Ezekiyeli 34

Beembezi ba Isilayeli

¹ Majwi aa Mwami Leza akandisikila akuti, ² “Yebo omuntu, sinsima azyabeembezi ba Isilayeli, sinsima ubaambile kuti, mboobu mbwaamba Mwami Leza ulati, ‘Maawe kubeembezi ba Isilayeli bagamide kulisanina! Sena beembezi tabeelede kusanina butanga?’ ³ Mulalya bwanda, musama zisani zyaboya bwambelele akujaya banyama baneneede, pele tamusanini butanga pe. ⁴ Tiimwakaziyumya zigonkeledwe, nokuba kusilika ziciswa, nokuba kuzyaanga tusengele zityokede. Tiimwakaziyobolola zileede nokuba kuziyandaula zisweekede. Mulazyeembela calunya acaluciso. ⁵ Nkaako zyakamwaikizyanya nkaambo kwakanyina mweembezi, lino nizyakamwaikizyanya zyakaba cilyo cabanyama boonse bamusokwe. ⁶ Mbelele zyakali kwiingaila muzilundu zyoonse, amutulundu toonse tulamfu. Zyakalimwaikide munyika yoonse, nkabela taakwe wakaziyandaula naa kuzilangaula.

⁷ “Nkaako nywebo nobeembezi, amumvwe majwi aa Mwami Leza. ⁸ Ulati, ‘Mbubonya mbwendi muumi, mbwaamba Mwami Leza, mukuti zyakasaalwa akuba cilyo cabanyama boonse bamusokwe, alimwi beembezi bangu tiibayandaula butanga bwangu, pele bakagama kulisanina beni muciindi cakuti basanine butanga bwangu.’ ⁹ Nywebo nobeembezi amumvwe majwi aa Mwami Leza. ¹⁰ Mboobu mbwaamba Mwami Leza ulati, ‘Ndibijilidwe abeembezi nkaako ndabapa mulandu akaambo kabutanga bwangu. Ndilabalesya kweembela butanga bwangu kutegwa beembezi kabatacigamide kulisanina lwabo beni pe. Njoovuna butanga kuzwa kulimbabo, butakabambi cilyo cabo.’

Mweembezi mubotu

¹¹ “Lino mboobu mbwaamba Mwami Leza ulati, ‘Mebo lwangu ndazilangaula mbelele zyangu, njooziyandaula ndemwini.’ ¹² Mbubonya mbuli mweembezi mbwalangaula butanga bumwaikizyenye neembela, mbubonya oobo mbwenjoolangaula mbelele zyangu. Njoozivuna kuzwa mumasena oonse oomo muzyakamwaikilide mubuzuba bwamakumbi aasiya mbi. ¹³ Njoozigwisya mumisyobo akuziyobolola kuzwa muzisi mozibede, ndiyoozileta munyika yazyo zini. Ndiyoozyeembelela azilundu zya Isilayeli, kumbali aatulonga mumasena oonse aamunyika. ¹⁴ Ndiyoozyeembelela mumacelelo mabotu, zinooyoocelela amitwe yazilundu zya Isilayeli. Ooko ziyoobuta mumacelelo mabotu, ziyoocelela mumacelelo aabwizu bunji muzilundu zya Isilayeli. ¹⁵ Mebo lwangu ndime eetikeembele mbelele zyangu, ndiyoozibutya, mbwaamba Mwami Leza. ¹⁶ Ndiyooyandaula zisweekede akuyoonyona zileede. Ndiyooanga tusengele kulizityokede akuyumya zigonkeledwe, pele eezyo zineneede azyanguzu ndiyoozinyonyoona. Ndiyooembela butanga mubuluzi.

¹⁷ “Pele nywebo nobutanga bwangu, mboobu mbwaamba Mwami Leza ulati, ‘Ndiyoobeteka akati kambelele imwi aimwi, akati kabagutu ampongo.’ ¹⁸ Sena tamulamwi kucela mumacelelo mabotu? Sena mweelede kulyatauka macelelo aali oonse amaulu aanu? Sena tamulamwi kunywa maanzi aanjoloma? Sena mweelede kukondoola maanzi aali oonse amaulu aanu? ¹⁹ Sena butanga bwangu bweelede kucela mumacelelo ngumwakalyatauka akunywa maanzi ngomwakakondoola amaulu aanu?

²⁰ “Nkaako mboobu mbwaamba Mwami Leza kulinzizyo, ulati, ‘Amubone, mebo lwangu njoobeteka akati kambelele zineneede ambelele zikotede.’ ²¹ Zigonkedwe muzitonkele alubazu akuzyuuma kuzwa mubutanga, ²² ndavuna butanga cakuti tazikasaalwi limbi. Ndiyoobeteka akati kambelele imwi aimwi. ²³ Ndiyoozipa mweembezi omwe, mubelesi wangu Devedi nkabela uyoozyeembela, uyoozyeembela, uyooba mweembezi wazyo. ²⁴ Mebo nde Mwami Leza ndiyooba Leza wabo, Devedi mubelesi wangu uyooba muleli akati kabo. Mebo nde Mwami Leza ndime ndaamba.

²⁵ “Ndiyoopanga cizuminano caluumuno ambabo akuyoogwisya banyama bamusokwe munyika kutegwa kaziyookkala munkanda akoona cakuliiba musokwe. ²⁶ Njoozileleka amasena aazingulukide cilundu cangu. Njootuma lunywaanywa muciindi ceelede, kuyooba zileleko. ²⁷ Masamu aamusokwe ayoozyala micelo, munyika kuyoomena zisyango, bantu bayookkala munyika yabo cakuliiba. Bayooziba kuti ndendime Mwami Leza, ndaakutyola joko lyabuzike akubafutula kuzwa kubantu aabo bakabacita bazike. ²⁸ Tabakasaalwi limbi bayookkala cakuliiba, alimwi taakwe uuyoobayoosya pe. ²⁹ Njoobapa nyika iizizilwe kuti ikomena zyakulya, munyika eeyo tabakapenzegwi limbi anzala pe, nokuba kuyoosampaulwa limbi abamasi. ³⁰ Eelyo bayooziba kuti mebo nde Mwami Leza wabo ndili aambabo akuti, balo bamusyobo wa Isilayeli mbantu bangu, mbwaamba Mwami Leza. ³¹ Nywebo nombelele zyangu, nombelele zyamacezezyo aangu, ndinywe bantu bangu ambebo ndime Leza wanu, mbwaamba Mwami Leza.”