Ezekiyeli 5
Ezekiyeli mbwaakagelwa
1 Lino omuntu, bweza panga libosya ulibelesye mbuli mbeli yasikunyoola unyoole masusu acilezu cako. Wamana ubweze zipimyo waapaule masusu ngoonyoolwa. 2 Kusinkilizya kwako kwaakuyanda kumana, ukatente cikama camasusu mumulilo mumunzi. Ukabweze cikama cimwi ucikosoole apanga kozinguluka munzi woonse. Cikama cimwi ukacipupulusye guwo. Nkaambo bantu njoobatandaanya apanga lisomwedwe. 3 Pele uleelede kubweza tususu tuce ukatuvungaile kumoombe wacibaki cako, 4 alimwi ukabweze tususu tumwi. Atooto ukatusowele mumulilo tupye. Kuzwa waawo mulilo uyooyandilila kusikila ukabasikile bamusyobo wa Isilayeli boonse.
5 Mboobu mbwaamba Mwami Leza ulati, “Munzi wa Jelusalemu ooyu ngundabikka akati kamisyobo ulizingulukidwe azisi koonse-koonse. 6 Nikuba boobo mububi bwabantu bawo wazangila milawo yangu ambeta zyangu kwiinda misyobo azisi zibazingulukide. Bakakaka milawo yangu alimwi tabatobeli mbeta zyangu.”
7 Nkaako mboobu mbwaamba Mwami Leza ulati, “Mwandipapila kwiinda misyobo eeyo iibambene andinywe alimwi tamutobeli mbeta zyangu nokuba kubamba milawo yangu. Alimwi tamuciti ziyandika mbuli bucita bamasi aabo bamuzingulukide.”
8 Nkaako mboobu mbwaamba Mwami Leza ulati, “Mebo lwangu nsiziyandi nzyomucita nobamu Jelusalemu, nkaako njoomupa cisubulo bamasi kabalangilide.” 9 Akaambo kamituni yanu iisesemya, nywebo njomucita cintu ncetanacitide pe, kwamana nsikaciciti limbi. 10 Nkaako akati kanu bamawisi bayoolya bana babo, abalo bana bayoolya bamawisi. Njoomupa cisubulo mbuli bucita guwo. 11 Aboobo mbubonya mbuli mbwendi muumi, mbwaamba Mwami Leza, lino nkaambo mwakasofwaazya busena bwangu busalala azikozyanyo zyanu zisesemya, milimo yanu iisesemya, nsikamulanganyi limbi, nsikamweeteleli nikuba kumuleka buyo pe. 12 Cipaanzi catatu ciyoojazigwa cuumo, nikuba kuloba akaambo kanzala akati kanu, catatu cimwi ciyoojazigwa panga anze lyabwaanda bwamunzi, cipaanzi catatu njoocimwaisya koonse akucitandaanya apanga lisomwedwe.
13 Eelyo bukali bwangu buyoomana, kunyema kwangu kuyootontomana. Njoobweedezyezya lunyetu lwangu. Ndaakumana kubasubula mubukali bwangu nobayooziba kuti ndime ndaamba mebo nde Mwami Leza mubusungu bwangu.
14 Ndiyoocita kuti mukanyonyooke akuba cisampuzyo akati kamisyobo eeyo iimuzingulukide akuli baabo bamweendanzila. 15 Muyooba cisampuzyo acisesyo, cicenjezyo aciyoosyo kumisyobo eeyo iimuzingulukide ndaakumupa cisubulo mubukali amukunyema akumutapatila nkomutakalubi. Mebo nde Mwami Leza ndime ndaamba. 16 Ndaakumuumya mivwi yangu mibi yanzala iinyonyoona azyakulya. 17 Ndiyoomutumina nzala abanyama bamusokwe, nkabela ziyoosiya tamucikwe abana. Cuumo akutika kwabulowa ziyoomusikila, njooleta basimapanga bazoomulwane. Mebo nde Mwami Leza ndime ndaamba.