Myeelwe 24
1 Lino ciindi Balaamu naakabona kuti cakabotela Mwami Leza kuleleka Baisilayeli, taakwe naakasonda mbuli ziindi zimwi ziya, pele wakalanga, kunkanda. 2 Balaamu naakabona Baisilayeli kabayakide muziinga zyabo, Muuya wa Leza wakamusikila.
3 Wakatalika kusinsima akuti,
“Mboobu mbwaamba Balaamu mwanaa Beyo,
ngamajwi ayooyo uukonzya kubona kabotu-kabotu.
4 Ngamajwi ayooyo uumvwa majwi aa Leza
uubwene cilengaano kuli Singuzuzyoonse,
mbuli mukulota meso aakwe akajaluka.
5 Abota matente aanu Nobajakobo,
makkalilo aanu Nobaisilayeli!
6 Aliyalidwe mbuli makkuti mbuli myuunda
iili kumbali aamulonga,
mbuli maalosi aakasyangwa a Mwami Leza,
mbuli milombe iili kumbali aamaanzi.
7 Imvula lyoonse inoobawa kabotu,
myuunda yabo inoojisi maanzi aaelede.
Mwami wabo uyooduma kwiinda Agagi
abwalo bwami bwabo buyoolemekwa.
8 Leza nguwakabagwisya ku Ijipiti,
ulabalwanina mbuli munyati.
Balazunda cakumaninizya basinkondonyina,
balatyoloola zifuwa zyabo,
balabayasa mivwi yabo.
9 Balavwantama mbuli syuumbwa,
nguni uutibatalike?
Balelekwe aabo bamuleleka,
basinganyizigwe aabo bamusinganya.”
10 Amvwe boobo Balaki wakanyema kapati wavunga ntuku wati, “Ndakakwiitila kuti uzoondisinganyizizye basinkondoma, pele yebo wabaleleka ziindi eezi zyotatwe. 11 Ani koya buyo! Ndakali kuyeeya kukupa bulumbu bupati, pele Mwami Leza wakukasya kuti ulumbulwe.”
12 Lino Balaamu wakaingula Balaki kuti, “Tee kayi ndakabaambila mbookatuma kulindime kuti, 13 ‘Nikuba kuti Balaki waandipa nsiliva yoonse angolida zyaŋanda yakwe, mebo nsikonzyi kulicitila cibotu niciba cibi citeendelani amalailile aa Leza. Ndilaamba buyo ceeco Mwami Leza ncaandaambila.’
14 “Lino ndabweeda, kusaanguna ndikucenjezye zyazeezyo bantu aaba nzyobaticite kulindinywe.”
Kusinsima kwa Balaamu kwamamanino
15 Nkabela wakasinsima kuti,
“Mboobu mbwaamba Balaamu mwanaa Beyo.
Ngamajwi ayooyo uukonzya kubona kabotu-kabotu.
16 Ngamajwi ayooyo uumvwa majwi aa Leza,
uutambula maanu kuzwa kuli yooyo uusumpukide kwiindilila.
Uubwene cilengaano kuzwa kuli Singuzuzyoonse.
Mbuli mukulota meso aakwe akajaluka.
17 Ndimubwene, pele kutali mbwabede,
nguulya tali aafwiifwi.
Muyoozwa nyenyezi muli Jakobo,
nkoli yabwami iyoozwa muli Isilayeli,
Uyoopwayaula basololi ba Mowabu akuuma bana ba Syeti.
18 Uyoozunda Baedomu,
basinkondonyoko baku Siiya bayoosaalwa.
Baisilayeli banooya buzunda.
19 Muli Jakobo muyoozwa muleli,
uyoonyonyoona boonse bayoosyaala mumunzi.”
20 Lino Balaamu mucilengaano cakwe wakabona Baameleki,
eelyo wakasinsima kuti,
“Baameleki nguwakali musyobo wanguzu kwiinda,
pele kumamanino bayoomaninina.”
21 Alimwi mucilengaano cimwi wakabona Bakeni,
eelyo wakasinsima kuti,
“Busena mbomukkede bulikwabilidwe,
mbuli citeente cili mujeleele.
22 Nikuba boobo Nobakeni muyoonyonyoonwa,
ciindi mwaakujatwa abaku Asyuu.”
23 Nkabela Balaamu wakaindilizya kusinsima kati,
“Nguni uyoopa Leza mulandu waakucita boobo?
24 Basikusaala bayoozwida ku Kitimu.
Bayoozunda Basyuu a Baeba, pele nikuba boobo abalo bayoonyonyoonwa.”
25 Lino Balaamu wakanyamuka akweenda kulimbabo, nkabela awalo Balaki wakainka kwakwe.