Mukambausi 3
Zintu zyoonse zilijisi ciindi cazyo
1 Zintu zyoonse zilijisi ciindi cazyo, makani oonse alijisi ciindi cawo anyika aano.
2 Kuli ciindi cakuzyalwa aciindi cakufwa.
Ciindi cakusyanga aciindi cakujwa.
3 Ciindi cakujaya aciindi cakusilika.
Ciindi cakumwaya aciindi cakuyaka.
4 Ciindi cakulila aciindi cakuseka.
Ciindi cakweema aciindi cakuzyana.
5 Ciindi cakumwayaula mabwe aciindi cakwaabungika.
Ciindi cakukumbata aciindi cakulilesya.
6 Ciindi cakuyandaula aciindi cakuleka buyo.
Ciindi cakubamba aciindi cakusowa.
7 Ciindi cakuzapula aciindi cakusuma.
Ciindi cakuumuna aciindi cakukanana.
8 Ciindi cakuyanda aciindi cakusulaika.
Ciindi cankondo aciindi caluumuno.
9 Ino uubeleka ujana mpindu nzi kumilimo yakwe njacita? 10 Ndibwene mukuli ooyo Leza ngwapede bantu. 11 Wakacita kuti zintu zyoonse kazyeebeka muciindi cazyo. Wakapa bantu lulangilo lwabuumi butamani, nikuba boobo tabakonzyi kumvwisya eezyo Leza nzyaakacita kuzwida kumatalikilo kusikila kumamanino. 12 Ndizi kuti taakwe cintu cibotela bantu kwiinda kukondwa akucita zibotu nobacipona. 13 Nkaako muntu uuli woonse uleelede kulya akunywa, kuti alibotezye kuzwa kumilimo yakwe yoonse, nkaambo eeci ncipego cizwa kuli Leza. 14 Ndizi kuti zyoonse eezyo Leza nzyacita zilakkalilila lyoonse alyoonse, taakwe cikonzya kuyungizigwa nikuba kugwisigwa kuzwa kuli nzizyo. Leza mwini nguucita oobo, bantu baleelede kumulemeka.
15 Coonse ciliwo cakaliwo kale, coonse ciyooba cakaliwo kale, mazuba aakaindi Leza ulaazi.
16 Kuli acimwi ncindakabona ansi aano. Mubusena bwalubeta, ndakabona bubi, mubusena bwabululami, ndakabona bubi.
17 Ndakayeeya mumoyo kuti, “Leza uyoobeteka boonse baluleme ababi, nkaambo ciyoosika ciindi camilimo yoonse, ciindi zintu zyoonse noziyoocitika.”
18 Alimwi ndakayeeya mumoyo kuti, “Leza ulasunka bantu kuti babone kuti bali mbuli banyama. 19 Cintu cisikila muntu amunyama mbubonya, ciyoocitika kumuntu akumunyama akwalo. Mbuli bufwa cimwi acimwi mbocifwa. Boonse balijisi muuya, muntu taindi munyama. Zintu zyoonse nzyabuyo. 20 Boonse balaya kubusena bomwe, boonse bazwa kubulongo alimwi boonse balapilukila kubulongo. 21 Nguni uuzi naa muuya wamuntu ulainka mujulu, naa muuya wamunyama uya munyika?”
22 Aboobo ndakabona kuti kunyina cibotezya muntu kwiinda kuti alye zyamilimo yakwe ncecaabilo cakwe. Nkaambo kuti wafwa, nguni uuyoomupilusya kuti azoobone cicitika?