kuti kataswiilili, abwalo bubi bwasizibi tabukonzyi kumujazya kuti naa wabusiya. Muntu uululeme kuti naa wabisya takalekwi kapona akaambo kabululami bwakwe bwakaindi.’ ¹³ Kuti naa ndaambila muntu mululami kuti ulapona ncobeni, pele kwamana walo kasyoma bululami bwakwe akubisya, taakwe cintu nociba comwe ciluleme ncaakacita ciyooyeeyegwa, ulafwa akaambo kacibi eeco ncaakacita. ¹⁴ Kuti naa ndaambila sizibi kuti, ‘Kasimpe ulafwa,’ pele kwamana waleka cibi cakwe, wacita ciluzi, ciluleme, ¹⁵ naa wapilusya eeco ncaakatolede kuti cibe cijatilizyo kucikwelete cakwe, wapilulusya ceeco ncaakabbide, watobela malailile aayo aapa buumi, tabisyi, ulapona ncobeni, takoofwa pe. ¹⁶ Taakwe zibi eezyo nzyaakacita ziyooyeeyegwa. Wacita ciluzi, ciluleme, ulapona ncobeni.

¹⁷ “Nikuba boobo basicisinyoko balati, ‘Nzila ya Mwami Leza tiiluzi.’ Pele ninzila yabo iitaluzi pe. ¹⁸ Kuti naa muntu uululeme wasiya bululami bwakwe akubisya, uyoofwa akaambo kabubi oobo. ¹⁹ Kuti naa muntu sizibi wasiya bubi bwakwe akucita ciluzi, ciluleme, ulapona mukucita boobo. ²⁰ Nikuba boobo nywebo nomusyobo wa Isilayeli mulati, ‘Nzila ya Mwami Leza tiiluzi.’ Pele njoobeteka umwi aumwi kweendelana anzila zyakwe.”

Makani aaamba zyakuwa kwa Jelusalemu

²¹ Mumwaka wakkumi katuli mubwaange mubuzuba bwasanu, muntu wakaloboka kuzwa ku Jelusalemu wakaboola kulindime akuti, “Munzi wawa!” ²² Lino kumangolezya muntu ooyo katanasika, nguzu zyajanza lya Mwami Leza zyakandisikila, ndakakonzya kukanana alimwi. Ndakakonzya kukanana tiindakacuumwide pe.

Zinyonyoono zyabantu

²³ Mpawo majwi aa Mwami Leza akandisikila akuti, ²⁴ “Yebo omuntu, bantu bakkala mumatongo aali munyika ya Isilayeli balati, ‘Abulahamu wakali alikke, nikuba boobo kajisi nyika. Pele swebo tuli banji, kasimpe aswebo twakapegwa nyika eeyi kuti ibe yesu.’ ²⁵ Nkaako baambile kuti, mboobu mbwaamba Mwami Leza ulati, ‘Lino mbokunga mulya nyama iicijisi bulowa akukomba mituni yanu akutila bulowa, sena mweelede kutola nyika?’ ²⁶ Musyoma mapanga aanu, mucita zintu zisesemya, umwi aumwi usofwaazya mukamweenzinyina. Sena mweelede kutola nyika.

²⁷ “Baambile kuti, mboobu mbwaamba Mwami Leza ulati, ‘Mbubonya mbuli mbwendi muumi, aabo basyeede mumatongo bayoojaigwa munkondo, aabo bali musokwe njoobaaba kubanyama bamusokwe kuti bakaligwe, aabo bali mumayubilo mayumu mumampangala bayoofwa acuumo.’ ²⁸ Njoocita kuti nyika ikasyaale buyo, kulisumpula kwamunguzu zyabo kuyoomana, zilundu zya Isilayeli ziyoosyaala buyo cakuti taakwe muntu uuyookosola oomo pe. ²⁹ Ndendilyo nobayooziba kuti ndendime Mwami Leza, ndaakucita kuti nyika ikasyaale buyo akaambo kazintu zisesemya zyoonse nzyobakacita.

³⁰ “Pele yebo omuntu, basicisinyoko balakanana antoomwe zyanduwe kumbali aabwaanda aamilyango yamaanda, balati kuli umwi aumwi, ‘Boola uzoomvwe makani aazwa ku Mwami Leza.’ ³¹ Bantu bangu balanga kulinduwe mbuli mbobacita lyoonse, balakkala kumbele lyako kuti baswiilile majwi aako, pele tabayandi kucita eezyo nzyoamba. Balaamba zyabukombi bwabo amilomo yabo, pele myoyo yabo njabusyaacivulemwangu butaluzi. ³² Kasimpe yebo uli mbuli muntu wiimba nyimbo zyaluyando kulimbabo ajwi bbotu, muntu uulizya kabotu eeco ncauma, nkaambo balamvwa majwi aako, pele tabaciti nzyobaambila pe.

³³ “Eezi zyoonse zyaakucitika, kasimpe ziyoocitika ncobeni, ndendilyo nibayooziba kuti musinsimi waliboolede akati kabo.”