Mateyo 23

Jesu mbwaakacenjezya bantu zyabamayi ba Mulawo a Bafalisi

¹ Kumane aawo Jesu wakati kumakamu aabantu akuli basikwiiya bakwe,

² “Bamayi ba Mulawo a Bafalisi balapandulula milawo ya Mozesi. ³ Aboobo amucite akujatisya eezyo nzyobamwaambila. Pele kutali nzyobacita, nkaambo bakambauka buyo, pele tabaziciti pe. ⁴ Balaanga mikuli milemu iiminya kubweza, akwiibikka aamakuko aabantu, pele lwabo beni balakaka kugwasya kubweza naaceya. ⁵ Balacita milimo yabo yoonse kuti babonwe abantu. Balalyaanga tukomo tupati-pati akulampya maaya aazisani zyabo. ⁶ Balayandisya kukkala azyuuno zyabulemu muzikombelo akuyanda busena bwabulemu mumapobwe. ⁷ Balayanda kujuzigwa akulemekwa muzisambalilo akwiitwa kuti mwiiyi kubantu. ⁸ Pele nywebo mutaitwi kuti mwiiyi, nkaambo mulijisi mwiiyi omwe, nywebo nyoonse muli babunyina. ⁹ Alimwi mutaiti muntu naba omwe ansi aano kuti Taata, nkaambo mujisi Uso omwe, ooyo uuli kujulu. ¹⁰ Alimwi mutaitwi kuti basololi, nkaambo mujisi musololi omwe, ooyo uuli ngo Munanike wa Leza. ¹¹ Ooyo mupati aakati kanu abe mubelesi wanu, ¹² kufumbwa uulisumpula uyoobombezegwa, nkabela kufumbwa uulibombya uyoosumpulwa.

Jesu mbwaakakalalila bamayi ba Mulawo a Bafalisi

¹³ “Pele maawe kulindinywe nobamayi ba Mulawo a Bafalisi basikuupaupa aameso! Mujalila bwami bwakujulu kubantu. Nkaambo nywebo tamubujisi alimwi mulakasya aabo bayanda kunjila. [ ¹⁴ Maawe kulindinywe nobamayi ba Mulawo a Bafalisi basikuupaupa aameso! Nkaambo mulalya lubono lwabamukabafu alimwi mulweeno mulalampya mipailo yanu. Nkaako muyoojana mulandu mupati.]

¹⁵ “Maawe kulindinywe nobamayi ba Mulawo a Bafalisi basikuupaupa aameso nkaambo muleenda nyendo mulwizi aanyika kuti musandule muntu omwe, kwamana muntu ooyo weelede cisubulo cipati camulilo uutamani kwiinda ndinywe.

¹⁶ “Maawe kulindinywe nobasololi boofu, nimwaamba kuti, ‘Kuti naa umwi wakonkezya aŋanda ya Leza, ukonka cabuyo, pele kuti naa umwi wakonkezya angolida yaŋanda ya Leza ooyo abambe cikonke cakwe.’ ¹⁷ Nywebo nobasololi boofu bafuba-fuba! Ino ncicili cipati, ngolida naa ŋanda ya Leza eeyo iisalazya ngolida? ¹⁸ Alimwi mulaamba kuti, ‘Kuti naa umwi wakonkezya acipaililo, ukonka cabuyo pele kuti naa wakonkezya acipego eeco cili acipaililo abambe cikonke cakwe.’ ¹⁹ Nyweho nobantu boofu! Ino ncicili cipati, cipego naa cipaililo eeco cisalazya cipego? ²⁰ Aboobo ooyo uukonka acipaililo ulakonkezya azeezyo zili mpawo. ²¹ Ayooyo uukonka aŋanda ya Leza ulakonkezya azili mumo. ²² Ayooyo uukonka kujulu wakonkezya a Leza acuuno cakwe.

²³ “Maawe kulindinywe nobamayi ba Mulawo a Bafalisi, nobasikuupaupa aameso nkaambo mulapa cakkumi catununkilizyo acakulunga cakulya, pele mulaubausya makani mapati aa Milawo ya Leza, mbuli kubeteka akuba aaluse akusyomeka. Eezi muleelede kuzicita kaatakwe cakuubausya zimwi. ²⁴ Nywebo nobasololi boofu, mulaibula kazinini pele mulamena nkamela!

²⁵ “Maawe kulindinywe nobamayi ba Mulawo a Bafalisi, nobasikuupaupa aameso! Nkaambo mulasanzya nkomeki amutiba mpozili anze, kakuli kuti mukati kanu muzwide buyo bunyangi abulyato. ²⁶ Nywebo no Bafalisi boofu, amusaangune kusanzya nkomeki moili mukati amutiba kuti anze aalo asalale.

²⁷ “Maawe kulindinywe nobamayi ba Mulawo a Bafalisi, nobasikuupaupa aameso! Nkaambo muli mbuli zyuumbwe zibikkidwe mulambo zinga kuzilangila aanze nzibotu kapati, pele anikuti mukati zizwide zifuwa zyabantu bakafwa akutasalala koonse. ²⁸ Mbubonya oobo anywebo mbomulangika mbuli bantu baluleme kubantu, pele mulindinywe muzwide kuupaupa aameso abusofwaazi.

²⁹ “Maawe kulindinywe nobamayi ba Mulawo a Bafalisi nobasikuupaupa ameso! Nkaambo mulayaka zyuumbwe zyabasinsimi akubotya zibumbwa zyabaluleme ³⁰ mulati, ‘Kuti nitwakaliwo mumazuba aamatata nitwatakabagwasya kujaya basinsimi.’ ³¹ Mbuboobo mbomulipa mulandu, nkaambo mulati muli bana babaabo bakajaya basinsimi. ³² Ncibotu, amumanizye mulimo wakatalika bamauso. ³³ Nywebo nonzoka, nywebo nobacipile, ino muyoocileya buti cisubulo camulilo uutamani? ³⁴ Nkaako ndamutumina basinsimi abantu basongo abamayi, bamwi babo muyoobajaya akubakankamina aaciingano. Bamwi muyoobauma muzikombelo zyanu akubapenzya kuzwa mu munzi amunzi. ³⁵ Aboobo cisubulo ciyoomusikila akaambo kabantu baluleme boonse bakajaigwa kutalikila kuli Abela mululami, kusikila kuli Zekaliya mwanaa Balakiya, ooyo ngomwakajaya mucikombelo aakati kabusena busalalisya acipaililo. ³⁶ Ncobeni, ndamwaambila kuti, cisubulo cazyoonse eezi ciyoosikila bantu basunu.

Jesu mbwaakali kuyandisya munzi wa Jelusalemu

³⁷ “Akaka Jelusalemu, Jelusalemu, oojaya basinsimi akubauma mabwe aabo Leza mbatuma kulinduwe! Kanji-kanji ndalikuyanda kubunganya bantu bako antoomwe, mbubonya mbuli nkuku mbwiifukatila bana bayo mumababa pele yebo wakakaka! ³⁸ Ncobeni ŋanda njomukombela Leza lyaba tongo. ³⁹ Nkaambo ndamwaambila kuti, tamuciyoondiboni alimwi pe, mane mukaambe kuti, ‘Ulilelekedwe uuboola muzina lya Mwami Leza.’”