Ezekiyeli 4
Ezekiyeli mbwaakatondezya zyakusinkilizigwa kwa Jelusalemu
1 Lino omuntu, bweza citina ucibikke kumbele lyako, kwamana weenge munzi wa Jelusalemu alincico. 2 Wamana ubikke zisinkilizyo. Uyake zisinkilizyo zyakuusinkilizya, ulundike zitantaala wamana ubikke zivuka kuti ulwanwe, akubikka bagutu bapwayana cakuuzingulusya. 3 Wamana ubweze cikangilo calubulo ucibikke kuti cibe mbuli bwaanda bwalubulo buli akati kanduwe amunzi kolangide nkuko. Munzi uyoosinkilizigwa, nkabela yebo nduwe ooyoousinkilizya. Eeci ciyooba citondezyo kumusyobo wa Isilayeli.
4 Lino weelede kulala kubbazu lyako lyalumwensi kuti upengele cinyonyoono camusyobo wa Isilayeli. Weelede kupengela cinyonyoono cabo kweendelana amweelwe wamazuba aayo ngoolala kubbazu lyako. 5 Ndakubikkila mweelwe wamazuba weelene amweelwe wamyaka eeyo njibakali kubisya. Nkaako uyoopenga kwamazuba aali myaanda yotatwe amakumi aali fuka akaambo kazinyonyoono zyamusyobo wa Isilayeli.
6 Waakumana kucita ceeci, ukalale ansi alimwi, ciindi eeci ulale kubbazu lyako lyalulyo ukapengele zinyonyoono zyaciinga ca Juda. Ndakubikkila mazuba aali makumi one, kuti buzuba bomwe bwa mwaka omwe wakupenga. 7 Lino ucengulukile kooko kusinkilizidwe munzi wa Jelusalemu, nkabela ukuuvungile ntuku ukasinsime ziyoocitika kumunzi ooyu. 8 Nkabela njookwaanga antambo kutegwa utakakonzyi kusanduka mane kusikila ukamanizye mazuba aako aakusinkilizya.
9 Bweza maila bulotwe, bunyangu, nyemu, amabele, zibikke mucibumbwa, kozibelesya mukujika zyakulya. Nzoelede kunoolya kwamazuba aali myaanda yotatwe amakumi ali fuka ngonoolede kubbazu lyako. 10 Ukeeleke masyekeli azilyo nzonoolya buzuba abuzuba muziindi zibikkidwe. 11 Alimwi weelede kupima cipali camaanzi ngonoonywa muziindi zibikkidwe. 12 Weelede kulya zilyo zyako mbuli mbonga walya cinkwa cabulotwe, ncookanga bantu kabalangilila, mulilo ukuukutuzye bufumba bwabantu. 13 Mwami Leza wakati, “Munzila eeyi bantu ba Isilayeli bayoolya zilyo zisofweede akati kamisyobo oomo mwendiyoobatandila.”
14 Eelyo mebo ndakati, “Citabi boobo pe O Mwami Leza! Nsinalisofwaazizye pe. Kuzwa kubukubusi nsinalide cintu cakalifwida nociba cakalumwa abanyama bamusokwe. Taakwe nyama iisofweede njindakalide kale pe.”
15 Leza wakati, “Waamba kabotu, nkaako njoocita kuti cilyo cako ukacijikile amulilo wabufumba bwaŋombe butali bwabantu.”
16 Eelyo wakati kulindime, “Yebo omuntu, ndalesya zilyo mumunzi wa Jelusalemu. Bantu bayoolya zilyo zyakupiminwa-piminwa cakulibilika akunywa twaanzi cakumantauka, 17 nkaambo zilyo amaanzi ziyooceya. Bayoogambwa baakubonana, nkabela bayookotela akaambo kacinyonyoono cabo.”