Ezekiyeli 36

Leza mbwaakaleleka Isilayeli

¹ “Yebo omuntu, sinsima azilundu zya Isilayeli uti, ‘Nywebo nozilundu zya Isilayeli, amuswiilile majwi aa Mwami Leza.’ ² Mboobu mbwaamba Mwami Leza ulati, ‘Sinkondonyoko wakati kulindinywe,’ ‘Ee buya, zilundu zyakale-kale twazitola.’ ³ Nkaako sinsima uti, mboobu mbwaamba Mwami Leza ulati, ‘Ciindi misyobo yakamweengelede niyakamujata akusaala zilundu zya Isilayeli, boonse bakamucita cisesyo.’ ⁴ Nkaako nozilundu zya Isilayeli, amuswiilile majwi aa Mwami Leza aakuti, mboobu Mwami Leza mbwaambila zilundu atulundu, tulonga amakkuti, matongo aminzi yakatijigwa eeyo yakasaalwa akufubaazigwa abamisyobo imwi yabamasi iimuzingulukide. ⁵ Mboobu mbwaamba Mwami Leza ulati, ‘Mubukali bwangu bupya ndaamba cakutapatila bamasi boonse abamucisi ca Edomu, nkaambo kakusekelela caluciso mumyoyo yabo bakacita kuti nyika yangu ibe yabo kutegwa basaale nyika yangu amacelelo aayo.’ ⁶ Nkaako sinsima azyanyika ya Isilayeli, waambile zilundu atulundu, tulonga amakkuti kuti, mboobu mbwaamba Mwami Leza ulati, ‘Ndaamba mubukali bwangu nkaambo kakuti mwacibona kusampaulwa abamasi.’ ⁷ Nkaako mboobu mbwaamba Mwami Leza ulati, ‘Ndakonkezya akutambika kujulu kuti bamasi aabo bamuzingulukide abalo bayoosampaulwa.’

⁸ “Pele nywebo nozilundu zya Isilayeli, masamu aanu ayoosyuuka akuzyalila bantu ba Isilayeli micelo, nkaambo bali aafwiifwi kuboola kumunzi wabo. ⁹ Ndapenzegwa akaambo kandinywe, nkaako ndiyoomubeda aankumbu akucita kuti nyika yanu ikalimwe alimwi kukasyangwe zisyango, ¹⁰ alimwi njoovuzya mweelwe wabantu, iiyi mweelwe wabantu bamusyobo wa Isilayeli. Minzi iyookkalwa bantu, aalo matongo ayooyakululwa. ¹¹ Njoovuzya mweelwe wabantu awabanyama mucisi canu, nkabela bayoozyalana akuvula kapati. Njoocita kuti bantu bakakkale mulindinywe mbuli mbundakacitide kale-kale alimwi ndiyoocita kuti bakazwidilile kwiinda lutaanzi. Ndendilyo nimuyooziba kuti ndendime Mwami Leza. ¹² Ndiyoocita kuti bantu, iiyi, bantu bangu kabeendeenda mulindinywe. Bazoomutola, muyooba lukono lwabo, nkabela tamukajayi limbi bana babo.

¹³ “Mboobu mbwaamba Mwami Leza ulati, mukuti balati kulindinywe, ‘Mulya bantu akujaya bana babantu banu.’ ¹⁴ Nkaako tamuciyoolyi limbi bantu akucita kuti musyobo wanu ukamaninwe bana, mbwaamba Mwami Leza. ¹⁵ Tandiyoociti limbi kuti mukanongwe abamasi, alimwi tamukasampaulwi limbi abantu akucita kuti nyika ikoolwe, mbwaamba Mwami Leza.”

Buumi bupya bwa Baisilayeli

¹⁶ Alimwi majwi aa Mwami Leza akandisikila akuti, ¹⁷ “Yebo omuntu, bantu ba Isilayeli nibacikkede munyika yabo bakaisofwaazya amilimo yabo. Micito yabo yakali mbuli kutasalala kwamukaintu uuli kuciindi cakwe. ¹⁸ Nkaako ndakabanyemena kapati nkaambo bakali kutila bulowa munyika akuti bakiisofwaazya amituni yabo. ¹⁹ Ndakabamwaisizya akati kabamasi bakamwaikila muzisi zinji, ndakababeteka kweendelana amicito yabo nibakakkala abamasi bakasofwaazya zina lyangu lisalala, nkaambo bakali kwaambwa kuti, ²⁰ ‘Aaba mbantu ba Mwami Leza nikuba kuti ciindi eeco bakazwide kale munyika yakwe. ²¹ Ndalikupenga akaambo kazina lyangu lisalala, eelyo bamusyobo wa Isilayeli ndakabasofwaazya akati kabamasi aabo mbibakakkala ambabo.’

²² “Nkaako ambila musyobo wa Isilayeli kuti, mboobu mbwaamba Mwami Leza ulati, ‘Nomusyobo wa Isilayeli nsikaciti zintu nzendiyanda kuyoocita akaambo kandinywe pe, pele akaambo kazina lyangu lisalala, eelyo ndimwakasofwaazya akati kabamasi ooko nkomwakaakukkala.’ ²³ Njootondezya kusalala kwazina lyangu pati, eelyo lyakasofwaazigwa akati kabamasi, zina eelyo ndimwakasofwaazya akati kabo. Ndendilyo bamasi nobayooziba kuti ndendime Mwami Leza, mbwaamba Mwami Leza, ndaakulitondezya kuti ndasalala kwiindila mulindinywe kabalibwenene. ²⁴ Nkaambo njoomugwisya mumasi, njoomuyobolola kuzwa muzisi akumuleta munyika yanu alimwi. ²⁵ Njoomusansaila maanzi aasalala, eelyo muyoosalala, njoomusalazya kuzwa kubusofwaazi bwanu boonse akuzwa kumituni yanu. ²⁶ Njoomupa myoyo amizeezo mipya, njoomugwisya moyo uuli mbuli bbwe, ndiyoomupa moyo mupya. ²⁷ Njoomupa nguzu zya Muuya wangu, ndiyoocita kuti mukatobele malailile aangu akuti mukabambe milawo yangu. ²⁸ Muyookkala munyika eeyo njindakapa kuli basikale banu, muyooba bantu bangu ambebo njooba Leza wanu. ²⁹ Njoomuvuna kuzwa kuziyanza zyanu zyoonse zitasalali. Njoocita kuti kamuyoooloka maila, ayoovula kapati alimwi nsikamuleteli nzala pe. ³⁰ Njoocita kuti masamu akazyale micelo minji azisyango zyanu zyamumyuunda, kutegwa mutakasampuki limbi akati kabamasi akaambo kanzala. ³¹ Aawo mwaakwiibaluka nzila zyanu zibi amilimo yanu mibi, muyoolisesemwa nobeni akaambo kazinyonyoono zyanu amilimo yanu njimwakali kucita. ³² Ndiyanda kuti muzibe kuti nsiciti zintu eezi akaambo kanu pe, mbwaamba Mwami Leza. Amulisende, mufwe nsoni akaambo kamilimo yanu nomusyobo wa Isilayeli!”

³³ Mboobu mbwaamba Mwami Leza ulati, “Mubuzuba mbwenjoomusalazya kuzwa kuzinyonyoono zyoonse, njoocita kuti minzi yanu ikakkalwe bantu alimwi matongo aanu ayooyakululwa. ³⁴ Nyika yanu iisyeede buyo iyoolimwa muciindi cakuti kiiyookede buyo mbuli tongo kuli baabo kwiinda kooko. ³⁵ Bayooti, ‘Nyika eeyi yakooledwe yaba mbuli muunda wa Edeni, minzi eeyo yakali matongo, yakasyeede buyo akunyonyoonwa, lino njankwakwa alimwi ikkedwe bantu.’ ³⁶ Eelyo bamasi bamuzingulukide aabo baciliwo bayooziba kuti mebo nde Mwami Leza ndayakulula eeco cakanyonyweedwe, ndasyanga alimwi mumasena aakasiidwe. Mebo nde Mwami Leza ndime ndaamba, njoocicita.”

³⁷ Mboobu mbwaamba Mwami Leza ulati, “Alimwi njoovuwa bamusyobo wa Isilayeli ncobatikandilombe ndiyoobacitila. Njoovuzya bantu babo kuti bakabe mbuli matanga aambelele, ³⁸ iiyi mbuli matanga aambelele aakupaizya ku Jelusalemu kuciindi camapobwe aabikkidwe. Mbombuboobu minzi yakali matongo mbwiiyoozula makamu-makamu aabantu. Ndendilyo nibayooziba kuti ndendime Mwami Leza.”