Mateyo 21

Jesu mbwaakanjila mu Jelusalemu

¹ Lino nibakaswena aafwiifwi a Jelusalemu bakasika ku Betefage ku Cilundu camisamu ya Oliva. Jesu wakatuma basikwiiya bobilo, ² wakati kulimbabo, “Kamuya kumunzi uulya, muyoojana mbongolo iisungidwe amwanaayo. Mukazyaangunune muzilete kulindime. ³ Kuti naa muntu akamubuzye amakani aaya, mukaambe kuti, ‘Mwami ulaziyanda.’ Eelyo uyoomuzumizya.” ⁴ Eezi zyakacitika mbubonya Leza mbwaakaambila musinsimi kuti,

⁵ “Ambila bamumunzi wa Ziyoni kuti,

‘Kolanga mwami wako ngooyo ulaboola kulinduwe.

Ulibombede, ulitantide ambongolo,

ncobeni, amwana wambongolo.’”

⁶ Mpawo basikwiiya bakainka, bakaakucita mbubonya Jesu mbwaakabalailila. ⁷ Bakaleta mbongolo amwanaayo, bakabikka majansi aabo ali nzizyo, eelyo wakatanta. ⁸ Mpawo bantu banji bakayala majansi aabo mumugwagwa, alimwi bamwi bakakwapula tusanzu twazisamu batuyala mumugwagwa. ⁹ Lino bantu aabo bakali kweendela kumbele abaabo bakali kumutobela bakali koongolola bati, “Alemekwe Mwanaa Devedi! Ulilelekedwe ooyo uuboola muzina lya Mwami Leza! Amumulemeke nobakujulu lyamajulu!” ¹⁰ Jesu naakanjila mu Jelusalemu, bantu boonse bakazingwa bati, “Ani nguni ooyu?” ¹¹ Bantu banji bakati, “Ooyu ngo Jesu musinsimi uuzwa ku Nazaleta waku Galilii.”

Jesu mbwaakatanda basimakwebo

¹² Lino Jesu wakanjila muŋanda ya Leza akutanda boonse bakali kuuzya akuula oomo. Wakatingamuna matebule aabasikucincana mali azyuuno zyabaabo bakali kuuzya nkwilimba. ¹³ Wakati kuli mbabo, “Kulilembedwe kuti, ‘ŋanda yangu iyooitwa kuti niŋanda yakukombela,’ pele mwaicita ciyubilo cababbi.”

¹⁴ Lino boofu bakasika kulinguwe muŋanda ya Leza wakabaponya. ¹⁵ Pele bapaizi basilutwe abamayi ba Mulawo nibakabona zintu zigambya nzyaakacita akumvwa bana kaboongolola muŋanda ya Leza kuti, “Alemekwe Mwanaa Devedi!” Bakakalala. ¹⁶ Bakamubuzya kuti, “Sena ulimvwide ncobaamba?” Jesu wakati kulimbabo, “Iiyi, sena tiimwakabala kuti, ‘Wakacitya kuti bana atuvwanda tumutembaule.’” ¹⁷ Lino Jesu wakazwa ooko akuya kumunzi wa Betani kuyooona.

Makani aamukuyu

¹⁸ Lino cifumo-fumo Jesu naakali kubweeda ku Jelusalemu wakafwa nzala. ¹⁹ Nkabela naakabona mukuyu munsi aanzila, wakainka kuti alye nkuyu. Pele tuuwakazyede pe, matu aalo ngaakavwevwede. Mpawo wakati kulinguwo, “Utakazyali limbi nkuyu kuzwa sunu!” Mpoonya aawo mukuyu ooyo wakayuma cwaa. ²⁰ Lino basikwiiya nibakabona boobo, bakagambwa bakati, “Ino ooyu mukuyu wafwambaana buti kuyuma?” ²¹ Jesu wakabaingula kuti, “Ncobeni, ndamwaambila kuti naa kamusyoma akutadonaika, tamukooyoocita buyo eeci cacitika kumukuyu ooyu, pele kuti naa mwaamba kuti kucilundu eeci, ‘Zyuka aawa uliwaale mulwizi,’ ciyoocitika. ²² Kufumbwa ncomuyookumbila mukukomba muyoocitambula, kuti naa kamujisi lusyomo.”

Zyabulelo bwa Jesu

²³ Lino Jesu naakanjila muŋanda ya Leza, bapaizi basilutwe abapati bacisi bakasika kaiisya akuti kulinguwe, “Ino bulelo mbocitya zyoonse eezi wakabujana kuli? Twaambile nguni wakakupa?” ²⁴ Jesu wakaingula kuti, “Ambebo ndamubuzya mubuzyo. Kuti naa mundiingule nkokuti ambebo ndamwaambila kuti oobu bulelo mbwecitya zintu eezi buzwa kulini. ²⁵ Nguni wakatuma Joni kubbapatizya. Ngu Leza naa mbantu?” Eelyo bakakazyanya mulicabo bakati, “Kuti naa twaambe kuti, ‘Ngu Leza,’ ulaamba kuti, ‘Ino kayi nkaambo nzi ncimwatakamusyoma?’ ²⁶ Pele kuti naa twaambe kuti ‘Mbantu,’ tulayoowa, nkaambo bantu boonse balizi kuti Joni musinsimi.” ²⁷ Aboobo bakavuwa Jesu kuti, “Tatuzi pe.” Mpawo wakati kulimbabo, “Ambebo nsikoomwaambila naa ninguzu nzi nzecitya zintu eezi.

Cikozyanyo cabana bobilo

²⁸ “Ino muyeeya buti? Muntu umwi wakajisi bana balombe bobilo, wakainka kumutaanzi waakuti, ‘Mwanaangu, koya ukabeleke mumuunda wamisaansa sunu.’ ²⁹ Mwana wakaingula kuti, ‘Nsiyandi pe.’ Pele kuzwa waawo wakeempa akuunka. ³⁰ Wisi wakainka kuli wabili wakwaamba mbubonya. Ooyo wakaingula kuti, ‘Ndainka bataata,’ pele taakwe naakainka. ³¹ Ino nguuli akati kabo bobilo wakacita mbwayanda wisi?” Bakati, “Mutaanzi.” Jesu wakati kulimbabo, “Ncobeni ndamwaambila kuti, basimitelo abavuule balamusaangunina kunjila mubwami bwa Leza. ³² Nkaambo Joni wakatondezya nzila yabululami, pele taakwe nimwakamusyoma. Pele basimitelo abavuule bakamusyoma, nywebo nimwakabona oobo taakwe nimwakeempa akumuzuminina.

Cikozyanyo cabasimilimo bamumuunda wamisaansa

³³ “Amuswiilile cikozyanyo acimwi. Kwakali muntu umwi mwini muunda. Muntu ooyu wakalima muunda wamisaansa. Wakuuyakila lubaya akusya dindi pati lyakutyankila nsaansa wayaka ngazi. Amane muunda ooyo wakuupa kubalimi, walo wakaya kucisi cimbi. ³⁴ Lino ciindi cakutebula micelo nicakaswena, wakatuma babelesi bakwe kubalimi kuti bakalete micelo. ³⁵ Pele balimi bakajata babelesi bakwe, umwi bakamuuma, umwi bakamujaya, umwi bakamuuma mabwe. ³⁶ Alimwi wakatuma bamwi babelesi, bakali banji kwiinda bataanzi, abalo bakabacita mbubonya buyo. ³⁷ Kuzwa waawo wakabatumina mwanaakwe wati, ‘Ambweni bayoomulemeka mwanaangu.’ ³⁸ Pele balimi nibakabona mwana ooyo bakavwiya kuti, ‘Ooyu ngosimulya zina. Amuboole, tumujaye tutole cikono cakwe.’ ³⁹ Mpawo bakamujaya, akumusowela kunze aamuunda wamisaansa bamujaya. ⁴⁰ Nkaako ino mukamwini muunda wamisaansa aakuboola, uyoobacita buti balimi aabo?” ⁴¹ Bakati kulinguwe, “Uyoojaya aabo babi alufu luusisya, akupa muunda ooyo kubalimi bambi. Aabo bazoomupa micelo muziindi zyeelede.”

⁴² Lino Jesu wakati kulimbabo, “Sena tiimwakabala mu Malembe kuti:

‘Bbwe ndibakakaka bayaki ndelyakaba bbwe liyandisi lyacooko.

Mwami nguwakacita eezi,

nkaako zilagambya kapati.’

⁴³ “Lino ndamwaambila kuti muyoonyangwa bwami bwa Leza. Buyoopegwa kumusyobo uumbi uuyoozyala micelo iielede. ⁴⁴ Nkabela ooyo uuwida abbwe eelyo uyootyokooka, pele kufumbwa ngoliyoolokela ooyo liyoomupwasyaula.”

⁴⁵ Bapaizi basilutwe a Bafalisi nibakamvwa zikozyanyo zyakaambwa, nkaambo bakaziba kuti wakali kusendekezya mbabo mucikozyanyo eeci. ⁴⁶ Bakali kuyanda kuti bamujate. Pele bakayoowa bantu, nkaambo banji bakali kuzumina kuti musinsimi.