Ezekiyeli 35

Leza mbwayoosubula Edomu

¹ Majwi aa Mwami Leza akandisikila akuti, ² “Yebo omuntu, langa kucilundu ca Siiya, sinsima azyancico ³ kuti, mboobu mbwaamba Mwami Leza ulati,

‘Nsibotelwi anduwe ocilundu ca Siiya,

ndiyanda kukulwana ajanza lyangu akukucita kuti ube nyika iisyeede buyo.’

⁴ Minzi yako njooicita kuti ibe matongo,

eelyo uyoosyaala buyo. Ndendilyo noyooziba kuti ndendime Mwami Leza.

⁵ “Nkaambo kakuti wakakweekede Baisilayeli akubaaba kuli basinkondonyina muciindi camapenzi aabo, ciindi cakusubulwa kwabo nicakasika, ⁶ nkaako mbubonya mbuli mbwendi muumi, mbwaamba Mwami Leza, njookwaaba kulufu, luyookweenzya. Nkaambo wakali kuyanda kujaya, ayebo lufu luyookweenzya. ⁷ Cilundu ca Siiya njoocicita kuti cikasyaale buyo, njoomanizya boonse beendela ooko. ⁸ Zilundu zyako ziyoozula bajaidwe, aabo bayoojaigwa bayoowida mutulundu twako, mumakkuti amutulonga twako. ⁹ Njoocita kuti ukasyaale buyo kwalyoonse alyoonse, minzi yako tiikakkalwi limbi. Ndendilyo noyooziba kuti ndendime Mwami Leza.

¹⁰ “Mukuti wakati, ‘Misyobo yobilo eeyi azisi ziyooba zyesu tuzoozitola,’ ‘Nikuba kuti ambebo nde Mwami Leza ndakalimo oomo, ¹¹ nkaako mbubonya mbuli mbwendi muumi, mbwaamba Mwami Leza, njookucita kweendelana abukali amunyono ngookatondezya mukubasulaika, njoolizibya mebo lwangu akati kabo ndaakukubeteka.’ ¹² Lino uyooziba kuti mebo nde Mwami Leza ndimvwide zintu zibi zyoonse nzyookaamba mukusampaula zilundu zya Isilayeli. Wakati, ‘Zyakasyaala buyo akwaabwa kulindiswe kuti tuzilye.’” ¹³ Wakalisumpula kulindime akukanana majwi mabi cakutalilesya, mebo ndakalimvwida ndemwini. ¹⁴ Mboobu mbwaamba Mwami Leza ulati, “Lino nyika yaakusekelela, yebo njoocita kuti ukasaalwe. ¹⁵ Akaambo kakuti wakasekelela ciindi lukono lwamusyobo wa Isilayeli nilwakasaalwa, nkankakaako nceekucita boobu. Uyoosyaala buyo ocilundu ca Siiya, yebo abamu Edomu boonse. Ndendilyo niyooziba kuti ndendime Mwami Leza.”