Mukambausi 4
1 Alimwi ndakalanga akubona kudyamininwa koonse ooko kwakali kucitwa ansi aano. Ndakabona minzi yabadyamininwa, tiibakajisi sikubaumbulizya pe. Basikubadyaminina bakalaanguzu kwiinda mbabo, tiibakajisi sikubaumbulizya. 2 Eelyo ndakaambilizya kuti, bafu balakkomana kwiinda baumi, kwiinda aabo bacipona. 3 Pele uukkomene kwiinda boonse ngooyo uutanabawo uutanabona bubi oobo bucitwa ansi aano.
4 Lino ndakabona kuti milimo yoonse akuzwidilila koonse kulaba mbuli muntu uunyonokela mweenzinyina. Acalo eeci ncabuyo, cili mbuli kutandaanya luuwo. 5 Mufuba-fuba ulalikumbata, akulinyonyoona. 6 Ncibotu kuba acice muluumuno kwiinda kulikatazya amaanza obilo ciindi coonse, kuyabuyandaula zyabuyo zyamuluuwo.
7 Alimwi ndakabona acimwi cabuyo eeco cicitika ansi aano. 8 Kwakali muntu alikke buyo, taakajisi mwana mulombe naba munyina. Taakwe naakali kulyookezya kubeleka, nikuba boobo taakakkuta alubono oolo ndwaakajisi. Wakabuzya kuti, “Ino ndibelekela ni? Ino nkaambo nzi nentalyi buyo lubono lwangu?” Acalo eeci ncabuyo, nkwiide kulikatazya buyo.
9 Bobilo bali kabotu kwiinda omwe, nkaambo balajana mpindu mbotu mumilimo. 10 Kuti umwi wawa mweenzinyina ulakonzya kumunyamuna. Pele maawe kuli yooyo uuwa kali alikke kwamana kunyina uukonzya kumugwasya. 11 Alimwi kuti bobilo boona antoomwe balakasaazyanya. Pele muntu woona alikke nalikumbata buti, ino inga walikasaazya buti? 12 Nikuba kuti umwi wazundwa, bobilo balakonzya kuvunana. Kakole koosedwe takafwambi kumansuka.
Bucembele mbwabuyo
13 Ncibotu kuba amukubusi mucete musongo kwiinda kuba amwami mudaala uutacilaiki. 14 Mukubusi ulakonzya kuzwa muntolongo kuti azoobe mwami, naa ulakonzya kuzwa kumukwasyi mucete mubulelo oobo. 15 Ndakabona kuti boonse bakali kupona akukkala ansi aano bakatobela mukubusi ooyo, wakaba mwami mubusena bwamwami wakusaanguna, 16 wakali kweendelezya bantu. Pele aabo bakaboola musule lyakwe tiibakabotelelwa muliyooyo wakali kulela. Acalo eeci ncabuyo, cili mbuli kutandaanya luuwo.