Myeelwe 25

Baisilayeli mbubakabisya ku Mowabu

¹ Ciindi Baisilayeli nibakacikkede ku Syitimu, baalumi bakatalika kuvuula a Bamowabu. ² Bakaintu aaba bakali kubatamba kukupaizya kumituni yabo. Bakalya akukotamina mituni eeyo. ³ Munzila eeyi Baisilayeli abalo bakakomba Baali waku Peyo. Mwami Leza wakabanyemena kapati. ⁴ Eelyo wakaambila Mozesi kuti, “Jata basololi boonse babaabo, ubajaye boonse antangalala kumbele lya Mwami Leza kuti bukali bwangu buyoosya butayi ku Baisilayeli.”

⁵ Lino Mozesi wakaambila basololi ba Baisilayeli kuti, “Umwi aumwi mumusyobo wakwe ajaye baalumi aabo bakomba Baali waku Peyo.”

⁶ Kuzwa waawo Muisilayeli umwi wakaleta mukaintu Mumidiyani, Mozesi ababuleya Baisilayeli kabacilila kumulyango watente lyakuswaanganina. ⁷ Mpoonya Finihasi, mwana wa Eliyazaa muzyukulu wa Aloni mupaizi, naakabona eeci, wakazwa mubuleya waakubweza sumo. ⁸ Wakatobela mwaalumi amukaintu ooyo mutente, nkabela wakabayasa cakubajatikizya aamwi boonse bobilo. Aboobo cuumo cakamana. ⁹ Pele aabo bakafwide kale aacuumo bakali zyuulu zili makumi obilo azine.

¹⁰ Lino Mwami Leza wakaambila Mozesi kuti, ¹¹ “Finihasi mwana wa Eliyazaa, muzyukulu wa Aloni nguwamana bukali bwangu ku Baisilayeli, nkaambo wasungwaala mbubonya mbuli ndime. Nikwataba boobo nindabanyonyoona. ¹² Nkaako umwaambile kuti lino ndapanga cizuminano anguwe. ¹³ Walo abalunyungu lwakwe bayooba bapaizi akutamani, nkaambo kakuti wakasungwaalila bulemu bwangu akusalazya Baisilayeli.”

¹⁴ Lino zina lya Muisilayeli wakajaigwa amukaintu Mumidiyani wakali Zimula mwanaa Salu, mupati wamukowa wa Simiyoni. ¹⁵ Nkabela mukaintu ooyo wakali Kozibi, mwanaa Zuu waluzubo lwabwami mu Midiyani.

¹⁶ Lino Mwami Leza wakalailila Mozesi kuti, ¹⁷ “Bamidiyani mbaasinkondonyoko, amubajaye, ¹⁸ Nkaambo bakali kumulanga mbuli basinkondonyina nibakamweena mumakani aaku Peyo, amucizi wabo Kozibi, mwana wamusololi waku Midiyani, wakajaigwa muciindi cacuumo cakaletwa amakani aaku Peyo.”